Praz kanflikt z eks-siabroŭkaj i mieniedžarkaj śpiavačka Lera Jaskievič budzie vymušanaja vydalić usie svaje pieśni
Lera Jaskievič raskazała fanatam, što paśla 16 lutaha jaje pieśni pierastanuć być dastupnymi na ŭsich muzyčnych placoŭkach — jana vydalić ich samastojna. Pryčynaj tamu staŭ kanflikt śpiavački ź jaje eks-mieniedžarkaj i ŭ minułym najlepšaj siabroŭkaj Hannaj Navickaj.
«Kali ja tolki pačynała vypuskać treki, Ania skazała što ich patrebna zarehistravać u Nacyjanalnym centry intelektualnaj ułasnaści. I kab usio zaroblenaje pamiž nami dzialiłasia 50 na 50 (tak było z hrašyma za vystupy, rekłamu ŭ błozie, karparatyvy i h. d.). Jana [Hanna] była aformlenaja jak aŭtar va ŭsich pieśniach, navat tam, dzie pa fakcie aŭtaram nie źjaŭlałasia. Tady ja ličyła heta spraviadlivym i nie viedała, što ŭ budučyni heta budzie vykarystoŭvacca suprać mianie, što heta sapraŭdy niasie takuju jurydyčnuju važnaść (tak, ja sama vinavataja, ja viedaju)», — prakamientavała śpiavačka.
Lera Jaskievič paznajomiłasia z Hannaj Navickaj, kali joj było 17 hadoŭ. Navickaja dapamahła Jaskievič pastupić u Biełaruski dziaržaŭny ŭniviersitet kultury i mastactvaŭ, zvaziła na ŭkrainski Ch-Faktar, mieniedžaryła jaje i była najlepšaj siabroŭkaj — dziaŭčaty navat zdymali razam kvateru. Siabroŭstva i supracoŭnictva chapiła na 10 hadoŭ, paśla jano dało raskolinu — Navickaja zajmajecca ŭ Biełarusi novym prajektam — hurtom «Barysaŭski trakt», a Jaskievič žyvie ŭ vymušanaj emihracyi ŭ Polščy, raźbirajučysia z nastupstvami raniejšaj davierlivaści.
«Mnohija svaje rašeńni ja prymała z ulikam našaha siabroŭstva, tamu što ja była čałaviekam, jakomu byŭ patrebny siabra. Našy adnosiny nie byli aformlenyja dakumientalna, tamu mnohija pracoŭnyja rečy rabilisia pa siabroŭstvie, što i paŭpłyvała na toje, što my majem ciapier».
Śpiavačka taksama raskazała, što ŭsimi sposabami namahałasia zrabić tak, kab zachavać svaje treki na muzyčnych placoŭkach. Taksama jana sprabavała adšukać kampramis z Navickaj, jaki b zadavoliŭ abodva baki, ale ničoha z hetaha nie vyjšła.
«Tamu ja pryniała rašeńnie vydalić usie svaje treki, kab vyzvalicca ad zaležnaści ad hetaha čałavieka. Prosta ścierci heta ŭsio i pačać nanoŭ. Mnie nie treba čužych hrošaj, čužych piesień. Mnie patrebnaja maja svaboda i niezaležnaść. Spadziajusia, vy zmožacie pryniać majo rašeńnie», — padsumavała jana.
Sama Hanna Navickaja na hety momant kanflikt nie kamientuje, u tym liku nie adkazvaje na pytańni žurnalistaŭ.
U budučyni Jaskievič zmoža adnavić vyklučna pieśni z apošniaha alboma «Tady. Ciapier. Paśla», vypuščanyja ŭ 2024 hodzie, i ŭsio, što vychodziła paźniej.
Ciapier čytajuć
35 maładych biełarusaŭ i biełarusak, za jakimi varta sačyć: apublikavany pieršy śpis Next 3532
Kamientary