U Minsku znoŭ zahavaryli pra znos pryvatnaha siektara ŭ rajonie Arłoŭskaj
Pierśpiektyvy znosu pryvatnych siadzib u rajonie vulicy Arłoŭskaj abmiarkoŭvajucca nie pieršy (i navat nie dziasiaty) hod. Hetym razam horadabudaŭniki vyrašyli ŭnieści źmieny ŭ detalovy płan terytoryi ad vulicy Navavilenskaj da Haja. Hramadskaje abmierkavańnie prajekta ciapier prachodzić u Centralnym rajonie Minska. Realt.by raskazaŭ, što tut płanujecca źnieści, a što pabudavać.
Raspracoŭščykam «horadabudaŭničaha prajekta detalovaha płanavańnia terytoryi ŭ miežach Ščadryna — Navavilenskaj — Staravilenskaha trakta — Asipienki — Čarviakova — Kachoŭskaj — Smorhaŭskaha trakta — Arłoŭskaj — Haja (uniasieńnie źmienaŭ)» vystupaje «Minskhrada».
Prajektavanaja terytoryja zajmaje płošču ŭ 68 hiektaraŭ. U centry hetaha ŭčastka znachodzicca vulica Arłoŭskaja, pobač ź jakoj raźmieščanyja administracyjnyja i vytvorčyja budynki, a taksama samaja raznastajnaja žyłaja zabudova. Tut jość i sučasnyja vyšynnyja damy, i dychtoŭnyja katedžy, i niepryvabnyja draŭlanyja chaty.
Pieramieny ŭ hetym kutku Minska — praktyčna niepaźbiežnyja. Uličvajučy vysokuju transpartnuju nahruzku, blizkaść da centra stalicy i pierśpiektyvy adkryćcia mietro, horadabudaŭniki nastojvajuć na nieabchodnaści kompleksnaha padychodu da asvajeńnia, zabudovy i rekanstrukcyi hetaha ŭčastka.
U novym detalovym płanie pieraličanyja ŭsie niežyłyja budynki, jakija źbirajucca źnieści. Usiaho ich naličyli 11 štuk.
Tak, pad znos pojduć dyśpietčarskaja stancyja «Voziera», šviejnaja fabryka, vietstancyja Centralnaha rajona, kultavaje zbudavańnie («Tavarystva śviadomaści Kryšny«), ŽREA № 27, krama zoatavaraŭ, niekalki administracyjnych i vytvorčych budynkaŭ, a taksama znajomaja mnohim kaviarnia «Jołki-pałki».
Byłaja škoła na Arłoŭskaj (ciapier administracyjny budynak) taksama padlahaje znosu.
Pry hetym tramvai ŭ kvartale zastanucca, prosta ich pieraniasuć bližej da Navavilenskaj. Taksama PDP praduhledžvaje stvareńnie kruhavoha ruchu ŭ rajonie budučaj stancyi mietro «Staravilenskaja». Niedaloka ad kruha moža źjavicca i pieršy ŭ Minsku tunel dla aŭtamabilaŭ. Samu vulicu Arłoŭskuju značna pašyrać, a pa byłym pryvatnym siektary projduć dźvie novyja vulicy ŭ bok MKAD.
Nie abminie znos i šmatlikija pryvatnyja damy, a taksama trochpaviarchoŭki, prylehłyja da vulicy Arłoŭskaj. U budučyni pobač z pašyranaj mahistrallu źjaviacca šmatkvaternyja vyšynnyja damy, a taksama parkinhi i šmatfunkcyjanalnyja centry.
Žyły dom u pierśpiektyvie vyraście i na vulicy Čarviakova, na miescy niekalkich pakinutych tam pryvatnych damoŭ. A voś kvartał katedžaŭ na vulicy Uradžajnaj (na fota) čapać nie buduć: siadzibnaja zabudova tut pakul zachavajecca.
Što tyčycca infrastruktury, to na vulicy Paŭłava (heta ŭ hłybini kvartała) zapłanavana budaŭnictva dziciačaha sada, a kala najaŭnaj škoły № 104 na miescy pryvatnych damoŭ źjavicca pačatkovaja škoła-sad. Jašče adnu daškolnuju ŭstanovu źbirajucca ŭźvieści na miescy pryvatnaha siektara ŭ rajonie vulicy Viery Słuckaj i Aršanskaha prajezda.
U vyniku ŭsich źmien kolkaść nasielnictva kvartałaŭ, prylehłych da Arłoŭskaj, moža pavialičycca z 7 da 11,8 tysiačy čałaviek.
Aznajomicca z prajektam PDP možna ŭ faje administracyi Centralnaha rajona. Zaŭvahi i prapanovy ŭ piśmovaj formie z paznakaj «hramadskija abmierkavańni» čakajuć pa adrasie: 220004, h.Minsk, vuł. Mielnikajcie, 6. Adpravić ich možna da 24 sakavika ŭklučna.
Vyniki hramadskaha abmierkavańnia padviaduć na pasiadžeńni architekturna-horadabudaŭničaj rady pry hałoŭnym architektary horada Minska paśla razhladu zaŭvah i prapanoŭ, jakija pastupili.
Kamientary