Stała viadoma imia byłoha małdaŭskaha śpiecsłužbista, jakoha zatrymali za špijanaž na karyść Biełarusi
Byłoha namieśnika dyrektara Słužby infarmacyi i biaśpieki (SIB) Małdovy, zatrymali 8 vieraśnia ŭ Rumynii. Pavodle danych G4Media, jaho padazrajuć u dziaržaŭnaj zdradzie — pieradačy sakretnych źviestak aficeram śpiecsłužbaŭ Biełarusi. Zavuć hetaha čałavieka Alaksandr Bałan, piša zdg.md.
Alaksandru Bałanu 47 hadoŭ. Jon zajmaŭ kiraŭničuju pasadu ŭ SIB i byŭ pryznačany namieśnikam dyrektara ŭ 2016 hodzie dekretam tahačasnaha prezidenta Nikałaje Cimofci. Toj ža Cimofci ŭ svoj čas uznaharodziŭ Bałana dziaržaŭnaj adznakaj.
Bałan viadomy svajoj aktyŭnaściu ŭ fejsbuku, dzie časta krytykavaŭ dziejnaść ciapierašniaha kiraŭnika SIB Alaksandra Muściacy i zaklikaŭ da reformy śpiecsłužby. U červieni Bałan źviarnuŭsia publična da prezidentki Mai Sandu i śpikiera Ihara Hrosu, śćviardžajučy, što SIB pieražyvaje «hłyboki kryzis», cierpiačy ad niekampietentnaha kiraŭnictva i karupcyi na vysokim uzroŭni.
Jon taksama pryvodziŭ prykłady, što kiraŭnictva ekanamičnaj biaśpiekaj daručyli čałavieku biez adpaviednaj adukacyi, a šerah aficeraŭ byŭ adchileny ad pracy praz abvinavačańni ŭ karupcyi i złoŭžyvańniach. Bałan patrabavaŭ terminovaha aŭdytu i «ačyščeńnia» struktury.
U 2023 hodzie pra jaho paviedamlali ŭ ŚMI ŭ suviazi z darožnym incydentam: nibyta jon, znachodziačysia ŭ niećviarozym stanie, paškodziŭ niekalki mašyn. Paśla hetaha Bałan pahražaŭ žurnalistam telekanała TV8 sudom, śćviardžajučy, što heta kampanija pa dyskredytacyi.
Ciapier SIB Małdovy paćvierdziŭ, što ich były supracoŭnik sapraŭdy byŭ zatrymany ŭ Rumynii i dastaŭleny ŭ Bucharest dla dopytaŭ.
Dziadok raskazaŭ, jak pavodziŭ by siabie ŭ siońniašniaj Biełarusi i što budzie dalej5
Kamientary