Adna ź linhvistyčnych asablivaściaŭ niamieckaj movy — składanyja słovy, jakija mohuć dasiahać značnaj daŭžyni.
Adno z takich słoŭ i było vybrana ŭ jakaści leksičnaha monstra ŭ 2025 hodzie. Voś jano: Antidiskriminierungsbeauftragte — «ŭpaŭnavažany(-aja) pa baraćbie z dyskryminacyjaj», paviedamlaje telehram-kanał «A što tam u niemcaŭ».
Jak tłumačycca na sajcie Bierlinska-Brandenburhskaj akademii pryrodaznaŭčych i humanitarnych navuk, mienavita heta słova «apošnim časam ličyłasia asabliva hruvastkim, niezrazumiełym i tym, što pieraškadžaje ŭsprymańniu infarmacyi». U adbory samaha niazručnaha dla razumieńnia słova ŭdzielničała śpiecyjalnaje žury, u jakoje ŭvajšli niekalki darosłych ź nizkim uzroŭniem piśmiennaści.
Meta akcyi — pryciahnuć uvahu da prablem, ź jakimi sutykajucca takija ludzi ŭ Hiermanii.
Voś piać samych doŭhich słoŭ ź niamieckaha słoŭnika Duden:
Aufmerksamkeitsdefizit-Hyperaktivitätsstörung — Sindrom deficytu ŭvahi i hipieraktyŭnaści
Kraftfahrzeug-Haftpflichtversicherung — Strachavańnie hramadzianskaj adkaznaści ŭładalnikaŭ transpartnych srodkaŭ
Donau-Dampfschifffahrtsgesellschaft — Dunajskaja parachodnaja kampanija
Arbeiterunfallversicherungsgesetz — Zakon ab strachavańni ad niaščasnych vypadkaŭ na vytvorčaści
Bundesausbildungsförderungsgesetz — Fiederalny zakon ab padtrymcy adukacyi
Pavodle daśledavańnia Hamburhskaha ŭniviersiteta, kala 10,6 miljona žycharoŭ FRH va ŭzroście ad 18 da 64 hadoŭ adčuvajuć ciažkaści z čytańniem i piśmom. Kožny piaty čałaviek štodzionna sutykajecca z błankami, listami i publikacyjami, poŭnymi niezrazumiełych terminaŭ i ciažkadastupnych dla razumieńnia. Doŭhija i składanyja słovy, što časta ŭžyvajucca ŭ aficyjnych dakumientach, mohuć surjozna ŭskładnić žyćcio.
Inicyjatary prajekta pa vybary słova-monstra zaklikajuć spraščać movu takich dakumientaŭ.
Kamientary