VUP Biełarusi vyras u try razy mienš, čym płanavałasia. Čamu tak i čaho čakać ad 2026-ha?
Urad płanavaŭ, što rost VUP za 2025 hod składzie 4,1%, ale realnaść akazałasia daloka nie takoj.
Prahnozy nie spraŭdzilisia
U 2025 hodzie VUP skłaŭ 94,4 miljarda dalaraŭ. Pryrost — usiaho 1,3%, što ŭtraja mienš za zapłanavanaje.
«Cudu nie adbyłosia — faktyčny rost akazaŭsia značna nižejšy za prahnazavany ŭradam, ale heta było čakana, pakolki z pačatku 2025 hoda nazirałasia źnižeńnie tempaŭ rostu ekanomiki», — adznačaje ekśpiert BEROC Nastaśsia Łuzhina.
Ekanamist kaža, što kali ŭ studzieni byŭ pryrost 3,8%, to pa vynikach pieršaha paŭhodździa rost składaŭ +1,3%.
«U žniŭni-vieraśni hety pakazčyk padros, ale da kanca hoda znoŭ pačaŭ padać. U listapadzie znoŭ było +1,3%, jak i ŭ cełym pa vyniku hoda».
Čamu tady ŭziałasia płanka ŭ 4,1%?
«Mahčyma, tak adbyłosia, tamu što ŭ 2024 hodzie vyjšli na 4% rostu, voś i padumali, što ŭ 2025‑m zmohuć vyraści jašče bolš», — miarkuje Łuzhina.
Pry hetym, na dumku ekśpierta, abjektyŭnych pieradumoŭ davać taki aptymistyčny prahnoz było mała.
«Biełaruskaja ekanomika mocna zaležyć ad rasijskaj, i kali ŭ 2024‑m VUP Rasii vyras na 4,3%, to na 2025 hod takich vysokich prahnozaŭ pa RF nie było. Pryrost VUP Rasii na 2025 i 2026 hady prahnazujecca ŭ miežach 1%.
Tamu zapłanavany pryrost VUP Biełarusi na 2,8% za 2026 hod taksama vyhladaje zanadta aptymistyčnym scenarom», — ličyć ekśpiert.
Na dumku Łuzhinoj, u 2026 hodzie rasijskaja ekanomika zachavaje pavolny rost, a paśpiachovaj pieraaryjentacyi na inšyja rynki ŭ Biełarusi nie nazirajecca.
«Kali hladzieć pa krainach pa-za SND, to ekspart u nas prasiadaje, a pa SND — zastajecca pryblizna na tym ža ŭzroŭni. Tamu ŭ dadatak da składanaściaŭ na rasijskim kirunku praź nizki popyt z boku ekanomiki RF u nas dadajecca rehres u handlovych stasunkach ź inšymi krainami», — tłumačyć ekanamist.
Taksama Łuzhina źviartaje ŭvahu na toj fakt, što jašče ŭ 2024 hodzie ekanomika Biełarusi pracavała na vialikich abarotach i dla dalejšaha rostu patrebnyja byli vytvorčyja i technałahičnyja zruchi.
Čaho čakać ad 2026-ha?
Što tyčycca 2026 hoda, to, na dumku Anastasii Łuzhinoj, ciapier nie nazirajecca nijakich pieradumoŭ da taho, kab rost ekanomiki značna paskoryŭsia.
«Tamu, zychodziačy z dadzienych tendencyj, možna mierkavać, što pakazčyki rostu VUP u 2026 hodzie buduć padobnymi da letašnich. U 2025 hodzie ŭłady stavili na rost za košt inviestycyj, i toje ž budaŭnictva sapraŭdy ŭniesła svoj układ u rost VUP, ale ŭ hetym hodzie rost inviestycyj čakajecca ŭžo nie taki aktyŭny. Tamu, chutčej za ŭsio, dynamika rostu VUP, jak i letaś, budzie ŭ rajonie kala 1,5%».
Što ŭ susiedziaŭ?
U Polščy za minuły hod ekanomika vyrasła na 3,2%, pieravaliŭšy za 1 tryljon dalaraŭ, a ŭ Litvy — na 2,7%, da bolš čym 81 miljarda dalaraŭ. Abiedźvie krainy prahnazujuć padobny adsotak rostu VUP i ŭ 2026 hodzie.
«Naša Niva» — bastyjon biełaruščyny
PADTRYMAĆ
Kamientary