Zatrymany ŭ Polščy biełaruski taksist-špijon byŭ siabram «Paspalitaha rušeńnia»
Stała viadoma, što hramadzianina Biełarusi, zatrymanaha za špijonskuju dziejnaść u Polščy, zavuć Uładzisłaŭ Nadziejka, piša Reform.news («Reform» pamyłkova nazyvaje jaho proźvišča jak «Najdzieka»). Jon byŭ členam Biełastockaj charuhvy «Paspalitaje rušeńnie».
8 vieraśnia supracoŭniki Ahientstva ŭnutranaj biaśpieki Polščy (ABW) zatrymali 33-hadovaha Nadziejku. Jamu vystaŭlena abvinavačańnie va ŭdziele ŭ dziejnaści zamiežnaj raźviedki suprać Polščy.
Raniej KDB Biełarusi pryznaŭ «Biełaruskuju hrenadziorskuju charuhvu» i źviazany ź joj čat u telehramie ekstremisckimi farmiravańniami, a siarod kala troch dziasiatkaŭ čałaviek, jakija nibyta mieli dačynieńnie da jaje dziejnaści, fihuruje i Nadziejka.
U internecie ciažka znajści foty hetaha maładoha čałavieka, ale adšukvajecca infarmacyja, što ŭ 2011 hodzie niejki Uładzisłaŭ Nadziejka byŭ kiraŭnikom studenckaha samakiravańnia jurfaka Hrodzienskaha ŭniviersiteta.
U siecivie taksama možna znajści infarmacyju, što Nadziejka zarehistravaŭ u Polščy indyvidualnaje pradpryjemstva pa pieravozcy ludziej, jakoje ciapier zakrytaje. Raniej vienhierskija ŚMI paviedamlali, što da spravy ab razhromie špijonskaj sietki KDB u Jeŭropie maje dačynieńnie biełarus — apazicyjny aktyvist, jaki pracuje taksistam i žyvie na polska-biełaruskaj miažy.
Pra zatrymańnie Nadziejki i vysyłku z krainy biełaruskaha dypłamata paviedamiŭ 9 vieraśnia premjer-ministr Polščy Donald Tusk. 8 vieraśnia češskija ŭłady taksama paviedamili pra vyjaŭlenuju špijonskuju sietku, jakuju nibyta sprabavaŭ stvaryć KDB Biełarusi. Supracoŭnik biełaruskaha pasolstva ŭ Prazie, vierahodna, Mikałaj Dukšta, byŭ abjaŭleny piersonaj non hrata. Biełaruskaje MZS paličyła heta palityčna matyvavanym rašeńniem.
Rasśledavańnie viadziecca pad ehidaj EUROJUST pry ŭdziele śpiecsłužbaŭ Rumynii, Čechii i Vienhryi. U Rumynii byŭ zatrymany były namieśnik kiraŭnika Słužby infarmacyi i biaśpieki Małdovy Alaksandr Bałan, jakoha padazrajuć u dziaržaŭnaj zdradzie i pieradačy dziaržaŭnych sakretaŭ biełaruskim śpiecsłužbam. Małdova taksama vysyłaje biełaruskaha dypłamata.
«Paspalitaje rušeńnie» było stvorana ŭ vieraśni 2022 hoda pad ehidaj pradstaŭnika Abjadnanaha pierachodnaha kabinieta pa pytańniach abarony i nacyjanalnaj biaśpieki Valeryja Sachaščyka i ŭ listapadzie 2022 hoda pryznana ekstremisckim farmavańniem. U lutym 2023 hoda była abvieščana pra stvareńnie niezaležnaj patryjatyčna-spartyŭnaj abarončaj arhanizacyi za miežami Biełarusi. U vieraśni 2023 hoda arhanizacyju pakinuŭ jaje raniejšy kiraŭnik Siaržuk Kiedyška, a ŭ červieni 2024 hoda «Paspalitaje rušeńnie» ŭznačaliŭ Siarhiej Bulba.
5 žniŭnia 2025 hoda było abvieščana, što arhanizacyja spyniaje svaju dziejnaść. Pavodle polskaha rejestru jurydyčnych asob, rašeńnie pra likvidacyju było pryniata jašče ŭ kastryčniku 2024 hoda ŭ suviazi z adsutnaściu aktyvaŭ i finansavych resursaŭ.
Stali viadomyja padrabiaznaści pra zatrymańnie biełaruskaha špijona ŭ Polščy
U Polščy zatrymali biełaruskaha špijona i vysyłajuć adnaho z dypłamataŭ
Stała viadoma imia biełaruskaha dypłamata ŭ Čechii, jaki moh mieć dačynieńnie da špijonskaj sietki
U Jeŭropie vykryli biełaruskuju špijonskuju sietku. Aryštavali byłoha kiraŭnika małdaŭskaj kontrraźviedki
U Polščy aryštavali byłoha kiraŭnika biełaruskaha «Paspalitaha rušeńnia» — pahražaje 10 hod za narkotyki
Ciapier čytajuć
Muzyka Cim Suładze: Roźnica 30 hadoŭ — toje, što adpaviadaje maim ujaŭleńniam pra adnosiny38
Kamientary