«Za paŭhadziny — 350 aŭtohrafaŭ». Jak Aryna Sabalenka adkryvała ŭ Minsku tenisnyja korty
Niečakany dla mnohich pryjezd u Minsk pieršaj rakietki śvietu Aryny Sabalenki vyklikaŭ sapraŭdny ažyjataž siarod biełarusaŭ. U aŭtorak Aryna adkryvała tenisnyja korty i praviała majstar-kłas u svajoj rodnaj škole «Źmiena», a pahladzieć na znakamituju spartsmienku pryjšli sotni žycharoŭ stalicy, piša Onliner.by.
«Aryna, vychodź! Davajcie pakličam jaje, jak Śniahurku!»
Trapić na sustreču z zorkaj było niaprosta: zaŭziataram treba było prajści papiaredniuju rehistracyju, jakuju arhanizavaŭ partnior Aryny — prajekt First&Red. Astatnija miescy ŭvohule razyhryvalisia.
I navat niahledziačy na budny dzień, da škoły №86 u zavułku Kazłova pryjšli sotni čałaviek. Ciažka ŭjavić, kolki hledačoŭ sabrałasia b tut u vychadny.
Z-za vialikaj kolkaści ludziej jašče na padychodzie da školnaha stadyjona ŭźnikła nievialikaja błytanina: kala adnaho ŭvachodu ludziej nakiroŭvali da inšaha, a adtul — znoŭ nazad. Chtości ŭ vyniku vyrašyŭ nie marnavać čas i prosta pierastupaŭ praz čyrvonuju stužku, jakaja słužyła svojeasablivaj aharodžaj.
Znajšlisia i tyja, chto niezadavolena narakaŭ, što z-za pryjezdu spartsmienki nie zmoh narmalna pryparkavać aŭtamabil. Ale, viadoma, bolšaść prysutnych byli radyja pabačyć znakamituju biełaruskuju tenisistku.
— Aryna, vy-cho-dź! Davajcie pakličam jaje, jak Śniahurku! — prapanavaŭ adzin z addanych zaŭziataraŭ biełaruskaj tenisistki jašče zadoŭha da taho, jak źbiralisia adkryć varoty SDIUŠAR. Praŭda, ludzi, jakija stajali pobač, jaho entuzijazmu nie padzialili. Nieŭzabavie padyšoŭ achoŭnik i paprasiŭ tak nie rabić: usiamu svoj čas.
Užo za hadzinu da pryjezdu Aryny zaŭziatary pačali zajmać najlepšyja miescy. Praŭda, nie ŭsie adrazu zdahadalisia, jakim šlacham jaje buduć vieści, tamu niekatorym u apošni momant daviałosia pieramiaščacca i šukać bolš udałaje miesca.
«Vielmi pryjemna bačyć stolki dziaciej, jakija mianie padtrymlivajuć i nadajuć mnie stolki sił!»
Tenisistka vyjšła ŭ supravadžeńni achovy, žanicha Hieorhijasa Franhulisa, trenieraŭ i staršyni Minharvykankama Uładzimira Kucharava.
— Vialiki dziakuj usim, chto pryjšoŭ. Vielmi pryjemna bačyć stolki dziaciej, jakija mianie padtrymlivajuć i nadajuć mnie siły. Dziakuj usim, chto pobač, u tym liku i meru, za toje, što padtrymali hetuju ideju. Ja pačynała ŭ «Źmienie», adsiul vyjšła, dajšła da samaj viaršyni sportu i spadziajusia, što takija pryhožyja korty dapamohuć naradzicca novym zorkam, jakija buduć skarać viaršyni tenisa razam sa mnoj i paśla mianie. Spadziajusia, hetaje mierapryjemstva dapamoža dzieciam stać lepšymi i skaryć hety śviet, — padzialiłasia pierad adkryćciom kortaŭ svaimi ŭražańniami Sabalenka.
Adrazu paśla hetaha tenisistka i inšyja vysokapastaŭlenyja hości pierarezali čyrvonuju stužku — i ŭsio dziejańnie pieramiaściłasia na kort.
Nieŭzabavie zaŭziatary akružyli placoŭku, stali ŭ niekalki šerahaŭ, a niekatoryja nazirali za tym, što adbyvajecca, praz aharodžu.
Chtości navat vyjšaŭ pahladzieć na tenis z bałkona susiedniaha doma.
— Nu, Aryna, čaho ž ty chvaluješsia! Hulaješ usiaho tolki suprać pieršaj rakietki śvietu, — padtrymaŭ viadučy mierapryjemstva ciozku Sabalenki — dziaŭčynku, jakoj treba było niekalki chvilin pahulać z najlepšaj tenisistkaj śvietu.
I treba skazać, dziaŭčynka trymałasia vielmi niadrenna.
Nieŭzabavie paśla hetaha tenisistka adyšła da kraju placoŭki i pieraŭvasobiłasia ŭ treniera.
— Uvohule nie zajzdrošču vam, što mikrafon ciapier dastaŭsia mnie. Zaraz samy strohi trenier Aryna pačnie, — uśmichajučysia, skazała Sabalenka i pačała vučyć junych tenisistaŭ:
— Dziaŭčynka, kudy ty plačyma kruciš? Trymajsia prama. Voś, małajčyna…
Kaho-niebudź tenisistka navat asabista vyłučyła.
— Tak vydatna zakruciŭ miač! Heta ŭ nas budučy Nadal. Choć nie, chutčej Alkaras, — pachvaliła Aryna maładoha chłopca.
A kali praź niekalki siekund paśla hetaha miač vylecieŭ za miežy korta, za jaho ledź nie pabilisia niekalki dziaciej. Pieramožcu «bitvy» ŭ vyniku dazvolili pakinuć miač sabie.
A tym časam za kortam zaŭziatary adčajna sprabavali lubym sposabam pryciahnuć uvahu Sabalenki.
— Moža, jana tut ubačyć mianie, staju takaja! — ledź nie sa ślazami na vačach skazała junaja zaŭziatarka, jakaja apynułasia ŭ pieršym šerahu z płakatam.
— Oj, dyk jana ŭžyvuju seksi, — raptam prahučała niedzie z natoŭpu.
Naprykancy adkrytaj treniroŭki Sabalenka vykazała svaju pavahu junym tenisistam. Siarod tych, chto hulaŭ ź joj, darečy, byŭ i nie zusim małady Dźmitryj Baha — były futbalist BATE i zbornaj Biełarusi.
— Ja ŭ svoj čas nie viedała, što takoje kručeńnie miača. A tut usie heta ŭmiejuć. Najbližejšym časam u nas moža naradzicca nie adna zoračka. Adna — heta bazavy minimum, a nam patrebny raskošny maksimum! — skazała Sabalenka.
«Ekskluzivu nie budzie»
Žurnalistam padabracca da tenisistki akazałasia niemahčyma. Jašče napiaredadni my atrymali svojeasablivyja praviły, u jakich byli prapisanyja važnyja niuansy. Žurnalistam pa-za scenaryjem mierapryjemstva zabaraniałasia nabližacca da Sabalenki z asabistymi pytańniami, prośbami ab intervju i navat zadavać pytańni pradstaŭnikam jaje kamandy. Akramia taho, nam dali zrazumieć: ekskluziŭnych materyjałaŭ nie budzie.
Naprykancy majstar-kłasa karespandentam abiacali pres-padychod, ale ŭ vyniku abyšlisia bieź jaho. Abmiežavalisia znosinami z hledačami, pytańni dla jakich treba było dasyłać zahadzia. Akramia taho, słova dali dzieciam, jakija pryjšli na mierapryjemstva.
Pavodle słoŭ samoj Aryny, jaje idealny dzień — heta pračnucca ab 11 hadzinie ranicy, smačna pajeści i prabavić čas ź siabrami i rodnymi.
Samy składany turnir — pieramožny dla jaje Australian Open — 2023, a sioleta — «Rałan Haros», na jakim jana vybyła ŭ 1/8 finału.
Šmat pytańniaŭ było pra emacyjnaść tenisistki. Aryna raskazała, što kryčyć macniej za ŭsiu svaju kamandu, ale pry hetym čuje i ich. Taksama jana paraiła moładzi nie łamać rakietki ŭ paryvie złości, bo ciapier jany kaštujuć doraha.
Paśla adkrytaj treniroŭki arhanizatary praviali dva čelendžy. Pieršy — trapić u patrebny kvadrat, jaki nazyvała Sabalenka, z maskaj dla snu na vačach. U vyniku tolki pałova ŭdzielnikaŭ zmahła trapić pa miačy. Sama Aryna taksama pramachnułasia ź pieršaj sproby, ale potym vypraviłasia.
Paźniej tenisistka zhulała z moładździu ŭ tenisnyja kryžyki-nuliki: kudy traplaŭ miač, tudy i stavili kryžyk abo nulik. Paśla hetaha nastupiŭ nievialiki pierapynak pierad aŭtohraf-siesijaj, pierad pačatkam jakoj utvaryłasia vialikaja čarha.
Praŭda, paradavać Sabalency ŭdałosia nie ŭsich. Za paŭhadziny jana razdała 350 aŭtohrafaŭ — i ŭsio. Niekatoryja zaŭziatary, jakija pryjšli z płakatami, zastalisia rasčaravanyja: tenisistka raśpisvałasia tolki na arkušach, kab zekanomić čas.
— Zorka stamiłasia — hučna skazaŭ adzin z achoŭnikaŭ, sprabujučy nie prapuścić nikoha da tenisistki. U niekatorych vypadkach heta navat prahučała krychu hruba. Zaŭziataram taksama razdavali zahadzia padpisanyja kartki, ale i hetaha chapiła nie ŭsim.
Naprykancy vystupiła i sama Aryna.
— Spadziajusia, u najbližejšaj budučyni my jašče arhanizujem takija mierapryjemstvy, i ja zmahu padzialicca čaścinkaj siabie z kožnym z vas. Ja starałasia jak mahła, raśpisvałasia jak mahła. Mnie zdajecca, treba budzie zrabić asobny masaž dla majoj ruki, bo ŭsio aniamieła. Ale dziakuj vam za padtrymku! — zaviaršyła Aryna, paśla čaho zrabiła sełfi i ŭ akružeńni siami čałaviek u kaściumach nakiravałasia za miežy kortaŭ.
Ciapier čytajuć
Stvaralnica sietki kafe Myloverberry raspaviała, jak razam z mužam zahnała paśpiachovy biznes u daŭhi1
Kamientary