Тараматы ў беларускай сталіцы зʼявіліся ў лістападзе 2023 года. І ў аператараў, здавалася, былі вялікія планы па ўстаноўцы такіх прылад у магазінах. Але цяпер іх прыбіраюць, піша Tochka.by.
Некалькі месяцаў таму выданне тэставала ў сталіцы цікавую навінку — фандамат па прыёме бляшаных слоікаў і пластыкавых бутэлек.
Разумная тэхніка прапаноўвала спампаваць мабільны дадатак у тэлефоне пад назвай Ecoplatform і праз яго атрымліваць бонусы ў розных крамах замест здадзенай тары.
Больш за тое, у кампаніі «А-100 Дэвелапмент», якая фінансавала ўстаноўку апаратаў, паведамлялі, што ў бліжэйшыя месяцы колькасць фандаматаў у Мінску дасягне 50, а да канца 2024 года сетка разрасцецца да 250 аўтаматаў.
Гаварылася, што ўся сабраная тара будзе паступаць наўпрост вытворцам. Яе хацелі выкарыстоўваць для выпуску новых бутэлек, кантэйнераў і ўпаковак.
ПЭТ-тара пасля перапрацоўкі таксама набывае новае жыццё ў якасці тэкстылю, мэблі і прадметаў для дома ці саду.
Не прайшло і года
Судзячы па ўсім, з поўнай рэалізацыяй ідэі нешта пайшло не так. Чытач партала Tochka.by даслаў у рэдакцыю фатаграфіі, зробленыя ў ГЦ «Караван».
На здымку — адключаны апарат па прыёме тары. Акрамя таго, на ім размешчана апавяшчэнне ад адміністрацыі гандлёвага цэнтра: «Фандамат выйшаў са строю і будзе накіраваны на рамонт. Усталёўвацца пасля рамонту ён не будзе».
Іншы чытач даслаў вось такое паведамленне: «Прыйшло апавяшчэнне на Ecoplatform, што зараз тараматы прымаюць толькі пластыкавыя бутэлькі. Шкада, вядома», — напісаў ён.
Гэта значыць бляшаныя банкі здаць больш не атрымаецца.
Партал Tochka.by звярнуўся ў кампанію «А-100 Дэвелапмент», каб растлумачыць сітуацыю з тараматамі ў Мінску. Як толькі атрымае каментар — абяцае апублікаваць.
Калі ўвядуць дэпазітную сістэму
Тарааматы — гэта, па сутнасці, яшчэ адна спроба ўвасобіць у жыццё дэпазітную сістэму збору тары.
Масавага ж укаранення такой сістэмы на дзяржузроўні пакуль не будзе.
Як раней паведамілі на прадпрыемстве «Аператар другасных матэрыяльных рэсурсаў», цэнтралізаванае ўкараненне дэпазітна-закладной сістэмы вырашана адкласці.
Па словах прадстаўніка прадпрыемства, гэта занадта затратна. Сістэма прадугледжвае ўзаемадзеянне многіх субʼектаў: вытворцаў тавараў і тары, імпарцёраў, гандлёвых сетак і цэнтралізаванага органа, які б каардынаваў гэту дзейнасць.
Днямі таксама стала вядома, што папулярныя ў Еўропе паштаматы аказаліся незапатрабаваныя ў Беларусі.
Цяпер чытаюць
Чым займаліся супрацоўнікі Акрэсціна да таго, як узначаліць месца катаванняў беларусаў?5
Каментары
А алюмініевыя бляшанкі перасталі прымаць, думаю, з тае прычыны, што ў іх беларусы шмат акуркаў і іншага выкідаюць. Пры мне супрацоўнікі Суседзяў па сметніцах збіралі тару і здавалі. Падазраю, што значная частка таго, што здаюць у гэтыя апараты, — выцягнутая са сметнікаў і не падрыхтаваная па інструкцыі. Канешне, так і зламаць апарат можна, калі здаваць абы-што. І смярдзіць ад фандаматаў моцна, хаця ў інструкцыі напісана мыць тару перад здачай. Не ўмеюць беларусы выконваць простыя правілы, калі іх не кантралююць.