Сустрэча адбылася ў Палаца Кіджы — афіцыйнай рэзідэнцыі італьянскіх прэм’ер-міністраў. Прэм’ерка Італіі запэўніла Святлану Ціханоўскую ў поўнай падтрымцы беларускага дэмакратычнага руху, паведамляе прэс-служба нацыянальнага лідара Беларусі.
Падчас перамоў абмеркавалі стратэгію па вызваленні палітычных вязняў, абароне беларускай незалежнасці і ізаляцыі рэжыму Лукашэнкі.
Святлана Ціханоўская падзякавала Італіі за падтрымку рэпрэсаваных, за выдачу віз, за тое, што Італія раздзяляе рэжым і беларусаў і не прызнае Лукашэнку прэзідэнтам.
Таксама быў абмеркаваны механізм прыцягнення рэжыму да адказнасці за злачынствы супраць чалавечнасці і за выкраданне ўкраінскіх дзяцей. Ціханоўская адзначыла, што надзвычай важна, каб Беларусь была згаданая ў дыскусіях падчас саміту NATO і ў выніковай дэкларацыі.
«Гэта была важная сустрэча. Лідарка Італіі будзе падымаць пытанне Беларусі на міжнароднай арэне. Я бачу яе рашучасць, бачу, што яна выдатна разумее нашу сітуацыю і гатовая дапамагаць не толькі на словах, але і справамі. Сёння мы займелі яшчэ адзін моцны голас у падтрымку свабоднай і незалежнай Беларусі», — сказала Святлана Ціханоўская.
Каментары