Ajcišnik viarnuŭsia ŭ Biełaruś praz kamisiju pa viartańni i raskazaŭ, što nie tak ź Ispanijaj
Hutarku prapahandystki Ksienii Lebiedzievaj z ajcišnikam Dzianisam Markinym, jaki raskazaŭ, što jamu nie spadabałasia ŭ Barsiełonie, pakazaŭ kanał «Biełaruś 1».
Dzianisu Markinu ŭ 2022 hodzie prapanavali pavyšeńnie, dobruju zarpłatu i pierajechać u Barsiełonu ź siamjoj z poŭnaj padtrymkaj. Jon pahadziŭsia, tamu što taki šaniec vypadaje redka.
«Barsiełona, mora. Usio vyhladała vydatna, — kaža jon. — Vialikaja dapamoha kampanii ŭ pierajeździe. My pahadzilisia i ŭ kastryčniku pierajechali ź siamjoj, syna adrazu tam uładzili ŭ škołu. Tady zdavałasia, što heta ŭsio dobra, ale ciapier pryjechali, usio roŭna adnahodki jaho pajšli napierad u navučańni. Tam jon vučyŭsia ŭ piatym kłasie, siudy my viarnulisia, heta čaćviorty kłas, krychu adstaŭ», — raskazvaje Dzianis.
Pavodle słoŭ Markina, «u Ispanii nie było da kanca rassłablenaści».
«Kali tam u ciabie niejkaja prablema z pracaj, to adrazu zakryvajucca ŭsiakija DNŽ, dakumienty, i ty stanovišsia im nie cikavy. Nie ŭ płanie, jak čałaviek cikavy, a ŭ płanie, chto padatki płacić», — skazaŭ Markin.
Akramia taho, ceny ŭ Ispanii rastuć, «vialikaja płyń ludziej, šmat bamžoŭ na vulicy, i nie prosta žabrakoŭ, a vielmi strašnych», «vielmi vialikaja prablema z kradziažami», a dla ludziej, jakija nie pryvykli da ŁHBT, budzie šok tam. «Plus jašče sam horad u paraŭnańni ź Biełaruśsiu brudny», — dadaŭ jon.
Kažučy pra zarpłatu, ajcišnik skazaŭ, što spačatku zdavałasia, što tam bolš. «Ale potym ty pačynaješ ličyć padatki, i ŭžo atrymlivajecca prykładna taki ž zarobak, jak mnie tut płacili. A potym, kali ŭsie padliki robiš u kancy miesiaca, to razumieješ, što tut, navat kali atrymlivać na 30% mienš zarpłatu, to ŭsio roŭna ty bahaciejšy.
Pa sutnaści, ty tudy pryjazdžaješ i potym nie razumieješ, što ty tam robiš, tamu što mora ŭžo nie tak raduje. I ty razumieješ, što, u pryncypie, u Minsku možna žyć».
«Tut [u Biełarusi] niama takich minusaŭ, jakija tam [u Ispanii] jość, heta praŭda», — skazaŭ Dzianis.
Prapahandysty i sam Markin nie ŭdakładnili, čamu biełarusu pryjšłosia viartacca dadomu praz admysłovuju kamisiju. «Pracaj kamisii skarystalisia nie tolki tak zvanyja zmahary, ale i hramadzianie Biełarusi, jakich zapałochvali tyja ž źbiehłyja i ich resursy, a taksama jeŭrapiejskaja prapahanda», — tak abaznačyli prapahandysty pryčyny.
Kamientary
aaa.... nu tady žeść viadoma... spačuvaju... jak ža tam užo vyžyvieš pry takich paradkach.. tut užo chočaš nia chočaš, viartacca - adzinaje vyjście...
ps... biednyja niaščasnyja zmušanyja hladzieć na łhbt hišpancy...