Ekśpiertka pa kamunikacyi, byłaja supracoŭnica Ofisa Śviatłany Cichanoŭskaj Nastaśsia Kaściuhova raspaviała «Našaj Nivie», ci dapamahała z pramovaj Siarhieju Cichanoŭskamu ŭ Jelskim univiersitecie i što dumaje nakont apošnich skandałaŭ vakoł błohiera.
Nastaśsia kaža, što palityčnyja vystupy — śfiera jaje ekśpiertyzy, tamu da jaje časta źviartajucca pa dapamohu z pramovami. Tak adbyłosia i ź Siarhiejem Cichanoŭskim.
«My paznajomilisia asabista ŭ Paryžy. Tam jon znachodziŭsia razam z Ofisam [Śviatłany Cichanoŭskaj]. Siarhiej adklikaŭ mianie pahutaryć na vačach va ŭsich, my pahavaryli. Ja jamu tady skazała, što kali jamu patrebna budzie dapamoha — dapamahu, čym zmahu. Bačna było, što Siarhieju niaprosta dajecca adaptacyja ŭ novaj dla jaho realnaści».
Pa vyniku Nastaśsia prapanavała niekalki palapšeńniaŭ užo hatovamu tekstu, absalutna biaspłatna.
«Hanarar nichto nie prapanoŭvaŭ, dy i ja b nie ŭziała», — adznačaje surazmoŭca, padkreślivajučy, što bolš nijakaj inšaj dapamohi z kantentam jana Cichanoŭskamu nie akazvała.
«Ja dakładna bolš nie płanuju ŭvachodzić u kamandy palitykaŭ u toj jakaści, u jakoj heta było ŭ Ofisie — mienavita tamu, što jakraz liču vielmi škodnaj praktykaj prydumlać źmiest za kahości inšaha. Pry hetym ja z saboj sumlennaja ŭ tym, što ŭ mianie jość svajo ideałahičnaje ŭjaŭleńnie pra toje, jak treba dziejničać, i heta niaŭchilna budzie adlustroŭvacca na maich prapanovach dla inšych.
Adnak vielmi roznyja ludzi źviartajucca da mianie pa dapamohu z kamunikacyjaj ci publičnymi vystupami, dzie patrabujecca hałoŭnym čynam stylistyčnaja dapamoha i nadańnie dobraj formy ŭžo najaŭnamu pasyłu — tut ja zaŭsiody hatovaja dapamahčy».
Nakont apošnich skandałaŭ vakoł palityka, Nastaśsia kaža, što ŭ jaho vypadku «pamyłki niaŭchilnyja».
«Čałaviek prasiedzieŭ piać hadoŭ u turmie i vyjšaŭ u vielmi składanaje, miescami adkryta taksičnaje asiarodździe. Jon budzie jašče nie raz pamylacca, i heta narmalna, tamu što jon žyvy čałaviek sa svaim mierkavańniem i bačańniem, jaki jašče nie adaptavaŭsia da taho, jak usio ŭładkavana ŭ demsiłach u vyhnańni. I mnie zdajecca, heta navat dobra. Jon moža śviežym pahladam pahladzieć na prablemy i niedaskanałaści, da jakich my ŭsie daŭno zvykli i ŭsprymajem jak normu, abaznačyć ich i vyklikać u nas pačućcio dyskamfortu (ale na moj pohlad, heta karysny dyskamfort).
Tamu ja staŭlusia da jaho biez maralnych acenak. Jon imkniecca danieści niejkuju ideju, jon maje na heta prava, idej u pryncypie brakuje, asabliva praź piać hadoŭ dosyć tupikovaha raźvićcia demsił. Ja sa ščyraj simpatyjaj staŭlusia da ŭsiakaha, chto sprabuje ŭnieści niešta idejna novaje, pa-za zaležnaściu ad taho, nakolki ja padzialaju peŭnyja idei».
Pry hetym vychad z kamandy Siarhieja Biaspałava, užo byłoha pres-sakratara Cichanoŭskaha, Kaściuhova nazyvaje strataj.
«Strata Biaspałava — heta sapraŭdy strata, čałaviek na kanał Siarhieju dakładna budzie patrebny».
Biaspałaŭ kančatkova rassvaryŭsia ź Cichanoŭskim: Dla jaho dobry tolki adzin čałaviek — Prakopjeŭ
«Franak, adnosiny pamiž ludźmi mohuć budavacca nie tolki na manipulacyjach». Prakop‘ieŭ daŭ vodpaviedź Biaspałavu. I Viačorku
Adna z arhanizatarak žanočych maršaŭ Nastaśsia Kaściuhova pačała vykładać u niderłandskim univiersitecie
Nastaśsia Kaściuhova sustrakajecca z komikam Maksimam Kanavałam. Jana raskazała, jak im žyviecca razam
Kamientary