Žyhar i Łosik tłumačać Kaleśnikavaj, čamu jaje ideja pra pieramovy Jeŭropy z Łukašenkam — tak sabie

Biełaruskija palityki i hramadskija dziejačy ŭ emihracyi adreahavali ŭ sacsietkach na pieršaje intervju Maryi Kaleśnikavaj. Byłaja palitźniavolenaja zaklikała jeŭrapiejskich lidaraŭ šukać zbližeńnia z Alaksandram Łukašenkam.

Uładzimir Žyhar

«Cikava i absalutna pradkazalna. Chtości rastłumačyŭ by joj, što režym Łukašenki źjaŭlajecca saŭdzielnikam vajny. Abo jak tam u ich heta nazyvajecca — «SVA».

Što na terytoryi našaj krainy arhanizoŭvalisia filtracyjnyja łahiery; pavietranaja prastora, hetaksama jak i terytoryja, byli pradastaŭlenyja dla ŭvarvańnia i naniasieńnia ŭdaraŭ pa Ukrainie; ekanomika całkam militaryzavanaja i pastaŭlaje zbroju i bojeprypasy akupantam.

Chacia, viadoma ž… viadoma ž, jana ŭsio heta viedaje. Heta prosta takaja pazicyja. Dalej budzie akt pad nazvaj «susiedziaŭ nie vybirajuć» i «kali Amieryka nie hrebuje, dyk čamu my tut vykručvajemsia».

Ihar Łosik

«Pieramovy z Łukašenkam — heta, viadoma, cudoŭna, ale kolki ich užo było za apošnija 30 hadoŭ? Praz paru hadoŭ paśla «paciapleńniaŭ» jon znoŭ razryvaje ŭsie adnosiny i pačynaje represii. I z kožnym razam bolš žorstkija.

U pačatku 2020 hoda jon abdymaŭsia z Pampiea, a ŭžo praz šeść miesiacaŭ ja z kamiery čuŭ vybuchi hranat i čerhi z aŭtamataŭ. Para ŭžo ŭśviadomić, što jon razumieje tolki siłu. A hetyja «paciapleńni» — časovyja, jany ni da čaho nie viaduć i tolki ŭmacoŭvajuć Łukašenku ŭ dumcy, što jeŭrapiejcy słabyja i što jon u luby momant moža znoŭ ich kinuć, i jamu za heta ničoha nie budzie — pad jaho prahnucca.

Jaho cikavić tolki ŭłasnaje eha, i jon hatovy abmianiać tysiaču źniavolenych navat nie na źniaćcie sankcyj i nie na naładžvańnie adnosin ź Jeŭrasajuzam. Jamu heta niecikava. Na pieramovach z amierykancami jon vystaŭlaŭ samuju banalnuju prośbu, pry vykanańni jakoj hatovy vypuścić usich palityčnych. Na žal, ja nie mahu raskazać, jakuju mienavita. Ale vy zusim nie ździviciesia, kali heta adbudziecca».

Andrej Stryžak

«Čamu Jeŭrasajuz nie viadzie pieramovy ź Minskam?

Adkaz na pytańnie, što turbuje Maryju Kaleśnikavu, vielmi prosty: bo aficyjny Minsk jość chaŭruśnikam impierskaj Rasii, što viadzie zachopnickuju vajnu suprać Ukrainy, što baronić ahulnajeŭrapiejskija intaresy.

I čym słabiejšyja ahulnyja pazicyi hetaha chaŭrusa (sankcyi, abmiežavańni, źnižeńnie tavarazvarotu i hetak dalej), tym mienš u ahresaraŭ srodkaŭ dla viadzieńnia vajny, tym daražej jana im abychodzicca.

I čym daŭžej Ukraina baronić siabie, tym paźniej Maryi daviadziecca chavacca ŭ bambaschoviščy pad Bierlinam».

Anatol Labiedźka

«Maša, dla taho kab zrazumieć, čamu «Jeŭropa nie raspačała pieramovy z Łukašenkam raniej za ZŠA», patrebna, pa-pieršaje, viedać historyju adnosinaŭ Brusela i Minska. Pa-druhoje, razumieć staŭleńnie jeŭrapiejcaŭ da rasijskaj ahresii va Ukrainie. I treciaje, viedać pryrodu i sutnaść biełaruskaha režymu. 

Kali hetaha niama, to [kanstruktar] «Leha» nie składvajecca».

• 67
• 5
• 1
• 3
• 0
• 0
• 0
• 0