Paźniak: Tramp ščyra nie razumieje, što za blednaja mol šalaścić pierad im

U chutkim prynamsi časovym vyrašeńni Trampam pytańniaŭ kanfliktaŭ pamiž Indyjaj i Pakistanam, a taksama Demakratyčnaj Respublikaj Konha i Ruandaj Zianon Paźniak bačyć peŭnaje paćviardžeńnie słušnaści «vobraznaj frazy, skazanaj niekali Trampam, što vajnu pamiž Rasiejaj i Ukrainaj jon spynić za adny sutki». I dalej pierachodzić da abmierkavańnia ŭłasna rasijskaha pytańnia:

«Adnosna Rasiei, adnak, vobrazna lepš nie vykazvacca. Na Zachadzie, praŭda, taho nie razumiejuć. A mienavita nie razumiejuć, što «umom Rasieju nie poniať». I heta praŭda. Rasieju možna «paniać» tolki bićciom. I čym macniej — tym lepiej.

Ukraincy hetuju azbuku viedajuć. Zachodnikam jana, na žal, intelektualna niedasiažnaja. I nijakaja historyja z masavaj raźnioj i hrupavym zhvałtavańniem dvuch miljonaŭ žančyn ich ničomu nie navučyć. Buduć pisać nierazumnyja knižki pra «kaniec historyi» i budavać «demakratyju» ŭ Rasiei (jakaja joj, hetaja demakratyja, arhanična nie patrebnaja).

Voś na hetym mientalnym kaniočku spatyknuŭsia i hienijalny Tramp.

Biezumoŭna, u płanie taktyčnaj dypłamatyi Tramp lepš vyhladaje, čym Pucin. Prezident Amieryki, zdajecca, vykarystaŭ užo ŭvieś svoj ciarplivy dypłamatyčny arsienał — i racyjo, i pachvalbu, i vyhadnyja prapanovy, i chvaleńnie rasiejskaj historyi, i namioki pra adkaznaść, i pahrozy druhasnych sankcyjaŭ, i abvału ekanomiki; słovam, «i morkvu, i puhu», i navat abiacańni pakinuć pad rasiejskaj akupacyjaj Krym i Danbas, źniać sankcyi, dać inviestycyi Rasiei i inš.

Fantastyčna! Niekatoryja amatary palityki ŭpali ŭ prastracyju. Ale ŭ vyniku… pšyk! Hienij ruskaha draństva pastaviŭ u tupik hienija amierykanskaj «ździełki». U mianie składvajecca ŭražańnie, što prezident Tramp ščyra nie razumieje, što za blednaja mol šalaścić pierad im. Heta nazyvajecca mientalnaja pastka, u jakuju traplajuć zachodniki pierad «vielikim russkim čiełoviekom», a skaročana — pierad kryminalnikam «na pantach».

Racyjanalnaja dypłamatyja Trampa nahladna pakazała ŭsim, što Pucin nie choča miru, što jon choča vajny i źniščyć Ukrainu (što jon uvieś čas i robić biez adryvu ad trampaŭskaj «dypłamatyi»).

Zaciažnaja dypłamatyja Trampa vyśviečvaje, ale nie vyrašaje prablemu. A prablema pakazvaje, što jana moža być vyrašana tolki radykalnym (siłavym) šlacham, što acaleńnie Ukrainy realna zaležyć ad Amieryki i ad dziejańniaŭ prezidenta Trampa.

Tym časam Rasiejska-Ukrainskaja vajna — heta treciaja (ci navat čaćviortaja) prablema dla Trampa i dla mižnarodnaj palityki ZŠA. Amieryka nie choča zaviaznuć u hetaj vajnie i apłočvać jaje košty. Ale kali b Amieryka ŭsio kinuła i vyjšła b z prablemy, tady dziaržava Ukraina stała b pierad pahrozaj stracić svajo isnavańnie. Tak było ŭ Vjetnamie. Amieryka vyjšła — Vjetnam staŭ kamunistyčnym. Tak było ŭ Afhanistanie. Amieryka vyjšła — Afhanistan apanavali taliby. Ukrainskaje kiraŭnictva toje razumieje. Ale hramadstva, zdajecca, jašče nie (asabliva tyja, što panosiać Trampa i ZŠA)».

• 22
• 2
• 3
• 8
• 0
• 0
• 1
• 0