Žančyny zmohuć kiravać Lichtenštejnam. Adna z samych kansiervatyŭnych manarchij Jeŭropy źmianiła praviły pieradačy trona
U kniastvie Lichtenštejn admianili viekavuju tradycyju pieradačy prastoła vyklučna pa mužčynskaj linii. Adhetul žančyny majuć roŭnyja z mužčynami pravy na kiravańnie dziaržavaj i ŭdzieł u pryniaćci rašeńniaŭ unutry kniažackaha domu.
Pra histaryčnyja źmieny ŭ zakanadaŭstvie paviedamiŭ vykonvajučy abaviazki kiraŭnika dziaržavy, spadčynny prync Ałaiz padčas svajho vystupu z nahody Nacyjanalnaha śviata. Jak adznačaje miascovaje vydańnie Lie24, reforma była padtrymana dźviuma tracinami hałasoŭ usich členaŭ kniažackaj siamji.
Raniej u krainie dziejničaŭ pryncyp mužčynskaj prymahienitury — prastoł pierachodziŭ vyklučna ad baćki da starejšaha syna. Ciapier hety paradak zamienieny na absalutnuju prymahienituru. Heta aznačaje, što tron i tytuł budzie atrymlivać u spadčynu pieršyniec manarcha, niezaležna ad taho, chłopčyk heta ci dziaŭčynka. Adnačasova z hetym žančyny z kniažackaha rodu atrymali roŭnyja z mužčynami pravy ŭ vyrašeńni ŭsich unutranych pytańniaŭ doma.
Novyja praviły nie buduć mieć zvarotnaj siły. Jany pačnuć dziejničać tolki dla budučych naščadkaŭ — dziaciej spadčynnaha prynca Ałaiza i jahonaj žonki Safii. Sam Ałaiz faktyčna kiruje kniastvam z 2004 hoda, kali jahony baćka, prync Hans-Adam II, pieradaŭ jamu paŭnamoctvy rehienta, zachavaŭšy za saboj aficyjny tytuł.
«Hetaj źmienaj u zakonie my chočam zabiaśpiečyć, kab Kniastvam Lichtenštejn i Kniažackim domam kiravaŭ toj čałaviek, jaki najlepš padrychtavany da hetaj zadačy», — patłumačyŭ spadčynny prync Ałaiz, dadaŭšy, što ciapier vyznačalnym faktaram budzie nie poł, a zdolnaści i paradak naradžeńnia.
Reforma manarchičnaha statuta — heta jašče adzin krok u pastupovaj libieralizacyi Lichtenštejna. Dziaržava z nasielnictvam kala 40 tysiač čałaviek doŭhi čas zastavałasia adnoj z samych patryjarchalnych u Jeŭropie. Žančyny tut atrymali prava hołasu na vybarach tolki ŭ 1984 hodzie paśla składanaha refierendumu, jaki ŭdałosia pravieści mienavita dziakujučy namahańniam prynca Chansa-Adama II. Adnak praces palityčnaj emansipacyi praciahvajecca: u pačatku 2025 hoda ŭrad krainy paśla parłamienckich vybaraŭ upieršyniu ŭ historyi ŭznačaliła žančyna — jurystka Bryhita Chaas.
Ciapier čytajuć
Addanaha jabaćku, jaki abražaŭ Śviatłanu Cichanoŭskuju ŭ Threads, kinuli za kraty21
Kamientary