U Bielhii pradaviec aŭtamabilaŭ aficyjna staŭ pryncam

Kleman — pazašlubny syn prynca Łarana i bielhijskaj śpiavački Viendy van Vanten. Jahonuju maci na samaj spravie zavuć Irys Vandenkierkchovie, a Vienda van Vanten — jaje sceničny psieŭdanim. Raman pamiž joj i pryncam adbyŭsia jašče da taho, jak Łaran u 2003 hodzie ažaniŭsia z pryncesaj Kłer.

U siamju prynca Klemana aficyjna pryniali jašče kala paŭhoda tamu, ale šyroka viadoma pra heta stała tolki ciapier.

Niahledziačy na novy status, Kleman atrymaŭ daloka nie ŭsie pryvilei členaŭ bielhijskaj karaleŭskaj siamji. Jon farmalna maje tytuł prynca, ale nie budzie atrymlivać dziaržaŭnaje ŭtrymańnie, nie ŭvojdzie ŭ liniju spadkajemstva trona i nie budzie ŭdzielničać u tradycyjnych aficyjnych mierapryjemstvach karaleŭskaj siamji. Hetym jon adroźnivajecca ad svaich zvodnych bratoŭ i siastry — pryncesy Łuizy i pryncaŭ Emieryka i Nikala, jakija naradzilisia ŭ zakonnym šlubie Łarana i Kłer.

Kleman užo šmat hadoŭ viedaŭ, što jahony bijałahičny baćka — prync Łaran. Pavodle jaho słoŭ, maci raskazała synu pra heta, kali jamu spoŭniłasia 16 hadoŭ. Adnak jon da niadaŭniaha času nie vyrašyŭ, ci budzie karystacca proźviščam baćki — Saksien-Koburhski.

Pry hetym małady čałaviek padkreślivaje, što hanarycca proźviščam Vandenkierkchovie, jakoje nosić pa maci. Jon adznačaŭ, što admovicca ad jaho dla jaho aznačała b zdradzić tamu, što maci zrabiła dziela jaho.

U 20 hadoŭ Kleman narešcie advažyŭsia patelefanavać pryncu Łaranu. Paśla niekalkich telefonnych razmoŭ jany sustrelisia. Łaran prapanavaŭ pravieści DNK-test, kab kančatkova paćvierdzić baćkoŭstva.

Jany razam adpravilisia ŭ balnicu. Prync prapanavaŭ zdać analiz pieršym, kab Kleman mienš chvalavaŭsia. Paźniej małady čałaviek atrymaŭ paviedamleńnie z łabaratoryi: vynik paćvierdziŭ baćkoŭstva ź vierahodnaściu 99,5%.

Pra historyju Klemana bielhijskaja hramadskaść viedała jašče da ciapierašniaha aficyjnaha pryznańnia. U minułym hodzie na miascovym telebačańni vyjšaŭ dakumientalny film, u jakim sam Kleman raskazaŭ pra znajomstva z baćkam.

Padobnaja historyja ŭžo adbyvałasia ŭ siamji prynca Łarana. Jahony baćka, były karol Bielhii Albiert II, taksama prajšoŭ DNK-test paśla šmathadovaj sudovaj sprečki ab pryznańni baćkoŭstva.

U vyniku ŭ 2020 hodzie jon aficyjna pryznaŭ svajoj pazašlubnaj dačkoj mastačku Delfin Bael. Paśla sudovaj pieramohi Delfin atrymała tytuł pryncesy i stała vykarystoŭvać proźvišča Delfin Saksien-Koburhskaja.

Historyja z pazašlubnaj dačkoj stała adnoj z pryčyn taho, što ŭ 2013 hodzie Albiert II admoviŭsia ad trona. Karalom tady staŭ jahony starejšy syn Filip, brat Łarana.

Jak i Delfin, Kleman nie budzie atrymlivać dziaržaŭnaha ŭtrymańnia. Pavodle zakona, pryniataha ŭ Bielhii ŭ 2013 hodzie, adpaviednyja vypłaty pryznačanyja tolki karalu Filipu, byłomu karalu Albiertu II, pryncu Łaranu i pryncesie Astryd — siastry Filipa i Łarana.

• 0
• 0
• 0
• 0
• 0
• 0
• 0
• 0