«Zachodziš u kamieru, a jany kažuć: «My z taboj admaŭlajemsia siadzieć». Cichanoŭski raskazaŭ, jak sutyknuŭsia z prablemaj nizkaha statusu

U intervju litoŭskamu infarmacyjnamu resursu Delfi, Siarhieja Cichanoŭskaha spytali, ci lohka jamu było znachodzić ahulnuju movu z kryminałam. Palityk patłumačyŭ, što amal nie pierasiakaŭsia sa złačyncami, tamu što pieravažna siadzieŭ u adzinočnych kamierach.

Adnak Siarhiej pryznaŭ, što jaho zakranuła prablema žachlivaha staŭleńnia ŭ źniavoleńni da pradstaŭnikoŭ ŁHBT-supolnaści. Ad hetaha ciarpiać, pa słovach Cichanoŭskaha, i tyja, «chto ź imi navat znajomy ci toj, chto da ich łajalna adnosicca».

«Jany (administracyja — NN) skazali, što ŭ mianie ŭ kamandzie byli niejkija ludzi, u jakich nietradycyjnaja aryjentacyja. Ja, naprykład, pra heta nie viedaŭ, kali heta i było. Ale jakija mohuć być pretenzii da mianie? Usie viedajuć, u mianie jość žonka, u mianie jość dzieci.

To-bok ja ŭ pryncypie za siamiejnyja kaštoŭnaści. Zapuścili śpiecyjalna hetuju infarmacyju, kab i kryminał jašče cisnuŭ na palityčnych. I ŭsich, chto pa majoj spravie išoŭ, jany im aŭtamatyčna taki status «na kružki», «na vyśviatleńnie».

Heta značyć, ty ŭžo i ŭ narmalnuju kamieru nie možaš uvajści, ale i da tych ciabie nie adpraŭlajuć — chto ŭžo naohuł ź nizkim sacyjalnym statusam. I atrymlivajecca, ty pavinien siadzieć u adzinočcy.

Ale sam ty nie možaš (trapić) u adzinočku. To-bok, ciabie pryvodziać u niejkuju kamieru, a źniavolenyja kažuć:

«My z taboj admaŭlajemsia siadzieć. Abo kali ty nie vychodziš, my pačynajem ciabie bić. My tabie adabjom hałavu, kali ty nie vyjdzieš».

U čym sutnaść hetych pazapravavych turemnych praviłaŭ? Ličycca, što zvyčajnyja źniavolenyja nie mohuć znachodzicca ŭ adnoj kamiery z čałaviekam «nizkaha statusu». U jaho traplajuć ludzi, asudžanyja za seksualnyja złačynstvy, ale administracyja SIZA moža pry žadańni zładzić pravakacyju i pieravieści ŭ jaho i čałavieka, jakoha abvinavačvajuć pa inšych artykułach. Źniavolenyja pavinny patrabavać, kab čałavieka z «nizkim statusam» pieraviali ź ich kamiery ŭ inšuju — inačaj jany ŭsie atrymajuć taki samy status. Jon budzie ź imi pažyćciova, navat pry trapleńni ŭ SIZA ci kałoniju praź dziasiatki hadoŭ.

U vyniku Cichanoŭski byŭ vymušany źviartacca da administracyi, a taja za admovu znachodzicca ŭ kamiery nakiroŭvała jaho ŭ štrafny izalatar:

«Ja naciskaju na zvanočak. «Što takoje?» Ja havaru: «Admaŭlajucca sa mnoj siadzieć». Vyvodziać mianie, kažuć: «Vy admovilisia znachodzicca, vam spahnańnie 15 sutak. Siadzi ŭ ŠIZA za heta». I heta ž źjaŭlajecca padstavaj dla padaŭžeńnia tvajho termina na 2 hady turemnaha źniavoleńnia. (…) Atrymlivajecca, ty i ŭ štrafnym izalatary adbyŭ, i tabie jašče da 2 hadoŭ dadajuć. Heta kašmar».

Pa słovach Cichanoŭskaha, u takim statusie znachodziacca šmat palitviaźniaŭ, jakija byli ŭ jaho kamandzie ŭ 2020 hodzie.

• 1
• 0
• 5
• 5
• 9
• 20
• 28
• 1