Biełaruski biźniesmien Birukoŭ, jaki zajmaŭsia «jo-mabilem», zapuściŭ novy prajekt u Rasii
Biełaruski biźniesmien Andrej Birukoŭ zapuskaje novy transpartny prajekt u Rasii — u Nižnim Noŭharadzie źjavicca hibrydny hramadski transpart, raspracavany sumiesna z «Biełkamunmašam». U płanach — aŭtobusy, tralejbusy i elektrobusy na adzinaj płatformie.
Staršynia savieta dyrektaraŭ sumiesnaha biełaruska-rasijskaha pradpryjemstva «Nižekotrans» Andrej Birukoŭ paviedamiŭ pra płany raspracavać liniejku hibrydnaha hramadskaha transpartu na adzinaj płatformie z daŭžynioj kuzava 12 mietraŭ.
U jaje pavinny ŭvajści try hibrydnyja aŭtobusy, što pracujuć na ścisnutym i zvadkavanym hazie, a taksama na dyzielnym palivie; tralejbus z zapasam aŭtanomnaha chodu i dva elektrobusy z roznaj chutkaściu zaradki.
Pradpryjemstva «Nižekotrans» było stvorana «Karparacyjaj raźvićcia Nižaharodskaj vobłaści», «AMB-CHOŁDYNHAM» Andreja Birukova i AAT «Kirujučaja kampanija chołdynhu «Biełkamunmaš».
Pradpryjemstva vypuskaje tramvai i elektrobusy pad markaj «MiNiN» dla Nižniaha Noŭharada i ŭžo pastaviła 20 adnasiekcyjnych tramvajnych vahonaŭ u Krasnadarski kraj.
Andrej Birukoŭ — biełaruski biźniesmien, jaki staŭ viadomym u siaredzinie 1990-ch, kali naładziŭ vytvorčaść teleskapičnych ekskavataraŭ na pradpryjemstvie «Śviatovit», nahadvaje officelife.media. Jon taksama byŭ akcyjanieram «MinskKompleksBanka» i suzasnavalnikam «Biełrosbanka». U Rasii Birukoŭ stvaryŭ chołdynh «JAROVIT», jaki zajmaŭsia vytvorčaściu hruzavikoŭ, prajektami ŭ enierhietycy, budaŭnictvie, sielskaj haspadarcy.
Najbolš viadomym prajektam Birukova staŭ «jo-AŬTA», jaki jon sprabavaŭ realizavać razam z rasijskim miljarderam Michaiłam Procharavym. Hety prajekt, adnak, akazaŭsia niaŭdałym.
U 2017 hodzie Birukoŭ z partniorami z Hiermanii, Kitaja, Biełarusi i Rasii raspačaŭ stvareńnie navukova-vytvorčaha centra kampazitnych materyjałaŭ u industryjalnym parku «Vialiki kamień» pad Minskam. Prajekt praduhledžvaŭ układańnie 220 młn jeŭra i vypusk detalaŭ dla transpartu i tavaraŭ narodnaha spažyvańnia.
Adnak zavod spačatku apynuŭsia ŭ pracedury likvidacyi, a ciapier — u bankructvie.
U 2024 hodzie Birukoŭ pradstaviŭ hibrydny ciahač MAZ-X, vyrableny z vykarystańniem lohkich kampazitnych materyjałaŭ.
Inžyniera-kanstruktara z upraŭleńnia «Pielenha», jakoje robić techniku dla rasijskaha vojska, asudzili pa palityčnych artykułach3
Kamientary