Tramp u AAN: Jeŭropa kocicca ŭ piekła, a hłabalnaje paciapleńnie — najbujniejšaje machlarstva

Siarod inšaha Donald Tramp zajaviŭ, što jeŭrapiejskija krainy «kociacca ŭ piekła» z-za palityki adkrytych miežaŭ i bieskantrolnaj imihracyi. Pavodle jaho słoŭ, urady dapuścili «pravalny ekśpierymient», puskajučy ŭ Jeŭropu ludziej inšych kultur i relihij. Na dumku Trampa, heta razburaje kulturnuju identyčnaść, ekanomiku i pravaparadak unutry jeŭrapiejskich dziaržaŭ.

Jon padkreśliŭ, što ŭ ZŠA padčas jaho prezidenctva nielehalnuju imihracyju nibyta ŭdałosia spynić. Pry hetym jon zajaviŭ, što spačuvaje biežancam, ale prablemy treba vyrašać u ich krainach, a nie «stvarać novyja prablemy» ŭ tych dziaržavach, jakija ich prymajuć.

Druhoj pryčynaj «zaniapadu Jeŭropy», na dumku Trampa, źjaŭlajecca kurs na «zialonuju enierhietyku» i baraćbu z hłabalnym paciapleńniem. Jon nazvaŭ vietravyja elektrastancyi i inšyja adnaŭlalnyja krynicy «biazhłuździcaj i zanadta darahim pradpryjemstvam». Bolš za toje, Tramp acharaktaryzavaŭ papiaredžańni navukoŭcaŭ i mižnarodnych arhanizacyj pra niebiaśpiečnyja nastupstvy źmianieńnia klimatu jak «najbujniejšaje machlarstva apošnich 40 hadoŭ».

Tramp znoŭ paŭtaryŭ, što moh by lohka spynić vajnu va Ukrainie dziakujučy svaim adnosinam z Uładzimiram Pucinym, jakija jon nazvaŭ dobrymi. Jon zajaviŭ, što ZŠA hatovyja ŭvieści «mocny pakiet taryfaŭ», jaki, pavodle jaho słoŭ, «chutka spynić vajnu». Ale heta, pavodle Trampa, budzie efiektyŭna tolki tady, kali Jeŭropa spynić zakupku nafty i hazu ŭ Rasii. Jon dadaŭ, što byŭ ździŭleny tym, što krainy ES usio jašče praciahvajuć kuplać rasijskija enierhanośbity.

Uvohule ž, pa słovach Trampa, dasiahnuty im u jaho pieršy prezidencki termin mir «ruchnuŭ», sastupiŭšy miesca «najvialikšym kryzisam». Maŭlaŭ, «čatyry hady radykalizmu» pry jahonym papiaredniku Džo Bajdenie asłabili Złučanyja Štaty, ale ciapier u krainy «niama kankurentaŭ u śviecie». Prezident ZŠA nazvaŭ ciapierašni pieryjad «załatym viekam Amieryki», z samaj mocnaj ekanomikaj, armijaj, miežami, «siabroŭstvam i ducham».

Što da niadaŭniaha pryznańnia adrazu niekalkimi ŭpłyvovymi dziaržavami Paleściny, to prezident ZŠA zajaviŭ, što heta stanie nieapraŭdanaj uznaharodaj dla CHAMAS za žudasnyja złačynstvy, uklučajučy padziei 7 kastryčnika.

«Na žal, CHAMAS nieadnarazova adkidaŭ razumnyja prapanovy ab miry. Ciapier, nibyta zaachvočvajučy praciah kanfliktu, niekatoryja siabry AAN imknucca ŭ adnabakovym paradku pryznać paleścinskuju dziaržavu», — skazaŭ Donald Tramp.

Tramp zaklikaŭ nieadkładna spynić vajnu ŭ siektary Haza i vyzvalić usich zakładnikaŭ, jakija ŭtrymlivajucca terarystami CHAMAS.

• 18
• 0
• 2
• 19
• 0
• 0
• 0
• 1