Pradpryjemstva «Biełryba» zbankrutavała

Historyja AAT «Biełryba» pačałasia ŭ śniežni 1957 hoda. Kampanija viadomaja na rynku jak adzin z najbujniejšych vytvorcaŭ vendžana-padvialenaj pradukcyi z ryby, rybnych delikatesaŭ, kansiervaŭ. U pryvatnaści, jaje pradukcyja vypuskałasia pad adnajmiennaj handlovaj markaj, a taksama pad brendami «Viasioły Flint», «Staličnaja», «Rybzavod Minsk». Usiaho bolš za 400 najmieńniaŭ. A jaje klijentami byli zvyš 2,6 tys. pradpryjemstvaŭ jak u Biełarusi, tak i za jaje miežami. Akramia hetaha, u kampanii byŭ aŭtapark z 44 hruzavikoŭ, a taksama sietka ŭłasnych kramaŭ pa ŭsioj krainie, piša Office Life.

Ź siaredziny 2010-ch «Biełryba» była stratnaj. Pa vynikach 2016 hoda kampanija syšła ŭ minus na 513 tys. rubloŭ, a za 2017 hod jaje strata vyrasła da 1,8 młn rubloŭ.

Z 2018 hoda kampanija pačała pradavać svaju majomaść. Tak, u vieraśni taho hoda na aŭkcyjon trapili abstalavańnie i budynki ŭ Minsku, a ŭ lutym 2019-ha — handlovaje i vytvorčaje abstalavańnie, a taksama handlovyja pamiaškańni, u tym liku ŭ Słucku i Naračy. Z kanca 2020 hoda AAT pačało zdavać častku svajoj majomaści ŭ arendu. Naprykład, składy, ofisnyja pamiaškańni, chaładzilnyja kamiery. Adnak heta nie dapamahło spravicca sa stratami. Tak, pa vynikach 2020 hoda kampanija syšła ŭ minus na 12,7 młn, a za 2021-y — u minus 8,8 młn rubloŭ.

Za 2022 hod AAT «Biełryba» taksama pakazała straty ŭ 9,58 młn rubloŭ. A pa vynikach 2023 hoda strata dasiahnuła 10,662 młn rubloŭ.

Admietna, što ŭ sakaviku 2024 hoda pa vynikach 2023 hoda aŭdytar AAT u svaim zaklučeńni pakazvaŭ na najaŭnaść «istotnaj niapeŭnaści adnosna bieśpierapynnaści dziejnaści» pradpryjemstva.

U vyniku, u siaredzinie 2025 hoda AAT «Biełryba» padała ŭ sud zajavu ab svaim bankructvie, tamu što «pamier jaho kredytorskaj zapazyčanaści bolš čym u dva razy pieravyšaje košt najaŭnych u jaho aktyvaŭ». Kampanija vinna svaim kredytoram amal 108 młn rubloŭ, abo $33 młn u pieraliku. Pry hetym zhodna z dadzienymi buchhałtarskaha bałansu, košt jaje aktyvaŭ — usiaho 47,6 tys. rubloŭ.

Z materyjałaŭ spravy vynikaje, što 100% doli ŭ AAT naležyć Minskamu haradskomu vykanaŭčamu kamitetu, a asnoŭny vid dziejnaści «Biełryby» — zdača ŭnajom ułasnaj i arandavanaj nieruchomaj majomaści.

U vyniku Ekanamičny sud Minska zavioŭ spravu ab bankructvie AAT «Biełryba» i adkryŭ u dačynieńni da pradpryjemstva konkursnaje viadzieńnie. Jaho vyniki źbirajucca razhledzieć 10 vieraśnia 2025 hoda.

• 1
• 0
• 0
• 2
• 0
• 1
• 1
• 0