«Rašeńnie pryjšło zvonku». Što adbyvajecca ŭ viciebskim teatry, dzie ŭ śpiektakli prahučała «Žyvie Fłandryja!» i pačałasia čarada zvalnieńniaŭ?
Jak stała viadoma «Našaj Nivie», z Kołasaŭskaha teatra ŭ Viciebsku budzie zvolnieny nie tolki dyrektar Alaksandr Starych, ale i niekatoryja akciory.
U pryvatnaści, kantrakt nie praciahvajuć jak minimum z tryma akciorami: Anžalikaj Barkoŭskaj, Julijaj Krašeŭskaj i Arciomam Hierakom.
«Nichto ničoha nie viedaje, nikomu ničoha nie skazali, čamu tak. Nam prosta nie płanujuć padaŭžać kantrakt. Rašeńnie pryjšło zvonku, bo kiraŭnictva teatra taksama ničoha patłumačyć nie moža. Voś, ułasna kažučy, i ŭsia infarmacyja, jakoj my vałodajem», — raspavioŭ «Našaj Nivie» adzin z akcioraŭ.
Pačałosia ŭsio paśla taho, jak u teatry imia Jakuba Kołasa prajšoŭ premjerny pakaz śpiektakla «Cil» pa pjesie dramaturha Hryhoryja Horyna. Na premjery prysutničali ministr kultury Anatol Markievič i pradstaŭnica Ministerstva Iryna Dryha. Taksama było kiraŭnictva Viciebskaj vobłaści. Čynoŭniki paśpieli ŭručyć akcioram uznaharody ŭ honar 95-hodździa teatra, ale paśla śpiektakl niečakana źnik z repiertuaru i afiš.
Ličycca, što nahodaj tamu pasłužyła fraza «Žyvie Fłandryja!», jakaja prahučała sa sceny. Pryčym heta dasłoŭny pierakład aryhinalnaj frazy z tvora «Da zdravstvujet Fłandrija!». Akciory, jakich zvalniajuć, byli zaniatyja ŭ pastanoŭcy. Arciom Hierak uvohule vykonvaŭ hałoŭnuju rolu.
Ale akciory vykazvajuć zdahadku, što tryhier na śpiektakli staŭ tolki dadatkovaj pryčynaj.
«Nas mahli zvolnić, tamu što ŭ 2020-m my vystupili suprać hvałtu, prajavili hramadzianskuju pazicyju. Inšych pryčyn ja nie baču, kab zvalniać mienavita viadučych akcioraŭ teatra. Ale heta tolki zdahadki. My ŭsie ŭ razhublenaści», — kamientujuć kołasaŭcy.
Dyrektar teatra Alaksandr Starych admoviŭsia ad kamientaroŭ.
Ciapier čytajuć
Chto toj redaktar biełaruskaj Vikipiedyi, jakoha pasadzili na dva hady za «dyskredytacyju Biełarusi»23
Kamientary