Ганна Канапацкая на пасяджэнні ЦВК выступіла з доўгай прамовай, павіншавала пераможцаў і выказала папрок апанентам Лукашэнкі, якія знаходзяцца за мяжой, заўважыў Reform.news.
«Хачу пачаць сваё выступленне з таго, каб звярнуцца, перш за ўсё, да тых, хто крытыкаваў маё рашэнне ўзяць удзел у прэзідэнцкай кампаніі. Такія былі.
Я з’яўляюся апазіцыяй дзеючай улады і даўнім паслядоўным крытыкам як палітыкі цяперашняга кіраўніка дзяржавы, так і курса, які праводзіцца ў краіне. І я ўдзельнічала ў гэтай кампаніі для таго, каб даць магчымасць грамадзянам, якія маюць альтэрнатыўныя погляды, выказаць іх і паказаць, што ў Беларусі ёсць шмат людзей, якія лічаць, што краіна можа развівацца па-іншаму, і яны гатовы зрабіць іншы выбар.
Паказаць, што гэты выбар можа быць цывілізаваным, выключна ў межах закона і правіл канкурэнтнай палітычнай барацьбы. Я ўпэўненая ў тым, што я і мая каманда цалкам прадэманстравалі гэта. Так, нас аказалася менш. Мы не змаглі перамагчы сёння, але гэта зусім не азначае, што за намі няма будучыні. І дзеля гэтай будучыні я буду працаваць далей», — заявіла яна.
Канапацкая назвала сацыяльна-палітычную сітуацыю ў краіне стабільнай, але адзначыла «долю сацыяльнай напружанасці».
«Пры ўсёй радасці перамогі прыхільнікаў дзеючай улады, якую я, безумоўна, віншую, у мяне няма адчування свята, пра якое сёння ўсе гавораць. Кіраўнік дзяржавы не раз казаў: «Давайце перагорнем старонку 2020 года». Але пакуль, на жаль, у мяне складаецца адчуванне, што з абодвух бакоў перамагаюць радыкалы, якія штурхаюць нас да далейшага расколу. Адны — гэта тыя, хто выводзіць людзей на правакацыйныя акцыі аб непрыняцці вынікаў выбараў і падстаўляе іх пад крымінальны пераслед. Другія — гэта тыя, хто сёння апранаецца ў рызы інтэграцыйнага ахоўніцтва, не жадае праявіць мудрасць, міласэрнасць, а, магчыма, нават і дараванне», — дадала яна.
Паводле Канапацкай, кампанія прайшла на высокім узроўні, а яе камандзе ўдалося аб’яднаць людзей, у тым ліку тых, хто знаходзіцца за межамі краіны.
«Гэта прыклад таго, што такую пазіцыю можна выкарыстаць для аптымізацыі і паскарэння добраахвотнага вяртання ў Беларусь людзей, якія пакінулі яе па розных прычынах, але не былі ўцягнутыя ў экстрэмісцкую дзейнасць. У тым ліку ў арганізацыі прававых падыходаў спецыяльнай камісіі, якая працуе і якая назапасіла за гэтыя гады значны вопыт і практыку», — сказала яна.
Канапацкая заявіла, што ў яе ёсць пытанні і заўвагі, якія яна данясе да ЦВК у працоўным парадку. Пры гэтым, паводле яе слоў, кампанія прайшла без сур’ёзных узрушэнняў.
«Адчувалася ўпэўненая, цвёрдая мужчынская рука новага кіраўніка», — зрабіла Канапацкая камплімент старшыні камісіі Ігару Карпенку.
У завяршэнне былая кандыдатка заявіла, што яна канструктыўная і гатовая да супрацоўніцтва, да чаго таксама гатовыя члены яе каманды.
Цяпер чытаюць
«Шкада, што людзі мяне лічаць такім ідыётам». Дзядок расказаў, як яго змаглі высачыць пасля пяці месяцаў падполля4
Каментары