Karol Karł vyrašyŭ nie pierajazdžać u Bukinhiemski pałac paśla zaviaršeńnia ramontu
Brytanskaja karaleŭskaja siamja apublikavała źviestki ab svaich finansach, ź jakich vynikaje, što karol Karł i jaho žonka, karaleva Kamiła, nie buduć pierajazdžać u Bukinhiemski pałac paśla zaviaršeńnia ramontu hetaj rezidencyi brytanskich manarchaŭ. Čakajecca, što raboty koštam 369 miljonaŭ funtaŭ zavieršacca ŭ nastupnym hodzie, piša Bi-bi-si.
Bukinhiemski pałac, jaki źjaŭlajecca rezidencyjaj manarchaŭ z 1837 hoda, pa-raniejšamu budzie słužyć administracyjnym centram brytanskaj manarchii, adnak aficyjnym miescam žycharstva Karła zastaniecca raźmieščany niepadalok Kłarens-chaŭs.
Pavodle słoŭ pradstaŭnikoŭ karaleŭskaha dvara, takoje rašeńnie było pryniata dla taho, kab palehčyć dostup hramadskaści ŭ Bukinhiemski pałac.
Ramont histaryčnaha kompleksu ŭ centry Łondana praciahvajecca ŭžo dziasiaty hod i pavinien być zavieršany ŭ sakaviku. U chodzie rabot, siarod inšaha, zamianiajucca elektrapravodka, vadapravodnyja truby i katły. Častka hetaha abstalavańnia vykarystoŭvajecca ŭžo kala 60 hadoŭ, što stvaraje ryzyku ŭźniknieńnia pažaraŭ abo zatapleńnia.
Karol Karł i karaleva Kamiła žyvuć u Kłarens-chaŭsie (jon raźmieščany pobač z histaryčnym Sent-Džejmskim pałacam) z 2005 hoda, kali adbyłosia ich viasielle. Raniej u Kłarens-chaŭsie žyła maci karalevy Lizaviety II. Ciapier karalu i karalevie ŭžo amal pa 80 hadoŭ, i paviedamlajecca, što nivodnamu ź ich nie chaciełasia pieražyvać niazručnaści, źviazanyja ź pierajezdam u Bukinhiemski pałac i pieravodam tudy ŭsiaho svajho piersanału.
Akramia taho, isnujuć aściarohi, što kali aficyjnaj rezidencyjaj karala stanie Bukinhiemski pałac, to ź mierkavańniaŭ biaśpieki daviadziecca skaracić kolkaść naviedvalnikaŭ. Taksama dla publiki moža być dastupna mienšaja kolkaść pamiaškańniaŭ.
Kali ž karol nie budzie pastajanna žyć u Bukinhiemskim pałacy, kompleks budzie adkryty dla naviedvalnikaŭ na praciahu bolš praciahłaha času, što dazvolić pavialičyć dachody ad prodažu biletaŭ. Ciapier Dziaržaŭnyja zały pałaca adkryty dla publiki kožnaje leta, a taksama ŭ asobnyja dni ciaham hoda.
Paśla zaviaršeńnia ramontu karol budzie pravodzić u Bukinhiemskim pałacy mnostva roznych mierapryjemstvaŭ, u tym liku dziaržaŭnyja bankiety, pryjomy, a taksama tradycyjnyja aŭdyjencyi z premjer-ministrami Vialikabrytanii i novymi pasłami.
«Jaho Vialikaść zachoŭvaje vialikuju prychilnaść da Bukinhiemskaha pałaca i hłyboka pavažaje jaho rolu ŭ karaleŭskim i hramadskim žyćci», — zajaviŭ aficyjny pradstaŭnik pałaca. Kali karol znachodzicca ŭ Łondanie, jak nad Bukinhiemskim pałacam, tak i nad Kłarens-chaŭsam uzdymajecca śpiecyjalny karaleŭski štandar.
Asabisty kaznačej karala Džejms Čałmiers paćvierdziŭ, što karol i karaleva nie buduć žyć u Bukinhiemskim pałacy, ale tam zastanucca pryvatnyja pakoi, jakimi manarchi zmohuć karystacca na praciahu pracoŭnaha dnia.
«Heta adnačasova i źmiena ŭ paraŭnańni ź minułym, i pryznańnie budučyni. Ale ja chaču padkreślić, što va ŭsich inšych adnosinach Bukinhiemski pałac i nadalej zastaniecca jak cyrymanijalnym, tak i pracoŭnym centram karaleŭskaha žyćcia», — skazaŭ Čałmiers.
Ciapier čytajuć
«Ja asasin, bł*!» Ekśpiert-juryst z STB nieadekvatna pavodziŭ siabie na Zybickaj. Videa sabrała miljony prahladaŭ — chto jon12
Kamientary