Što viadoma pra zatrymanych radyjoamataraŭ, jakim pahražaje až da rasstrełu

Pieršamu z pakazanych zatrymanych, Mikitu Kraśko, 35 hadoŭ. Mužčyna raniej pracavaŭ kurjeram, zajmaŭsia prodažam techniki. Apošnim viadomym miescam jaho pracy była budaŭničaja śfiera.

Pavialičyć

Chobi Mikity — heta radyjosuviaź i technałohii ŭ pryncypie. U sacsietkach jon dzialiŭsia fotazdymkami z padarožžaŭ. Cikavicca spartyŭnymi aŭtamabilami i rovarami.

Jahony radyjopazyŭny — EW1AEH.

Pra druhoha zatrymanaha, Andreja Repiecija, viadoma niašmat. Jamu kala 50 hadoŭ, minčuk. Paśla škoły słužyŭ u vajskovaj čaści №14356 pa ramoncie radyjołakacyjnaj i artyleryjskaj zbroi.

Pavialičyć

Jahony kolišni radyjopazyŭny — EW1ABT. Miarkujučy pa starych dyskusijach, jon lubić techniku i aŭto, pisaŭ pra suviaznoje abstalavańnie i elektroniku. Andrej raniej byŭ aktyŭny na roznych forumach radyjoamataraŭ. Viadoma, što davoli niadaŭna jon pracavaŭ kurjeram u pryvatnaj kampanii, jakaja pradavała zapčastki dla aŭto.

Viačasłaŭ Biańko — 41‑hadovy minčuk. U videa jaho nie pakazvajuć, a tolki cytujuć jahonyja słovy.

Pavialičyć

Z 2005 da 2018 hoda jon mieŭ IP. Paśla hetaha rearhanizavaŭ jaho ŭ inšuju formu haspadarańnia. Miarkujučy z usiaho, dziejnaść Biańko źviazanaja z technikaj.

Biańko ŭvohule amatar techniki. U sacsietkach i čatach jon šmat pisaŭ pra jaje: elektrakary (u jaho samoha — BYD Song Plus Champion Edition), smartfony, a taksama temy, źviazanyja z radyjosuviaźziu i elektronikaj. Jon lubić fatahrafavać, vybiracca na pryrodu i padarožničać. Jahony radyjopazyŭny — EW1ACE.

U Viačasłava žonka i dvoje małych dziaciej, a taksama sabaka, ź jakim jon lubić špacyravać u parku. Ź dziećmi jany razam lubiać padarožničać na rovarach.

Pra što sam siužet?

Siužet pra «radyjoamataraŭ-špijonaŭ» źjaviŭsia ŭ efiry STB 15 studzienia 2026 hoda. U im viadoŭca Raman Pratasievič raskazvaje, što pad vyhladam supołak radyjoamataraŭ nibyta dziejničała struktura pierachopu sakretnaj infarmacyi.

Niekatorym aryštavanym inkryminujuć špijanaž (artykuł 358 Kryminalnaha kodeksa) i zdradu dziaržavie (artykuł 356). Apošniaje praduhledžvaje pakarańnie až da rasstrełu.

U siužecie STB manitorynh dastupnych u efiry častot traktujecca jak «vyciahvańnie dziaržaŭnych sakretaŭ» i zamach na biaśpieku Łukašenki. Publikacyja zapisaŭ u internecie padajecca jak «pieradača infarmacyjnaha suvierenitetu» ŭ čužyja ruki. Pry hetym suviaź ludziej u siužecie z zamiežnymi vyviedkami nijak nie dakazvajecca.

Zajaŭlajecca ab likvidacyi «bujnoj sietki» z bolš jak 50 čałaviek. Udakładniajecca, što aryštavanych siamiora.

Raniej 24 śniežnia 2025 hoda staršynia KDB Ivan Cierciel zajaviŭ pra likvidacyju «sietki», jakaja prasłuchoŭvała piłotaŭ.

Nibyta stavilisia techničnyja srodki, što dazvalali prasłuchoŭvać pieramovy piłotaŭ jak cyvilnaj, tak i vajskovaj avijacyi. Taksama, śćviardžaŭ Cierciel, vioŭsia manitorynh vakoł režymnych abjektaŭ.

• 1
• 4
• 3
• 38
• 1
• 7
• 37
• 1