Bankrutuje zavod kampazitnych kanstrukcyj. U jaho chacieli ŭkłaści 220 miljonaŭ jeŭra
U Biełarusi zbankrutavaŭ zavod, jaki pavinien byŭ vypuskać vyraby z kampazitnych materyjałaŭ. Jaho stvareńnie abyšłosia b u €220 miljonaŭ, i spačatku heta padavałasia jak ambicyjny prajekt z udziełam niamieckich i kitajskich inviestaraŭ. Pradpryjemstva zarehistravali ŭ 2017 hodzie ŭ industryjalnym parku «Vialiki kamień», a vytvorčaja placoŭka pavinna była zajmać bolš za 10 hiektaraŭ, piša Office Life.
Padčas pieršaha etapu budaŭnictva źjavilisia vytvorčy i ofisny karpusy, a taksama łabaratoryja. U płanach było pačać poŭnamaštabnuju vytvorčaść u 2022 hodzie. Zavod raźličvaŭ pracavać z bujnymi aŭtamabilnymi i pramysłovymi brendami, uklučajučy biełaruskija i rasijskija kampanii.
Adnak ź ciaham času inviestary pačali vychodzić z prajekta: spačatku Biełaruski inavacyjny fond, paśla niamieckija partniory, a zatym i inšyja ŭdzielniki. U vyniku kantrol nad pradpryjemstvam pierajšoŭ da rasijskaj kampanii «Resurs finans», ale ŭ 2025 hodzie jana pryniała rašeńnie likvidavać zavod.
Ciapier pradpryjemstva maje zapazyčanaść pa zarobkach i padatkach. Suma praterminavanych abaviazacielstvaŭ pieravyšaje 2 miljony rubloŭ, a majomaści dla ich pahašeńnia niama. U suviazi z hetym zavod padaŭ zajavu ŭ sud ab bankructvie, i ciapier u dačynieńni da jaho adkrytaja konkursnaja vytvorčaść.
Cikavy fakt: u tym ža industryjalnym parku, dzie znachodziŭsia hety zavod, źjaviŭsia novy rezident — kampanija «HamaKampanient», jakaja taksama budzie zajmacca vypuskam kampazitnych aŭtamabilnych detalaŭ.
Ciapier čytajuć
Na mitynhu ŭ Vilni zatrymali pravakatara. A Cichanoŭski zajaviŭ pra namier dabivacca sustrečy ź Zialenskim32
Kamientary