Što Paźniak dazvalaje Trampu i nie dazvalaje Cichanoŭskaj

Zianon Paźniak učora rezka raskrytykavaŭ namier Siarhieja i Śviatłany Cichanoŭskich pravieści akcyju salidarnaści ŭ Varšavie, abhruntavaŭšy svajo nieprymańnie hetaj idei nastupnym čynam:

«Pierš čym zaklikać biełarusaŭ da akcyi, treba zrabić raźličeńnie z «russkim mirom», z «Pucin mudry», z «vmiestie s Rośsijej», z «Miratvorcam», z prarasiejskaj pazicyjaj, jakaja zastałasia i nie rastłumačana».

Charakternaja prysutnaść u hetaj frazie vyrazu «Pucin mudry», u jakim nieprychavanaja aluzija na Śviatłanu Cichanoŭskuju, jakaja dapuściła hetuju frazu ŭ intervju rasijskamu vydańniu RBK, dadzienym u vieraśni 2020 hoda, u razhar palityčnaha kryzisu ŭ Biełarusi paśla sfalsifikavanych prezidenckich vybaraŭ.

U toj čas faktyčna ŭsio zaležała, jakuju pazicyju ŭ dačynieńni da biełaruskich padziej zojmie Kreml, ci budzie jon da apošniaha padtrymlivać Łukašenku. I ŭ tym intervju Cichanoŭskaja tłumačyła, što biełaruskaja apazicyja hatovaja razmaŭlać z rasijskimi ŭładami, a sychod Łukašenki zusim nie aznačaje, što Rasija tracić u Biełarusi ŭpłyvy.

Voś taja fraza, jakaja nie daje spakoju Paźniaku, całkam:

«Vy razumiejecie, usio ž taki Uładzimir Pucin mudry kiraŭnik. Jon ža razumieje, što ŭsio, što havorycca, — heta fantazii adnaho čałavieka. I jon razumieje, što my zaŭsiody havaryli, što adkrytyja da dyjałohu. I my nikoli nie pavaročvalisia śpinaj da Rasii, ja maju na ŭvazie biełaruski narod. My siabroŭskija krainy, my chočam takimi zastavacca».

Ja i tady, i ciapier nie baču ŭ hetym frahmiencie, dy i va ŭsim intervju, ničoha asabliva kramolnaha, niahledziačy na toje, što asabista, kaniešnie, nie ličyŭ Pucina «mudrym kiraŭnikom» i nie chacieŭ zastavacca z Rasijaj nijakaj «siabroŭskaj krainaj». Dy i nie ŭpeŭnieny, što sama Śviatłana heta tady havaryła ad ščyraha serca, toje, što realna dumała, a nie toje, što joj było metazhodna havaryć jak palityku.

Jość ža ŭ mižnarodnych stasunkach takaja źjava, jak dypłamatyja — kali ty chočaš z kimści damovicca, to nie abražaješ i nie klajmiš jaho publična, a havoryš vietlivyja kamplimienty, jakija ni da čaho nasamreč nie abaviazvajuć. Prosta takija praviły hulni, nie siońnia i nie ŭčora prydumanyja.

Tym nie mienš, u mietadyčki paźniakoŭcaŭ hety vyraz tady tryvała ŭpisali, i jany jaho niastomna juzajuć užo amal 5 hadoŭ. Prytym nie hrebuje zvarotam da mietadyčki i sam ichni lidar.

A čamu nie aśviažajecca mietadyčka tak doŭha, čamu hety stary zamšeły vyraz nie mianiajuć na bolš novyja prarasijskija i prapucinskija vykazvańni Śviatłany ci jaje najbližejšych paplečnikaŭ? Pryčyna navidavoku — prosta tamu, što takich vykazvańniaŭ niama ŭ pryrodzie.

Paśla taho, jak stała jasna, što Kreml ni na jakuju hnutkaść u biełaruskim pytańni nie pojdzie i zrabiŭ staŭku na adnaznačnuju padtrymku Łukašenki i jahonaj represiŭnaj palityki, pytańnie mahčymaści niejkich razmoŭ ź im syšło z paradku dnia.

I z taho času pazicyja i samoj Cichanoŭskaj, i mejnstrymu demakratyčnych siłaŭ — padkreślena antyrasijskaja i prazachodniaja. I nijakich vahańniaŭ dy «nieadnaznačnaściaŭ» u hetym pytańni nikoli nie było.

Kali ŭ lutym 2022-ha Rasija raźviazała šyrokamaštabnuju vajnu suprać Ukrainy, zvarot Cichanoŭskaj z adnaznačnaj padtrymkaj Ukrainy i takim ža adnaznačnym asudžeńniem Rasii źjaviŭsia ŭ toj ža samy dzień. I paśla nijakich źmienaŭ u hetym pytańni ciaham apošnich bolš čym troch hadoŭ nie było.

Bolš taho — navat ad rasijskaj apazicyi biełaruskija demakratyčnyja siły na čale ź Cichanoŭskaj trymajucca na dystancyi, i sama Śviatłana nieadnarazova krytykavała ich pradstaŭnikoŭ za časam vysakamiernaje staŭleńnie da biełarusaŭ.

Nu voś ja ščyra nie razumieju, što treba jašče zrabić, kab Paźniak zaličyŭ heta jak «raźličeńnie z «russkim mirom»… z prarasiejskaj pazicyjaj»? Padazraju, što treba prosta nazvać «mudrym kiraŭnikom» samoha Paźniaka i pradekłaravać, što ŭsia nastupnaja dziejnaść budzie pravodzicca tolki pa jahonych instrukcyjach. Inakš, vidać, nijak.

Siarhiej Cichanoŭski na voli nie prabyŭ jašče i tydnia, ale ŭ jaho aktyvie ŭžo jość absalutna kankretnaje i adnaznačnaje vykazvańnie ŭ padtrymku Ukrainy i śćviardžeńnie, što «naš supolny vorah — heta pucinskaja ŭłada. Pakul jana nie ruchnie, nijakaj pieramohi ŭ Biełarusi nie budzie». Nu, ale pakolki i tut nie prahučała klatvy ŭ viernaści Paźniaku i jahonaj mudraści, to taksama «niezačot».

Pry hetym ironija situacyi ŭ tym, što ŭ Paźniaka jość palityčny kumir, jakoha jon praktyčna abahaŭlaje — ciapierašni prezident ZŠA Donald Tramp. Toj i «łapidarny hienij» (vyraz užo tryvała ŭvajšoŭ u biełaruski leksikon), i «najlepšy prezident za ŭsiu historyju», i «vialiki čałaviek. Daj Boh jamu zrabić usio, što jon dumaje», i hetak dalej, i da taho padobnaje. Nu prosta miesija, jakoha Hospad pasłaŭ vyratavać śviet.

Ale pry hetym tolki za apošnija paŭhoda hety miesija havoryć usialakija kamplimienty na adras Pucina ledź nie štodnia, i ź jahonych vykazvańniaŭ vobraz «mudraha palityka», jaki ŭsimi fibrami dušy prahnie miru, vymaloŭvajecca vielmi vypukła. Adno što tolki nie całujucca dva mudryja hienii, dy i toje, vidać, tolki tamu, što pakul nie było asabistaj sustrečy.

Ale Paźniaka heta ŭsio kali i biantežyć, to nie nastolki, kab ad kumira adviarnucca — hałoŭnaje, što toj za «tradycyjnyja kaštoŭnaści» (Pucin, darečy, za ich taksama) i suprać nienavisnaha «lavactva» (Pucin salidarny). Nu, a kali zaihryvaje pry hetym z Pucinym — to heta, jak i ŭsie inšyja, skažam tak, dziŭnyja kroki, treba dumać, «prajaŭleńnie stratehičnaha dumańnia z raźlikam na dziasiatki hadoŭ napierad. (Daloka nie kožny palityk i nie kožny narod vałodaje takim dumańniem)».

Viadoma, nie kožny. Asabliva ŭ situacyi, kali adnaho za «stratehičnaje dumańnie» ŭznosiać da łapidarnych niabiosaŭ, a druhoha miašajuć z haŭnom.

• 61
• 8
• 6
• 0
• 0
• 0
• 0
• 0