«Da Mahilova 20 chvilin, a da Drybina — bolš za hadzinu». Viaskovyja piensijaniery vystupili suprać źmieny miežaŭ rajonaŭ

U Mahiloŭskaj vobłaści płanujuć źmianić miežy troch rajonaŭ na karyść Drybinskaha, jaki ciapier ličycca adnym z najmienšych u Biełarusi. Da jaho źbirajucca dałučyć 27 nasielenych punktaŭ z Mahiloŭskaha, Horackaha i Čavuskaha rajonaŭ. Adnak prynamsi častka žycharoŭ nie padtrymlivaje hety pieradzieł.

Piensijaniery ź viosak Mahiloŭskaha rajona tłumačać, što paśla źmieny miežaŭ im daviadziecca jeździć pa roznych patrebach u Drybin, jaki znachodzicca prykładna za 60 kiłamietraŭ. Da Mahilova ž ad ich kala 20—25 kiłamietraŭ.

@user9920284376126

♬ orihinalnyj zvuk - Tonia.

Dla miascovych žycharoŭ heta nie prosta pytańnie adlehłaści. Mnohija ź ich — pažyłyja ludzi, jakija raźličvajuć na dapamohu dziaciej i inšych svajakoŭ, što žyvuć u Mahilovie. Rodnyja dapamahajuć im vyrašać pobytavyja prablemy, zapisvacca da daktaroŭ i dabiracca da patrebnych ustanoŭ. Paśla źmieny administracyjnaj prynaležnaści źviartacca daviadziecca da ŭładaŭ inšaha rajona, a zvykłyja spravy mohuć stać bolš składanymi.

Pra płany pavialičyć Drybinski rajon stała viadoma jašče ŭviesnu 2026 hoda. Spačatku havorka išła pra pieradaču jamu častki ziamiel susiednich rajonaŭ, a ŭ lipieni Łukašenka padtrymaŭ hetuju prapanovu. Siarod arhumientaŭ uładaŭ nazyvałasia nieabchodnaść pavialičyć terytoryju rajona i kolkaść sielskahaspadarčych pradpryjemstvaŭ.

U kastryčniku Mahiloŭski abłasny saviet deputataŭ padtrymaŭ źmianieńnie miežaŭ. Pavodle źviestak pradstaŭnikoŭ ziemleŭparadkavalnaj słužby, z Čavuskaha rajona Drybinskamu pieradaduć 18 nasielenych punktaŭ i 10 826 hiektaraŭ ziamli, z Horackaha — dva nasielenyja punkty i 4778 hiektaraŭ, a z Mahiloŭskaha — siem nasielenych punktaŭ i 4454 hiektary. U vyniku płošča Drybinskaha rajona pavialičycca bolš čym na 20 tysiač hiektaraŭ.

Paśla publikacyi videazvarotu mnohija karystalniki sacyjalnych sietak padtrymali viaskoŭcaŭ. Ludzi adznačali, što administracyjnyja miežy ŭpłyvajuć na dostup da pasłuh, praciahłaść pajezdak i mahčymaść atrymlivać dapamohu ad blizkich.

Adna z žančyn napisała, što nabyła dom u Mahiloŭskim rajonie i nie razumieje, navošta ciapier mianiać jaho administracyjnuju prynaležnaść. Inšyja źviartali ŭvahu na vydatki, źviazanyja ź pieraafarmleńniem dakumientaŭ, i sumniavalisia, ci zmoža Drybinski rajon naležnym čynam spravicca z novymi terytoryjami.

Niekatoryja karystalniki padkreślivali, što vioski znachodziacca nie kala trasy, tamu dabiracca ŭ novy rajonny centr budzie doŭha, niazručna i daražej. Inšyja nahadvali, što ŭ vioskach žyvuć pieravažna piensijaniery, i zaklikali ŭłady prysłuchacca da mierkavańnia ludziej.

Pakul ułady na zvarot viaskoŭcaŭ nie adreahavali.

• 0
• 0
• 0
• 2
• 0
• 0
• 1
• 0