«Siadzieŭ užo 50 sutak, zatrymali jaho dziaŭčynu i brata». Sukamiernik raskazaŭ pra radyjoamatara, aryštavanaha za zdradu dziaržavie

Michaś paznajomiŭsia ź Mikitam, kali adbyvaŭ sutki pa palityčnym artykule ŭ Centry izalacyi pravaparušalnikaŭ na Akreścina. Heta było ŭ vieraśni 2024 hoda:

«Mianie zatrymali 28 žniŭnia, praź niekalki dzion apynuŭsia ŭ «palityčnaj» kamiery CIPa. Jon tam užo siadzieŭ. Tady ludziej tam było nie nadta šmat, mo 4‑5 čałaviek. Było bolš łajtova — jany tam i časopisy mieli, i płastykavyja kubki dla vady. Ale paśla pačali ŭ tuju kamieru raźmiarkoŭvajuć bolš ludziej».

Michaś kaža, što maksimalna ŭ toj kamiery padčas jaho sutak było 23 čałavieki adnačasova. Tady, viadoma, umovy ŭ kamiery zrabilisia bolš žorstkimi.

Na toj čas, uspaminaje Michaś, Mikita siadzieŭ u CIPie ŭžo kala 50 dzion. Atrymlivajecca, Mikitu zatrymali niedzie ŭ siaredzinie lipienia 2024-ha.

Potym inšyja viaźni daviedalisia, što za kraty kinuli nie tolki Mikitu, ale i jahonuju dziaŭčynu, i małodšaha brata:

«Spačatku jon nie kazaŭ, što jaho presujuć kadebešniki. Raskazvaŭ pra siabie ahulnymi słovami — maŭlaŭ, ja jak usie, zabrali za repost i znajšli bieł-čyrvona-bieły ściah u haražy. Ale chłopcy, jakija siadzieli ŭ inšych kamierach ź jaho małodšym bratam, potym usio zrazumieli. Toj brat patłumačyŭ, što ich trymajuć za radyjoamatarstva.

Byŭ dzień, kali jaho ranicaj zabrali na śledčyja dziejańni i viarnuli tolki ŭviečary, my ŭžo dumali, što jaho tam ledź nie katavali ŭvieś dzień. Jon pra heta šmat nie raskazvaŭ, bo, mahčyma, jaho zapužvali. Tolki kazaŭ, što jaho vazili ŭ haraž, i heta było časta — mahčyma, prasili pakazać, jak jon tam pracavaŭ z radyjo».

Michaś miarkuje, što dziaŭčyna i brat Mikity trapili za kraty jak zakładniki, kab možna było cisnuć na samoha Mikitu. Surazmoŭca ŭspaminaje, što ich zatrymali paźniej za chłopca — vierahodna, jon nie pahadžaŭsia raspavieści toje, što ad jaho chacieli pačuć.

Michaś kaža, što pravioŭ ź Mikitam u kamiery kala 10 dzion:

«Jon kazaŭ, što sieŭ u červieni i byŭ paholeny, a kali ja jaho bačyŭ, u jaho była daŭžeznaja barada. My žartavali — maŭlaŭ, ty jašče i pałysieŭ, pakul tut siadzieŭ? Škadavaŭ, što za toje leta tak i nie pakupaŭsia na Minskim mory».

Mikitu tym časam dadavali ŭsio novyja sutki aryštu. Čarhovyja ź ich skončylisia, kali Michaś siadzieŭ ź im u adnoj kamiery. Zdavałasia, što Mikitu vypuścili, ale ŭviečary jaho znoŭ viarnuli ŭ kamieru — raskazaŭ, što dali jašče 15 sutak. Razam z raniejšymi terminami atrymlivałasia, što na Akreścina Mikita praviadzie jak minimum 65 sutak.

Toje, što Kraśko nakidvajuć sutki za sutkami, prymušała chvalavacca šmat kaho ź jaho sukamiernikaŭ — maŭlaŭ, i im mohuć dać novyja sutki. Uražvała i toje, kolki času Mikita ŭžo za kratami:

«Ujavicie, nijakich špacyraŭ, nijakich dušaŭ, i chłopiec tak siadzić 50 sutak. Heta sapraŭdnaje katavańnie, možna tak z hłuzdu źjechać.

U nas chadzili čutki — maŭlaŭ, im inkryminujuć, byccam jany prasłuchoŭvali pieramovy KDB i pradavali ich SBU. Ale chutčej za ŭsio, heta toje, čym pužali na dopytach małodšaha brata Mikity».

Siužet pra «radyjoamataraŭ-špijonaŭ» vyjšaŭ na STB 15 studzienia 2026 hoda. U im raskazvałasia, nibyta pad vyhladam supołak radyjoamataraŭ dziejničała struktura dla pierachopu sakretnaj infarmacyi.

Usiaho pa spravie zatrymana siem čałaviek, im inkryminujuć špijanaž (art. 358 KK) i zdradu dziaržavie (art. 356 KK).

• 0
• 0
• 0
• 5
• 1
• 4
• 7
• 0