Ціханоўская: Перапрызначэнне Лукашэнкі не мае ніякага ўплыву на маю далейшую працу

Прэзідэнтка-элект і лідар беларускіх дэмакратычных сіл Святлана Ціханоўская дала інтэрв'ю «Украінскай праўдзе». Тры гады назад, у 2021 годзе, размова з журналістам адбывалася на рускай мове. Цяпер пытанні ёй задавалі на ўкраінскай, а яна адказвала на беларускай.

Журналіст пацікавіўся, як змяніліся погляды дэмакратычных сіл Беларусі на Расію.

«Мы заўсёды ведалі, што Расія — вораг незалежнасці Беларусі. Але калі адбыліся нашы пратэсты ў 2020 годзе, у нас не было магчымасці яшчэ змагацца і з Расіяй, скажам так. Тады мы былі вельмі дыпламатычныя, асцярожныя ў выказваннях супраць Расіі, бо бачылі, што Расія падтрымлівае Лукашэнку, і нам трэба было хаця б з Лукашэнкам справіцца.

Але, калі мы ўбачылі Бучу, Ірпень, Марыупаль, гэтую вайну, то, канечне, ужо тут не да дыпламатыі. Трэба называць рэчы сваімі імёнамі».

Як і чым павінна скончыцца вайна?

«Вайна павінна скончыцца, і яна скончыцца перамогай Украіны. Бо толькі тады будзе гэты справядлівы мір, пра які ўсе кажуць. Недастаткова для гэтага робяць, канечне. Але толькі так я бачу нашу будучыню. Бо перамога Украіны важная не толькі для Украіны, не толькі для Беларусі, але і для ўсёй Еўропы, для ўсяго дэмакратычнага свету.

Таму свет павінен даць усё магчымае і немагчымае Украіне для перамогі», — лічыць Святлана Ціханоўская.

— Што такое перамога? — удакладніў журналіст.

— Перамога, гэта калі расійскія войскі выйдуць з усёй тэрыторыі Украіны і больш не будуць спакушацца на ваш суверэнітэт, вашу тэрытарыяльную цэласнасць, — адказала Ціханоўская.

Пра адносіны з украінскай уладаю

Лідар дэмакратычных сілаў Беларусі, ацэньваючы стасункі з уладамі Украіны, заўважыла:

«З пачатку вайны ў мяне была такая ўстаноўка: каб не нашкодзіць Украіне. І калі я разумела, што ёсць нейкія перашкоды для больш афіцыйных адносін паміж украінскімі ўладамі і дэмакратычнымі сіламі Беларусі, — [значыць,] так і трэба. Не трэба «пушыць», не трэба фарсіраваць, бо трэба дапамагчы Украіне. Калі вам гэта выгадна, мы тут… Ведаеце, мы не настойваем. Мы не настойваем, каб сустракацца з прэзідэнтам ці іншымі прадстаўнікамі [афіцыйных уладаў].

У нас ёсць камунікацыя. Мы сустракаемся з міністэрствам замежных спраў, з дарадцамі спадара прэзідэнта Зяленскага. І нам гэтага хопіць. Нам трэба разумець адзін аднаго, разумець, чаго мы хочам, і тлумачыць і яшчэ раз тлумачыць, што Лукашэнку нельга давяраць, што ён заўжды падмане. Колькі разоў ужо гэта было. І калі людзі думаюць, што, можа, у нейкі момант Лукашэнка пяройдзе на бок Украіны… — гэтага ніколі не будзе».

Хто такая Святлана Ціханоўская?

Гэта пытанне выклікала дастаткова працяглую паўзу. «Ведаеце, цяжка сказаць, — заўважыла Ціханоўская і патлумачыла:

Перш за ўсё — я жонка палітвязня. Мой муж у турме больш за чатыры гады. Так лёс склаўся, што я стала лідаркай дэмакратычнага руху Беларусі, што я абраны прэзідэнт Беларусі. Я мама дваіх дзетак. То-бок у мяне шмат роляў.

Але, канечне, на мне вялікая адказнасць за лёс краіны, за беларусаў. Але я моцная настолькі, наколькі моцны беларускі народ. Я заўжды кажу, што адзін чалавек не можа нічога зрабіць. Я раблю, што магу, на міжнароднай арэне. Мы будуем адзінства ў дэмакратычным руху. Але гэта адказнасць кожнага чалавека, кожнага беларуса — рабіць наш рух, нашу незалежную краіну мацнейшай».

Ці скончыцца роля Святланы Ціханоўскай з правядзеннем выбараў у 2025 годзе?

«У 2020 годзе я атрымала мандат ад беларусаў да правядзення сумленных, свабодных выбараў у Беларусі. І я павінна вытрываць да гэтай магчымасці. Тое, што робіць Лукашэнка, не легітымізуе яго ні ў вачах беларусаў, ні ў вачах нашых заходніх партнёраў. І я спадзяюся, ні ў вачах украінцаў таксама.

Таму гэта перапрызначэнне Лукашэнкі не мае ніякага ўплыву на маю далейшую працу. Мы як працавалі, так і будзем працягваць аслабляць рэжым Лукашэнкі. Магчыма, аслабляць і рэжым Пуціна таксама. І ўмацоўваць усё беларускае».

• 21
• 0
• 3
• 1
• 0
• 0
• 0
• 2