Paśla aryštu taksista-špijona polskija śpiecsłužby masava ciahajuć biełarusaŭ na dopyty
8 vieraśnia ŭ Polščy byŭ zatrymany biełarus Uładzisłaŭ Nadziejka — siabra Biełastockaj charuhvy arhanizacyi «Paspalitaje rušeńnie», jaki pracavaŭ taksistam. Jaho padazrajuć u špijonskaj dziejnaści na terytoryi Polščy. Jak daviedałasia vydańnie BGmedia, u suviazi z hetym zatrymańniem u Ahienctva unutranaj biaśpieki Polščy (ABW) pačali vyklikać na razmovy biełarusaŭ sa statusam dadatkovaj abarony ŭ Polščy. Redakcyi viadoma prynamsi pra try takija vypadki.
Padrabiaznaści pra taki vizit BGmedia raskazała biełaruska Kaciaryna (imia źmienienaje ź mierkavańniaŭ biaśpieki). Jana padkreśliła, što ŭ Ahienctva ŭnutranaj biaśpieki vyklikali i jaje znajomych z roznych haradoŭ.
«U ABW skazali być pilnaj i aściarožnaj»
Kaciaryna raskazała, što hutarka ciahnułasia niekalki hadzin. Było vidać, što supracoŭniki ABW zbolšaha ŭ kursie pra žyćcio, dziejnaść i pracu Kaciaryny.
«Jany pytalisia pra roznyja detali majoj hramadskaj dziejnaści, prasili ŭzhadać — ci nie zdarałasia sa mnoj apošnim časam niečaha padazronaha, ci nie pahražali mnie, nie sačyli za mnoj», — padzialiłasia biełaruska.
Supracoŭniki ABW, pa słovach Kaciaryny, patłumačyli joj, što ŭ Polščy byŭ zatrymany biełarus, jaki mieŭ pry sabie śpis ź biełarusami ŭ Polščy dla taho, kab «ci to nanieści im škodu, ci to jašče niešta horšaje».
«Supracoŭniki patłumačyli, što takich ludziej, jak jon, moža być bolš na terytoryi Polščy, bo jon mieŭ nievialički śpis. Jany nie vyklučajuć, što ciapier pa Polščy badziajucca padobnyja da jaho typy z padobnymi śpisami», — dadała Kaciaryna.
Mienavita jaje danyja byli ŭ tym padazronym śpisie, tamu jaje i vyklikali ŭ Ahienctva biaśpieki.
«Jany kazali, što ja atrymała ŭ Polščy dadatkovuju abaronu, tamu jany kłapociacca pra maju biaśpieku. Prasili być uvažlivaj jak u štodzionnym žyćci, tak i na mierapryjemstvach, jakija my pravodzim — heta kulturnickija mierapryjemstvy, darečy, nijakaj palityki. Ja ŭ šoku, ščyra kažučy. Mielnikava taja źnikła, u nas ciapier nie toje kab prablemy, ale i ŭ biaśpiecy ja siabie nie adčuvaju ciapier», — padkreśliła biełaruska.
Što heta było i čaho ciapier bajacca biełarusam u Polščy
Što heta było? Sapraŭdy biełarusam u Polščy daviadziecca bajacca jašče i roznych špijonaŭ ad biełaruskaha KDB? Pra heta BGmedia zapytałasia ŭ pradstaŭnika arhanizacyi «Biełpoł» Uładzimira Žyhara.
Jon ličyć, što takija zadačy, jak, umoŭna kažučy, pahoršyć žyćcio biełaruskim emihrantam u Polščy, mohuć stavicca śpiecsłužbami Łukašenki, «tamu što ryzyka i zatraty na heta minimalnyja».
«Havorka idzie nie pra kadravych supracoŭnikaŭ ci navat tych, kaho treba metanakiravana dasłać ź Biełarusi. Havorka idzie pra ludziej z dyjaspar, jany aryjentujucca ŭ Polščy, majuć tut peŭnyja suviazi. I kali ich suviaź z režymam uskryjuć ci jany, zrabiŭšy niešta, buduć zatrymanyja, režym nie paniasie nijakich strat», — patłumačyŭ Uładzimir Žyhar.
Pavodle jaho, takija dziejańni nakiravanyja na toje, kab zastrašyć dyjasparu, kab pasiejać niedavier adzin da adnaho.
Zatrymany ŭ Polščy biełaruski taksist-špijon byŭ siabram «Paspalitaha rušeńnia»
U Polščy zatrymali biełaruskaha špijona i vysyłajuć adnaho z dypłamataŭ
Stała viadoma imia biełaruskaha dypłamata ŭ Čechii, jaki moh mieć dačynieńnie da špijonskaj sietki
U vykrytuju ŭ Jeŭropie špijonskuju sietku ŭvachodziŭ taksist-biełarus z Polščy
Kamientary