Astranomy ŭpieršyniu znajšli malekułu cukru ŭ pyłavoj chmary Mlečnaha Šlachu
U mižzorkavaj prastory ŭpieršyniu vyjavili erytrułozu — raznavidnaść cukru, jakaja sustrakajecca ŭ malinie i vykarystoŭvajecca ŭ srodkach dla aŭtazaharu. Heta adkryćcio moža dapamahčy navukoŭcam lepš zrazumieć, jak u Suśviecie farmirujucca malekuły, nieabchodnyja dla ŭźniknieńnia žyćcia.
Pamiž zorkami znachodziacca nie tolki haz i kaśmičny pył. Jak paviedamlaje Associated Press, mižnarodnaja hrupa astranomaŭ vyjaviła ŭ mižzorkavym asiarodździ erytrułozu — raznavidnaść cukru, jakaja na Ziamli sustrakajecca ŭ malinie i vykarystoŭvajecca ŭ srodkach dla aŭtazaharu.
Malekułu znajšli padčas vyvučeńnia vialikaha hazavaha vobłaka pablizu centra Mlečnaha Šlachu. Jaje vyjavili z dapamohaj dvuch radyjoteleskopaŭ u Ispanii, a zatym identyfikavali, paraŭnaŭšy atrymanyja sihnały z łabaratornymi ŭzorami. Vyniki daśledavańnia apublikavanyja ŭ časopisie Nature Astronomy.
Cukry — heta nie tolki krynica enierhii dla žyvych arhanizmaŭ. Niekatoryja ź ich uvachodziać u skład DNK i inšych žyćciova važnych malekuł. Tamu navukoŭcy imknucca vyśvietlić, jak jany ŭtvarajucca ŭ kosmasie i ci mahli mienavita takija rečyvy stać asnovaj dla ŭźniknieńnia žyćcia.
Erytrułoza sama pa sabie nie ličycca nieabchodnaj dla žyćcia. Adnak jana lohka pieratvarajecca ŭ inšy cukar, jaki, jak miarkujuć navukoŭcy, moh adyhrać klučavuju rolu ŭ zaradžeńni žyćcia na Ziamli. Pry hetym heta adna z samych składanych cukrovych malekuł, kali-niebudź vyjaŭlenych u mižzorkavaj prastory.
Heta nie pieršaja takaja znachodka. Kala 25 hadoŭ tamu ŭ centry Mlečnaha Šlachu ŭžo vyjavili inšy składany cukar — «svajaka» zvyčajnaj cukrozy. A ŭzor hruntu, dastaŭleny na Ziamlu z asteroida Bienu misijaj NASA Osiris-Rex, utrymlivaŭ niekalki cukroŭ, u tym liku toj, što ŭvachodzić u skład DNK.
Novaje adkryćcio dadaje arhumientaŭ na karyść hipotezy, što asnoŭnyja «cahlinki žyćcia» ŭžo prysutničali ŭ vobłaku hazu i pyłu, ź jakoha paśla sfarmavałasia Soniečnaja sistema, a nie byli zaniesieny kamietami ci asteroidami paźniej.
Aŭtary daśledavańnia płanujuć praciahnuć pošuki inšych cukroŭ u mižzorkavaj prastory. Na ich dumku, kali takija malekuły znajšlisia ŭ adnym rehijonie Hałaktyki, to jany mohuć być šyroka raspaŭsiudžanyja i ŭ inšych jaje kutkach. Heta aznačaje, što chimičnyja pieradumovy dla ŭźniknieńnia žyćcia mohuć isnavać nie tolki ŭ našaj Soniečnaj sistemie, ale i ŭ mnohich inšych častkach Suśvietu.
Ciapier čytajuć
Mužčyna ŭ minskim mietro łapaŭ dziaŭčat, z vyhladu padletkaŭ, i pakazvaŭ im pachabnyja žesty. Jaho zatrymali10
Kamientary