Hanna Kanapackaja na pasiadžeńni CVK vystupiła z doŭhaj pramovaj, pavinšavała pieramožcaŭ i vykazała paprok apanientam Łukašenki, jakija znachodziacca za miažoj, zaŭvažyŭ Reform.news.
«Chaču pačać svajo vystupleńnie z taho, kab źviarnucca, pierš za ŭsio, da tych, chto krytykavaŭ majo rašeńnie ŭziać udzieł u prezidenckaj kampanii. Takija byli.
Ja źjaŭlajusia apazicyjaj dziejučaj ułady i daŭnim paśladoŭnym krytykam jak palityki ciapierašniaha kiraŭnika dziaržavy, tak i kursa, jaki pravodzicca ŭ krainie. I ja ŭdzielničała ŭ hetaj kampanii dla taho, kab dać mahčymaść hramadzianam, jakija majuć alternatyŭnyja pohlady, vykazać ich i pakazać, što ŭ Biełarusi jość šmat ludziej, jakija ličać, što kraina moža raźvivacca pa-inšamu, i jany hatovy zrabić inšy vybar.
Pakazać, što hety vybar moža być cyvilizavanym, vyklučna ŭ miežach zakona i pravił kankurentnaj palityčnaj baraćby. Ja ŭpeŭnienaja ŭ tym, što ja i maja kamanda całkam prademanstravali heta. Tak, nas akazałasia mienš. My nie zmahli pieramahčy siońnia, ale heta zusim nie aznačaje, što za nami niama budučyni. I dziela hetaj budučyni ja budu pracavać dalej», — zajaviła jana.
Kanapackaja nazvała sacyjalna-palityčnuju situacyju ŭ krainie stabilnaj, ale adznačyła «dolu sacyjalnaj napružanaści».
«Pry ŭsioj radaści pieramohi prychilnikaŭ dziejučaj ułady, jakuju ja, biezumoŭna, vinšuju, u mianie niama adčuvańnia śviata, pra jakoje siońnia ŭsie havorać. Kiraŭnik dziaržavy nie raz kazaŭ: «Davajcie pierahorniem staronku 2020 hoda». Ale pakul, na žal, u mianie składajecca adčuvańnie, što z abodvuch bakoŭ pieramahajuć radykały, jakija šturchajuć nas da dalejšaha raskołu. Adny — heta tyja, chto vyvodzić ludziej na pravakacyjnyja akcyi ab niepryniaćci vynikaŭ vybaraŭ i padstaŭlaje ich pad kryminalny pieraśled. Druhija — heta tyja, chto siońnia apranajecca ŭ ryzy intehracyjnaha achoŭnictva, nie žadaje prajavić mudraść, miłasernaść, a, mahčyma, navat i daravańnie», — dadała jana.
Pavodle Kanapackaj, kampanija prajšła na vysokim uzroŭni, a jaje kamandzie ŭdałosia abjadnać ludziej, u tym liku tych, chto znachodzicca za miežami krainy.
«Heta prykład taho, što takuju pazicyju možna vykarystać dla aptymizacyi i paskareńnia dobraachvotnaha viartańnia ŭ Biełaruś ludziej, jakija pakinuli jaje pa roznych pryčynach, ale nie byli ŭciahnutyja ŭ ekstremisckuju dziejnaść. U tym liku ŭ arhanizacyi pravavych padychodaŭ śpiecyjalnaj kamisii, jakaja pracuje i jakaja nazapasiła za hetyja hady značny vopyt i praktyku», — skazała jana.
Kanapackaja zajaviła, što ŭ jaje jość pytańni i zaŭvahi, jakija jana daniasie da CVK u pracoŭnym paradku. Pry hetym, pavodle jaje słoŭ, kampanija prajšła biez surjoznych uzrušeńniaŭ.
«Adčuvałasia ŭpeŭnienaja, ćviordaja mužčynskaja ruka novaha kiraŭnika», — zrabiła Kanapackaja kamplimient staršyni kamisii Iharu Karpienku.
U zaviaršeńnie byłaja kandydatka zajaviła, što jana kanstruktyŭnaja i hatovaja da supracoŭnictva, da čaho taksama hatovyja členy jaje kamandy.
Jak Jadźvihin Š. smažyŭ u redakcyi skvarki i čamu łožak Kupały nahadvaŭ dochłaha viarbluda. Ivulin i Astapienia źniali zachaplalny film pra «Našu Nivu»88
Kamientary