U Polščy teścirujuć pierachod na 4-dzionny pracoŭny tydzień. Čamu dziaržavie vyhadna, kab ludzi pracavali mienš
Polšča — pieršaja kraina va Uschodniaj Jeŭropie, jakaja sprabuje ŭvieści takuju navacyju.
Polšča płanuje ŭvieści 4-dzionny pracoŭny tydzień. Užo z 30 červienia Ministerstva siamji, pracy i sacyjalnaj palityki zapuskaje piłotny prajekt, jaki dazvolić prateściravać roznyja madeli. Zajaŭku na ŭdzieł u prajekcie da 14 žniŭnia mohuć padać roznyja kampanii, dziaržaŭnyja ŭstanovy, fondy, asacyjacyi i prafsajuzy pa ŭsioj krainie, paviedamlaje Bi-bi-si.
Jany zmohuć vybrać, jakaja madel im najbolš padychodzić — skaracić pracoŭny dzień (naprykład, da 6 hadzin) abo dazvolić rabotnikam mieć try vychodnyja zamiest dvuch.
Sutnaść u tym, kab ludzi pracavali mienš hadzin, ale atrymlivali taki ž zarobak, a ahulnaja meta — pracavać za hod na 20% mienš.
Za ŭdzieł u prahramie kožny pracadaŭca zmoža atrymać da adnaho miljona złotych (prykładna 250 tysiač jeŭra) na finansavańnie. U Polščy chočuć acanić, jak skaračeńnie pracoŭnaha času paŭpłyvaje na pradukcyjnaść, zdaroŭje rabotnikaŭ, arhanizacyju pracy i mahčymaść sumiaščać pracu z asabistym žyćciom.
«Heta budzie pieršy piłotny prajekt pa skaračeńni pracoŭnaha času ŭ hetaj častcy Jeŭropy, pieršy ŭ našym rehijonie», — zajaviła ministr pracy Ahnieška Dziemjanovič-Bonk.
Čatyrochdzionny pracoŭny tydzień — heta suśvietny trend
Niekatoryja polskija dziaržaŭnyja ci pryvatnyja pradpryjemstvy ŭžo pa ŭłasnaj inicyjatyvie pracujuć mienš.
Naprykład, 35-hadzinny pracoŭny tydzień uvioŭ mer Ułacłaŭka Kšyštaf Kukucki dla rabotnikaŭ haradskoj administracyi, a paźniej — padparadkavanych joj padraździaleńniaŭ i kamunalnych pradpryjemstvaŭ.
Padčas kanfierencyi, jakuju arhanizavała ministerstva pracy, Kukucki skazaŭ, što ŭžo «niekalki tysiač čałaviek karystajucca pieravahami 35-hadzinnaha pracoŭnaha tydnia».
Źmieny adbyvajucca i ŭ inšych haradach — takich jak Astšešaŭ, Śviebadzicy, Ščecin i Lešna.
Kampanija ź pierapracoŭčaj pramysłovaści Herbapol Poznań S.A taksama skaraciła pracoŭny čas.
Prezident praŭleńnia i hiendyrektar Tomaš Kačmarek raspavioŭ, što spačatku rabotniki pastavilisia da idei skieptyčna. Ale kiraŭnictva zrabiła hety krok, u tym liku, kab pamienšyć ciakučku kadraŭ i kolkaść prahułkaŭ.
U vyniku, pavodle Kačmareka, za apošnija miesiacy kampanija dasiahnuła najlepšych finansavych vynikaŭ za 12 hadoŭ pracy, i jon upeŭnieny, što skaračeńnie pracoŭnaha času stała adnoj z «cahlinak», jakija pryviali da takoha pośpiechu.
Čamu dziaržavie vyhadna, kab ludzi pracavali mienš
Čatyrochdzionny pracoŭny tydzień — heta hłabalny trend.
Za apošnija hady šmat krain uvodzili abo pačynali padobnyja piłotnyja prajekty, kab ubačyć, jak heta pracuje.
Siarod ich — Bielhija, Hiermanija, Isłandyja, Francyja — usiaho 19 krain ES.
Bolšaść ź ich pajšła na takija źmieny z pačatkam pandemii COVID.
Tym časam u Polščy 8-hadzinny pracoŭny dzień uviali jašče 107 hadoŭ tamu, nahadvajuć u ministerstvie.
Z taho času mnohaje źmianiłasia, tłumačać inicyjatary prajekta, i novyja technałohii značna pavysili efiektyŭnaść pracy.
Spasyłajučysia na danyja Jeŭrastata, ministerstva nahadvaje, što Polšča — adna z krain ES z samym praciahłym pracoŭnym tydniem.
Palaki pracujuć u siarednim 39,3 hadziny na tydzień, u toj čas jak siaredni pakazčyk pa ES — 36,1 hadziny.
Ale, jak pakazvajuć apošnija daśledavańni, bolšaja kolkaść hadzin, praviedzienych na pracy — heta nie zaŭsiody pra rost efiektyŭnaści i pradukcyjnaści.
Ludzi, jakija šmat pracujuć i nie biaruć adpačynku, čaściej pamylajucca ci vyharajuć.
Tamu 4-dzionny pracoŭny tydzień, jak śćviardžajuć u ministerstvie, — heta vyhadna i pracadaŭcam, i rabotnikam.
Skaračeńnie pracoŭnaha času, jak ličać, taksama moža stać adnym sa sposabaŭ zmahańnia z demahrafičnym kryzisam, jaki achapiŭ šmat krain.
Bolš volnaha času ź siamjoj pavinna matyvavać ludziej zavodzić dziaciej.
A starejšyja rabotniki, čyje dzieci ŭžo darosłyja, zmohuć daŭžej zastavacca aktyŭnymi.
U Polščy aktyŭna abmiarkoŭvajecca inicyjatyva ministerstva pa skaračeńni pracoŭnaha času.
Ekśpierty kažuć, što kab u Polščy sapraŭdy zapracavaŭ čatyrochdzionny pracoŭny tydzień, treba źmianić zakony ab pracy — inakš heta zastaniecca inicyjatyvaj asobnych pracadaŭcaŭ.
Kali piłotny prajekt pakaža dobryja vyniki, to da listapada 2027 hoda heta sapraŭdy moža stać realnaściu.
«Ja spadziajusia, što ciaham hetaha terminu my zmožam pradstavić kankretnyja zakanadaŭčyja źmieny adnosna skaračeńnia pracoŭnaha času, jakija dazvolać Polščy i polskamu rynku pracy dałučycca da tych rynkaŭ Zachodniaj Jeŭropy, dzie ludzi ŭžo pracujuć karaciejšy dzień», — skazaŭ na TVP Info namieśnik ministra pracy Siebaśćian Hajeŭski.
Ale, peŭna, hetamu buduć papiaredničać jašče šmat dyskusij.
Niekatoryja pradprymalniki ličać, što ciapier nie čas pierachodzić na 4-dzionny pracoŭny tydzień, što Polšča pakul nie hatovaja da hetaha, a technałohii jašče nie nastolki raźvityja.
Hałoŭny ideołah Biełarusi znajšoŭ u krainie «psieŭdapatryjatyčnyja jačejki» i zaklikaŭ da zmahańnia ź imi «adzinym bajavym kułakom»23
Kamientary
Sasuta ščaścia nie kasajetsia.
V sasutie, ponimajut vysokuju proizvoditielnosť truda prosto, - odin dołžien rabotať za troich i połučať zarpłatu za odnoho, na oborudovanii 50 letniej davnosti i s iznošiennymi fondami vyšie 90%, osvobodivšimsia - pinok pod zad, biez posobija po biezraboticie.