Айцішнік вярнуўся ў Беларусь праз камісію па вяртанні і расказаў, што не так з Іспаніяй
Гутарку прапагандысткі Ксеніі Лебедзевай з айцішнікам Дзянісам Маркіным, які расказаў, што яму не спадабалася ў Барселоне, паказаў канал «Беларусь 1».
Дзянісу Маркіну ў 2022 годзе прапанавалі павышэнне, добрую зарплату і пераехаць у Барселону з сям'ёй з поўнай падтрымкай. Ён пагадзіўся, таму што такі шанец выпадае рэдка.
«Барселона, мора. Усё выглядала выдатна, — кажа ён. — Вялікая дапамога кампаніі ў пераездзе. Мы пагадзіліся і ў кастрычніку пераехалі з сям'ёй, сына адразу там уладзілі ў школу. Тады здавалася, што гэта ўсё добра, але цяпер прыехалі, усё роўна аднагодкі яго пайшлі наперад у навучанні. Там ён вучыўся ў пятым класе, сюды мы вярнуліся, гэта чацвёрты клас, крыху адстаў», — расказвае Дзяніс.
Паводле слоў Маркіна, «у Іспаніі не было да канца расслабленасці».
«Калі там у цябе нейкая праблема з працай, то адразу закрываюцца ўсякія ДНЖ, дакументы, і ты становішся ім не цікавы. Не ў плане, як чалавек цікавы, а ў плане, хто падаткі плаціць», — сказаў Маркін.
Акрамя таго, цэны ў Іспаніі растуць, «вялікая плынь людзей, шмат бамжоў на вуліцы, і не проста жабракоў, а вельмі страшных», «вельмі вялікая праблема з крадзяжамі», а для людзей, якія не прывыклі да ЛГБТ, будзе шок там. «Плюс яшчэ сам горад у параўнанні з Беларуссю брудны», — дадаў ён.
Кажучы пра зарплату, айцішнік сказаў, што спачатку здавалася, што там больш. «Але потым ты пачынаеш лічыць падаткі, і ўжо атрымліваецца прыкладна такі ж заробак, як мне тут плацілі. А потым, калі ўсе падлікі робіш у канцы месяца, то разумееш, што тут, нават калі атрымліваць на 30% менш зарплату, то ўсё роўна ты багацейшы.
Па сутнасці, ты туды прыязджаеш і потым не разумееш, што ты там робіш, таму што мора ўжо не так радуе. І ты разумееш, што, у прынцыпе, у Мінску можна жыць».
«Тут [у Беларусі] няма такіх мінусаў, якія там [у Іспаніі] ёсць, гэта праўда», — сказаў Дзяніс.
Прапагандысты і сам Маркін не ўдакладнілі, чаму беларусу прыйшлося вяртацца дадому праз адмысловую камісію. «Працай камісіі скарысталіся не толькі так званыя змагары, але і грамадзяне Беларусі, якіх запалохвалі тыя ж збеглыя і іх рэсурсы, а таксама еўрапейская прапаганда», — так абазначылі прапагандысты прычыны.
Цяпер чытаюць
«Людзі каментавалі, што сальманела ўвайшла ў чат». Беларус паехаў працаваць у Крэмніевую даліну — і стаў кулінарным блогерам на 28 мільярдаў праглядаў1010
Каментары
ааа.... ну тады жэсьць вядома... спачуваю... як жа там ужо выжывеш пры такіх парадках.. тут ужо хочаш ня хочаш, вяртацца - адзінае выйсьце...
пс... бедныя няшчасныя змушаныя глядзець на лгбт гішпанцы...