Łukašenka zahadaŭ prapuskać u Biełaruś ukrainskich hrybnikoŭ i jahadnikaŭ. Va Ukrainie adreahavali
Alaksandr Łukašenka na sustrečy z kiraŭnikom Maskoŭskaj vobłaści Andrejem Varabjovym zajaviŭ, što daručyŭ biełaruskim pamiežnikam razam z uładami Homielskaj i Bresckaj abłaściej prapracavać mahčymaść spraščeńnia dostupu dla hramadzian Ukrainy ŭ prymiežnyja rajony Biełarusi dla zboru jahad i hryboŭ.
Pa słovach Łukašenki, žychary ŭkrainskaha pamiežža na praciahu mnohich hadoŭ pryjazdžali na biełaruskuju terytoryju dla zboru dzikarosaŭ i atrymlivali ad hetaha dadatkovy zarobak — da 5‑6 tysiač dalaraŭ. Łukašenka adznačyŭ, što mnohija ŭkraincy dobra viedajuć miascovyja lasy i bałoty, časam navat lepš za biełaruskich žycharoŭ.
«Jany viedajuć lepš za nas hetyja miescy. Źbirali hetyja dzikarosy i pradavali. My ž razumiejem, što tam składana i ciažka», — paspačuvaŭ jon ukraincam.
Łukašenka padkreśliŭ, što biełaruski bok hatovy adnavić takuju praktyku, niahledziačy na składanuju situacyju ŭ rehijonie. Pry hetym jon zajaviŭ, što nie bačyć istotnych pahroz biaśpiecy, bo biełaruskija słužby zdolnyja kantralavać ludziej, jakija buduć pierasiakać miažu ź mirnymi metami.
Raniej Ministerstva zamiežnych spraŭ Biełarusi paviedamiła, što ŭkrainskamu dypłamatyčnamu pradstaŭniku była pieradadziena aficyjnaja nota z prapanovaj arhanizavać sproščany paradak propusku hramadzian Ukrainy dla zboru dzikarosłych jahad, hryboŭ i inšych lasnych daroŭ. Jak paviedamlaje Dziaržaŭny pamiežny kamitet, kali b raptam ukraincy zhadzilisia, dla hetaha płanujecca vykarystoŭvać try śpiecyjalnyja ŭčastki propusku pamiž ukrainskaj Rovienskaj i biełaruskaj Bresckaj abłaściami.
Pres-sakratar Dziaržaŭnaj pamiežnaj słužby Ukrainy (DPSU) Andrej Dziemčanka, kamientujučy vykazvańni Łukašenki dla vydańnia «RBK-Ukraina» nahadaŭ, što zaraz «dziejničajuć abmiežavańni na pamiežžy».
«Dy i ŭ cełym, miaža ź Biełaruśsiu — heta niebiaśpieka ŭ cełym», — kanstatavaŭ jon.
Pradstaŭnik DPSU patłumačyŭ, što havorka idzie jak pra pahrozy dla ŭkraincaŭ na terytoryi inšaj dziaržavy (z boku Biełarusi), tak i pra realnyja fizičnyja pieraškody.
«Jość i minna-vybuchovyja zaharody na miažy ź Biełaruśsiu… Jość i dalejšaje naroščvańnie inžyniernaha i fartyfikacyjnaha ŭmacavańnia», — paviedamiŭ Dziemčanka.
Aceńvajučy zajavu Pamiežnaha kamiteta Biełarusi, pres-sakratar DPSU zaŭvažyŭ, što «heta takoje, napeŭna, zadobryvańnie z boku Biełarusi, u cełym ich situacyi». «I spadziajucca, što tym samym Ukraina… Ja nie viedaju… Pahodzicca na takuju prapanovu».
Ale pres-sakratar DPSU padkreśliŭ, što pakul
«Biełaruś nie spynić padtrymlivać krainu-terarystku, nijakich źmien pa miažy — nie budzie».
Łukašenka nazvaŭ ukrainskija vojski na miažy ź Biełaruśsiu «miechanizatarami i dajarkami»
«Treba damaŭlacca istotna». Łukašenka raskazaŭ pra sustreču z pradstaŭnikami Zialenskaha
Dziaržpresa vydaliła tekst chamskaha vystupleńnia pasła Dapkiunasa ŭ ABSIE
«Trymajcie svaich kijeŭskich hadavancaŭ pad kantrolem». Pradstaŭnik Biełarusi ŭ ABSIE vystupiŭ z chamskaj pramovaj
«Spačatku pahrozu prydumaŭ, potym sam jaje pieramoh». Prapahanda abviarhaje Zialenskaha, śćviardžaje, što retranślataraŭ nie zdymali, bo ich nie było
Ciapier čytajuć
31‑hadovy rasijanin akruciŭ 17‑hadovuju biełarusku. Finał historyi strašny: turma za narkotyki, śmierć dziciaci, «SVA» i skradzienyja hrabavyja11
Kamientary
Treba razumieć, što ŭ abodvuch bakoŭ vajny užo PTSR u miljonaŭ ludziej. 5-y hod jak nijak.