Расія замяніла прыярытэт захопу Бахмута на падрыхтоўку да контрнаступу — ISW
Міністэрства абароны Расіі, падобна, адмовілася ад наступу на Бахмут на карысць падрыхтоўкі да адбіцця чаканага ўкраінскага контрнаступу, паставіўшы ПВК «Вагнер» і яго спонсара Яўгена Прыгожына ў складанае становішча, піша Інстытут вывучэння вайны (ISW).
Упартасць ПВК «Вагнер» у Бахмуце несумяшчальная з агульным запаволеннем тэмпаў расійскіх наступальных аперацый у іншых частках Украіны. Калі не лічыць абмежаваных лакальных нападаў у раёне Крамянной і пад Данецкам, расійскія сілы практычна спынілі наступальныя аперацыі на ўсім тэатры ваенных дзеянняў, што, магчыма, азначае пераход да абароны, гаворыцца ў дакладзе інстытута.
Для расійскага камандавання было б апраўданым рашэннем эканоміць і назапашваць боепрыпасы і іншыя расходныя матэрыялы, каб падрыхтавацца да ўкраінскага наступу, і адчайныя заявы Прыгожына ўказваюць на тое, што Мінабароны Расіі, імаверна, так і робіць, лічаць аўтары даклада.
Пакуль незразумела, ці сапраўды Прыгожын мае намер пакінуць Бахмут 10 мая, ці ён зрабіў гэтую заяву ў апошняй спробе заручыцца падтрымкай расійскага Генштаба. Калі вагнераўцы ўсё ж такі сыдуць, ім спатрэбіцца дапамога Мінабароны для прыкрыцця і палягчэння адступлення. Акрамя таго, расійскім вайскоўцам не хапае рэзерваў для замяшчэння пазіцый, якія ПВК «Вагнер» можа пакінуць у Бахмуце.
Вялізныя страты, панесеныя ПВК «Вагнер» у Бахмуце дзеля тактычных поспехаў, а таксама пераход расійскіх Узброеных сіл да больш асцярожных дзеянняў, па ўсёй бачнасці, адкрываюць украінскім войскам магчымасці для паспяховых контратак на розных участках фронту. Некаторыя з гэтых магчымасцяў яны ўжо выкарыстоўваюць, хоць ISW не лічыць іх абавязковай часткай чаканага агульнага наступу УСУ.
Каментары