Paśla vydaleńnia z App Store akcyi rasijskaha VK ruchnuli da histaryčnaha minimumu
Akcyi rasiejskaha internet-chołdynhu VK na Maskoŭskaj biržy apuścilisia da histaryčnaha minimumu paśla taho, jak z kramy mabilnych prahram App Store byli vydalenyja asnoŭnyja servisy kampanii. Košt adnoj akcyi ŭ chodzie tarhoŭ źniziŭsia da 183,4 rasijskaha rubla (kala 2,45 dalara), piša The Moscow Times.
Za adzin dzień papiery kampanii patańnieli na 5,5%, a z pačatku tydnia stracili kala 23% svajoj vartaści. U paraŭnańni z pačatkam 2026 hoda kapitalizacyja chołdynhu skaraciłasia amal na 40%. Z momantu vychadu na biržu ŭ śniežni 2021 hoda akcyi VK stracili kala 80% koštu.
Z App Store byli vydalenyja takija servisy kampanii, jak «Dzien», VK Video, VK Miesiendžar i «Adnakłaśniki». U VK zajavili, što rašeńnie było pryniata biez papiaredniaha paviedamleńnia. Sa svajho boku kampanija Apple patłumačyła dziejańni nieabchodnaściu vykanańnia sankcyjnych patrabavańniaŭ i zakanadaŭstva tych krain, dzie jana pracuje.
Raniej z App Store byŭ vydaleny i dziaržaŭny miesiendžar Max, raźvićcio jakoha finansujecca rasijskimi ŭładami. Na hety prajekt z rasijskaha biudžetu vydzielili kala 4 miljardaŭ rubloŭ (kala 53 miljonaŭ dalaraŭ). Jašče amal 40 miljardaŭ rubloŭ (kala 528,4 miljona dalaraŭ) dziaržava nakiravała na raźvićcio servisaŭ, jakija pavinny stać alternatyvaj YouTube.
Niahledziačy na dziaržaŭnuju padtrymku, finansavyja pakazčyki VK zastajucca słabymi. Kampanija ŭžo šosty hod zapar pracuje sa stratami. Letaś čystyja straty skłali amal 25 miljardaŭ rubloŭ (kala 333,3 miljona dalaraŭ). Za pieryjad z 2020 pa 2025 hod ahulnyja straty chołdynhu nablizilisia da 200 miljardaŭ rubloŭ (kala 2,64 miljarda dalaraŭ).
Ekśpierty miarkujuć, što i ŭ 2026 hodzie kampanija zastaniecca stratnaj. Pavodle prahnozaŭ analitykaŭ, straty mohuć skłaści jašče kala 8 miljardaŭ rubloŭ (kala 106 miljonaŭ dalaraŭ). Pry hetym u spravazdačy za pieršy kvartał 2026 hoda VK nie raskryła infarmacyju pra svaje prybytki i straty.
Ciapier čytajuć
Aryna Sabalenka vyjšła da minčukoŭ u atačeńni vaśmi achoŭnikaŭ VIDEA16
Kamientary