Cichanoŭski na mitynhu ŭ Varšavie: Ja złamaju hety režym VIDEA
Uviečary 26 červienia ŭ Varšavie kala pomnika Mikałaju Kapierniku prachodzić mitynh salidarnaści z palitviaźniami z udziełam Śviatłany i Siarhieja Cichanoŭskich. Na sustreču pryjšli kala 700 čałaviek.
U svaim vystupleńni Siarhiej Cichanoŭski padziakavaŭ usim, chto sadziejničaŭ jaho vyzvaleńniu, vykazaŭšy nadzieju, što chutka na svabodu mohuć vyjści i inšyja palitviaźni — u abmien na źmiakčeńnie sankcyj. Jon taksama adznačyŭ, što pry padtrymcy hramadzianskaj supolnaści pieramieny ŭ Biełarusi abaviazkova adbuducca, i heta nie za harami.
«Donald Tramp, napeŭna, viedaŭ tolki adno proźvišča ź biełaruskich palitviaźniaŭ — Cichanoŭskaja i jaje muž Siarhiej Cichanoŭski. I mienavita Tramp nastajaŭ, kab proźvišča Cichanoŭskaha było ŭ śpisie. Heta byŭ taki kampramis: kali piać hadoŭ u Biełaruś nie pryjazdžali amierykanskija dypłamaty. I tolki kab jany pryjechali, było vystaŭlenaje patrabavańnie — vyzvali palitviaźniaŭ i lidaraŭ. Jakich lidaraŭ? Proźvišča Cichanoŭski nazvaŭ Tramp.
Zusim chutka, i ja ŭ heta vieru, usie palitviaźni apynucca na voli. Chutka buduć źniatyja sankcyi z Rasii i ź Biełarusi, vajennyja sankcyi. I kab ich źniali, amierykanski bok skazaŭ vyzvalić palitviaźniaŭ. I Łukašenka skazaŭ, što vyzvalić», — zajaviŭ Cichanoŭski.
«U 2020-m vy ŭ mianie pavieryli. Ja tolki adnaho chaču: kab vy pavieryli mnie znoŭ. Ja toj samy čałaviek, choć vahi ŭ mianie napałovu mienš. Kali vy ŭ mianie pavierycie, ja abiacaju zrabić usio, kab my viarnulisia ŭ Biełaruś! I kab tam byli sapraŭdnyja sumlennyja demakratyčnyja vybary!», — skazaŭ były palitviazień.
Akramia taho, na mitynhu vystupili namieśnik kiraŭnika Abjadnanaha pierachodnaha kabinieta i kiraŭnik Narodnaha antykryzisnaha ŭpraŭleńnia Pavieł Łatuška, śpikier Kaardynacyjnaj Rady Arciom Bruchan, palitźniavolenaja Antanina Kanavałava i jaje dzieci, pradstaŭniki supołki «Akcyi biełarusaŭ Varšavy».
Taksama vystupiŭ ź pieśniami «Mury» i «Pahonia» Volny chor.
Akramia taho, ludzi padčas sustrečy mahli zadać pytańnie, byŭ adkryty volny mikrafon.
Adkazvajučy na adno z pytańniaŭ, Siarhiej Cichanoŭski zajaviŭ, što maje namier praciahvać baraćbu da pieramohi.
«Asabista ja źbirajusia hety režym łamać. Ja budu jaho łamać,iak i toj turemny. I navat kali vy nie budziecie mnie dapamahać, ci budziecie dapamahać słaba, ja ŭsio roŭna buduć łamać hety režym. Žyvie Biełaruś! Nie, ja ahavaryŭsia. Ja budu nie łamać režym. Ja jaho złamaju!»
Taksama jon vykazaŭ svajo mierkavańnie, što pavinny rabić dla źmieny situacyi ŭ Biełarusi zachodnija palityki:
«Ja skazaŭ prezidentu Dudzie i skažu kožnamu prezidentu ŭ Jeŭrasajuzie i ZŠA: padrychtujcie novy pakiet mahutnych sankcyj suprać dyktatara Łukašenki. Ale nie ŭvodźcie. Pryniasicie jamu, pakładzicie na stoł i skažycie: kali voś hetyja palitviaźni nie vyjduć, to my ŭviadziem. Navošta tabie hetyja 1000 čałaviek [za kratami]?»
Raniej u hety ž dzień Śviatłana i Siarhiej Cichanoŭskija sustrelisia z prezidentam Polščy Andžejem Dudam i ministram zamiežnych spraŭ Radosłavam Sikorskim, jaki padčas źniavoleńnia simvalična staŭ chrosnym Cichanoŭskaha.
Śviatłana i Siarhiej Cichanoŭskija adpraŭlajucca ŭ pieršy sumiesny vizit — u Polšču
«Zachodziš u kamieru, a jany kažuć: «My z taboj admaŭlajemsia siadzieć». Cichanoŭski raskazaŭ, jak sutyknuŭsia z prablemaj nizkaha statusu
Videa z kamiery Cichanoŭskaha, jakoje pakazvali na fonie čutak pra jaho śmierć u źniavoleńni, było staroje
«Cichanoŭski svajoj žyviolnaj charyzmaj moža zaciamnić šmat kaho ź lidaraŭ». Šrajbman pra viartańnie Cichanoŭskaha
Kamientary