З'явілася магчымасць праверыць аўтамабіль на наяўнасць ДТЗ на тэрыторыі Беларусі. Даведаліся, як гэта працуе
З 1 красавіка з'явілася магчымасць праверыць, ці былі страхавыя выплаты па аўтамабілі. Што паказвае сэрвіс?
Аўтамабільны партал av.by у сваім сэрвісе па праверцы гісторыі аўто па VIN-нумары дадаў магчымасць атрымаць інфармацыю аб ДТЗ на тэрыторыі Беларусі. Каб гэта зрабіць, дастаткова ведаць VIN-нумар аўтамабіля. Справаздача платная — каштуе каля 11 рублёў. Замовіць яе можна па спасылцы.
Заўважна, што інфармацыя пра наяўнасць страхавых выплат у Беларусі атрымліваецца з дапамогай расійскага сэрвісу «Автотека».
Пра расійскі след у справаздчы кажа і той факт, што валюта разліку пазначаная як RUR.
Прадаўцы справаздач таксама звяртаюць увагу на тое, што калі ДТЗ адбылося да 1 ліпеня 2016 года, то сумы будуць пазначаныя ў недэнамінаваных рублях.
Таксама важна адзначыць, што адсутнасць аўтамабіля ў базе не гарантуе таго, што ён не ўдзельнічаў у ДТЗ на тэрыторыі Беларусі. База адлюстроўвае не сам факт наяўнасці ДТЗ, а факт разліку кошту рамонтных работ. То-бок гаворка ідзе толькі пра тыя выпадкі, калі чалавек атрымліваў кампенсацыю ад страхавой кампаніі.
Таксама ўзнікаюць пытанні да напаўнення базы. Напрыклад, правераны намі аўтамабіль апроч гэтага ДТЗ яшчэ двойчы атрымліваў выплаты ад страхавой. Абодва здарэнні былі дробнымі і афармленне адбывалася праз еўрапратакол без удзелу ДАІ. Інфармацыя пра выплаты па гэтых двух выпадках у справаздачы не адлюстроўваецца.
Дзеля справядлівасці адзначым, што платныя еўрапейскія сэрвісы таксама не гарантуюць на 100% таго, што ў справаздачы будзе мецца абсалютна ўся інфармацыя пра аўто.
Тым не менш, з'яўленне такой магчымасці можна назваць чарговым крокам да цывілізаванасці беларускага аўтамабільнага рынку.
Нагадаем, што паспрабаваць праверыць прабег аўтамабіля, які ўжо не першы год ездзіць па Беларусі, можна з дапамогай Адзінага партала электронных паслуг па гэтай спасылцы. Справаздача таксама платная.
Як праверыць па VIN-нумары аўтамабіль, прывезены з іншых краін Еўропы і ЗША можна прачытаць тут.
Пасля перасячэння беларускай мяжы машыны з Еўропы «губляюць» дзясяткі тысяч кіламетраў. Як прадаўцы падманваюць з прабегам аўто
«Дастэры» за 30 000 даляраў, «Весты» за 16 500. Якія новыя аўто прапануюць дылеры
Цяпер чытаюць
«Спасибо, Лена! Продолжайте вести наблюдение». Афіцэр, які пісаў Харысавай, пасвіўся ў чатах палітэміграцыі, а некаторым дзяўчатам нават прапаноўваў абмяняцца нюдсамі21
Каментары