Bieh, chadźba, siłavyja treniroŭki? Navukoŭcy adkazali, u čym sakret daŭhalećcia

Pakul IT-pradprymalnik i vienčurny inviestar Juryj Mielničak z dapamohaj štučnaha intelektu sprabuje ŭzłamać kod stareńnia, navukoŭcy z Harvarda prapanujuć značna bolš prosty recept — rehularnuju i roznabakovuju fizičnuju aktyŭnaść. Na vyniki hetaha maštabnaha daśledavańnia, jakoje achapiła 111 tysiač čałaviek i doŭžyłasia 30 hadoŭ, źviartaje ŭvahu vydańnie The Telegraph.

Na praciahu troch dziesiacihodździaŭ ekśpierty analizavali zvyčki i stan zdaroŭja dobraachvotnikaŭ. Vyniki akazalisia krasamoŭnymi: ludzi, čyje fizičnyja nahruzki byli najbolš raznastajnymi, mieli amal na 20% nižejšuju ryzyku zaŭčasnaj śmierci ad lubych pryčyn u paraŭnańni z tymi, chto abmiažoŭvaŭsia vuzkim naboram zaniatkaŭ abo vioŭ mienš aktyŭny ład žyćcia.

Siarod usich vidaŭ aktyŭnaści najlepšyja pakazčyki paasobku prademanstravała zvyčajnaja chadźba. U ludziej, jakija chadzili šmat i rehularna, ryzyka śmierci była na 17% nižejšaj. Adnak i inšyja zaniatki ŭnosili svoj važny ŭkład. Tak, tenis i skvoš źnižali ryzyku na 15%, viesłavańnie — na 14%, a bieh abo siłavyja treniroŭki — na 13%, bieh truškom palapšaŭ pakazčyki na 11%, a voś jazda na rovary tolki na 4%.

Cikava, što značna bolš efiektyŭnym za rovar akazaŭsia zvyčajny padjom pa leśvicy — hetaja štodzionnaja zvyčka zabiaśpiečvała adrazu 10‑pracentnaje źnižeńnie pahrozy zaŭčasnaj śmierci.

Pry hetym navukoŭcy ŭdakładniajuć: raznastajnaść moža ŭklučać navat johu abo pracu ŭ sadzie (naprykład, kaśbu travy).

Ale najlepšyja vyniki, jak adznačajecca ŭ daśledavańni, mieli ludzi, jakija spałučali niekalki vidaŭ fizičnaj aktyŭnaści. U hetaj hrupie ahulnaja ryzyka śmierci była nižejšaj na 19%, a ryzyka śmierci ad sardečna-sasudzistych zachvorvańniaŭ, ankałohii, chvarob dychalnaj sistemy i inšych pryčyn źnižałasia ŭ miežach ad 13% da 41%.

Navukoŭcy vyznačyli i idealnuju normu dla tych, chto choča maksimalna padoŭžyć svoj viek. Pavodle ich danych, aptymalny režym pavinien składacca jak minimum z troch roznych vidaŭ dziejnaści na tydzień.

Pry hetym daśledčyki zaŭvažyli cikavuju zakanamiernaść: karyść ad fizičnych nahruzak raście tolki da peŭnaj miažy. Kali čałaviek dasiahaje ŭzroŭniu, ekvivalentnaha dźvium hadzinam biehu abo piaci hadzinam chutkaj chadźby na tydzień, dalejšaje pavieličeńnie aktyŭnaści ŭžo nie daje istotnaha efiektu dla daŭhalećcia.

Daśledavańnie taksama pakazała, što ŭdzielniki z bolš vysokim ahulnym uzroŭniem fizičnaj aktyŭnaści byli mienš schilnymi da škodnych zvyčak kštałtu kureńnia i radziej pakutavali ad vysokaha cisku ci pavyšanaha chalesterynu. Jak praviła, takija ludzi mieli bolš nizkuju vahu, charčavalisia bolš zdarova, vybirali samyja roznyja vidy zaniatkaŭ i mahli dazvolić sabie ŭmieranaje ŭžyvańnie ałkaholu.

Choć daśledavańnie nasiła naziralny charaktar, aŭtary pracy, apublikavanaj u BMJ Medicine, upeŭnieny, što mienavita raznastajny padychod da ruchu dapamahaje arhanizmu lepš supraćstajać chraničnym zachvorvańniam i spryjaje paŭnavartasnamu padaŭžeńniu žyćcia.

• 19
• 0
• 0
• 0
• 0
• 0
• 0
• 1