16 sakavika — premjera «Ludziej na bałocie» ŭ Kupałaŭskim

16 sakavika na scenie Pałaca kultury prafsajuzaŭ adbudziecca premjera śpiektakla «Ludzi na bałocie» Nacyjanalnaha akademičnaha teatra imia Janki Kupały.

Aŭtar insceniroŭki i režysior-pastanoŭščyk— Alaksandr Harcujeŭ, mastak-pastanoŭščyk — Ihar Anisienka, kampazitar — Dźmitryj Fryha.

U asnovu śpiektakla pakładzieny pieršyja dźvie knihi «Paleskaj chroniki» Ivana Mieleža — «Ludzi na bałocie» i «Podych navalnicy».

— Mnie zdajecca, što heta adzin z najlepšych uzoraŭ litaratury, — ličyć režysior Alaksandr Harcujeŭ. — Čas napisańnia ramanaŭ — 60-ja hady. Čas dziejańnia — jašče dalejšy. Ale apisanyja tam padziei nahadvajuć mnie 90-ja hady, pierałom epoch, kali staraja ŭłada adyšła, a novaja jašče nie pryjšła — taki ž samy zachop ułasnaści, takija ž mary pra śvietłaje budučaje i novaje žyćcio. Staraja insceniroŭka była dobraja, ale adpaviadała tolki svajmu času — u joj było šmat socyuma, ale mała kachańnia. Ja zrabiŭ naadvarot, kab być bližej da ludziej, tamu hałoŭnaje miesca ŭ śpiektakli zajmaje trochkutnik Vasil — Hanna — Jaŭchim.

U śpiektakli zaniatyja:

Raman Padalaka, Alaksandr Paŭłaŭ, Viktoryja Čaŭłytka, Valancina Harcujeva, Pavieł Charłančuk, Arciom Barodzič, Hienadź Aŭsiańnikaŭ, Siarhiej Kraŭčanka, Natalla Kačatkova, Tamara Mironava, Hienadź Harbuk, Alaksandr Padabied, Zoja Biełachvościk, Alena Sidarava i inš.

***

Tryłohija Ivana Mieleža maje bahatuju sceničnuju historyju. U 1966 hodzie Alaksandr Hutkovič pastaviŭ trochsieryjny teleśpiektakl «Ludzi na bałocie», u jakim rol Vasila, darečy, syhraŭ akcior Nacyjanalnaha akademičnaha teatra imia Janki Kupały Hienadź Harbuk.

U tym ža hodzie Barys Eryn, Zinaida Bravarskaja i Halina Uładamirskaja pastavili «Ludziej na bałocie» ŭ Nacyjanalnym akademičnym teatry imia Janki Kupały. Vasila ŭ śpiektakli znoŭ syhraŭ Hienadź Harbuk, Hannu — Lilija Davidovič, a Alaksandr Harcujeŭ vykanaŭ rolu Mikanora. Śpiektakl išoŭ 19 hod. U filmie Viktara Turava «Ludzi na bałocie» (1981 hod) Hienadź Harbuk ihraŭ užo baćku Hanny, Alaksandr Harcujeŭ — Łaryvona, a Lilija Davidovič — Hłušačychu.

Da hetych ramanaŭ źviartalisia i ŭ Homielskim abłasnym teatry, dzie ŭ 1977 hodzie byŭ pastaŭleny śpiektakl «Podych navalnicy», a ŭ 1989 hodzie śpiektakl «Žarści epochi» (pa treciaj častcy «Paleskaj chroniki» «Zaviei, śniežań»).

U 2011 h. Mazyrski dramatyčny teatr imia Ivana Mieleža pradstaviŭ hledačam litaraturna-muzyčnuju kampazicyju pa matyvach ramana «Ludzi na bałocie».

• 0
• 0
• 0
• 0
• 0
• 0
• 0
• 0