Ci mohuć biełaruskija śpiecsłužby vykradać apanientaŭ za miažoj? Rasijskija ŭžo sprabujuć — byŭ i varyjant vyvieźci na łodcy

Rasśledavalnik Chrysta Hrozieŭ

Žurnalist i rasśledavalnik Bellingcat Chrysta Hrozieŭ raskazvaŭ, što paśla jahonaha rasśledavańnia pra atručeńnie Navalnaha rasijskija śpiecsłužby niepasredna ad Pucina atrymali zahad «dastać» jaho i abmiarkoŭvali, jak jaho vykraści, a kali heta nie ŭdasca, to fizična likvidavać. 

Dla vykanańnia FSB padklučyła top-mieniedžara Wirecard — i adnačasova svajho ahienta — aŭstryjca Jana Marsaleka, jaki ŭ svaju čarhu zamoviŭ apieracyju svaim znajomym: bałharynu Arlinu Rusievu i byłomu aficeru aŭstryjskaj śpiecsłužby Marcinu Vajsu, jaki pieradaručyŭ hetuju spravu svajmu padnačalenamu Ehista Otu.

Pavialičyć

Z 2021 hoda dźvie kamandy viali za Hrozievym sačeńnie ŭ Bałharyi, Aŭstryi, Ispanii, Čarnahoryi. Abmiarkoŭvalisia płany padsypać žurnalistu narkotyki i vyvieźci ŭ Rasiju. U lipieni 2021 jany palavali na łodku, dzie zaŭvažyli Hrozieva, u vieraśni sprabavali ŭvajści ŭ numar hatela, ale trapili ŭ čužy, u červieni 2022 skrali zapasny telefon, a ŭ Vienie pranikli ŭ jaho kvateru i zabrali stary noŭtbuk.

Jak zhadvaŭ sam Hrozieŭ, špijony lacieli ź im u adnym samalocie i sprabavali z dapamohaj «špijonskich akularaŭ» razhledzieć, što jon piša. Pry hetym jon nie zaŭvažaŭ za saboju nijakaha sačeńnia, u adroźnienńnie ad svajoj dački. 

Dziejańni najmitaŭ byli nieprafiesijnymi, i apieracyja skončyłasia niaŭdačaj.

Žurnalist Raman Dabrachotaŭ

Paśla publikacyi rasśledavańnia pra atručeńnie Navalnaha palavać stali taksama na hałoŭnaha redaktara The Insider Ramana Dabrachotava.

6 sakavika 2021 hoda ŭ aeraporcie «Šaramiećcieva» pad vyhladam apytańnia pra COVID adciahvali ŭvahu mužčyny, pakul inšyja supracoŭniki sprabavali atrymać dostup da jaho hadžetaŭ.

Pavialičyć

U žniŭni 2021 hoda ŭ maskoŭskaj kvatery Dabrachotava adbyŭsia pieratrus: kanfiskavali techniku i zamiežnyja pašparty. Kab paźbiehnuć aryštu, jon pierajšoŭ rasijska-ŭkrainskuju miažu praź les. U Kijevie atrymaŭ infarmacyju, što miascovaja kryminalnaja hrupa atrymała zakaz z Maskvy na jaho vykradańnie za 50 tysiač dalaraŭ.

U žniŭni 2022 hoda Jan Marsalek prapanavaŭ płan vykraści Dabrachotava ŭ Vialikabrytanii i dastavić jaho ŭ Rasiju praź mižnarodnyja vody. Jak alternatyva — insceniravać «niaščasny vypadak u dušy». Ale FSB admoviłasia z-za vysokich ryzyk.

U studzieni 2023 hoda hrupu Rusieva, jakaja palavała na Dabrachotava i Hrozieva, zatrymali ŭ Brytanii. 

U sakaviku 2023 hoda sud u Łondanie pryznaŭ usich fihurantaŭ vinavatymi ŭ špijanažy na karyść Rasii.

Były śledčy Kirył Kačur

Padčas śledstva vyśvietliłasia, što abjektami cikavaści hetaj sietki byli nie tolki žurnalisty Chrysta Hrozieŭ i Raman Dabrachotaŭ. U materyjałach źjaviłasia imia jašče adnaho krytyka ŭładaŭ — byłoha supracoŭnika Śledčaha kamiteta Rasii Kiryła Kačura, jaki staŭ błohieram i adkrytym apanientam Kramla. U 2022 hodzie mužčyna byŭ abvieščany ŭ mižnarodny vyšuk.

Pavialičyć

Śledstva vyśvietliła, što za im viali sačeńnie ŭ Čarnahoryi: ahienty arandavali viłu pobač ź jaho žyllom i, hulajučy ŭ badminton, sačyli za mužčynam. Pa materyjałach śledstva, jany taksama vykarystoŭvali drony i śpiecyjalnaje abstalavańnie. Abmiarkoŭvalisia scenary vykradańnia Kačura i dastaŭki ŭ Maskvu.

Pavodle prakurora, u pieryjad ź siaredziny 2020-ha da pačatku 2023 hoda hrupoŭka atrymała dostup da 221 mabilnaha telefona, 258 žorstkich dyskaŭ, 33 aŭdyjamahnitafonaŭ, 55 videamahnitafonaŭ i amal 500 SIM-kart.

Pavialičyć

Na ŭzbrajeńni ŭ ich było 11 dronaŭ, 16 radyjostancyj i 75 pašpartoŭ i inšych dakumientaŭ na 55 roznych imionaŭ. Akramia taho, jany mieli cełuju kalekcyju zvyčajnych pradmietaŭ, pieraroblenych pad schovanki dla techniki nazirańnia: štučny kamień, ručku, butelki z-pad haziroŭki, hadzińniki i navat dva «špijonskija halštuki». 

Biznesmien Jaŭhien Čyčvarkin

Jašče adzin niadaŭni epizod źviazany z byłym uładalnikam sietki kram «Jevrosieť», rasijskim biznesmienam Jaŭhienam Čyčvarkinym, jaki z 2008 hoda žyvie ŭ Łondanie, adkryta krytykuje Kreml i padtrymlivaje Ukrainu.

Jašče ŭ 2009 hodzie Rasija aficyjna zapatrabavała jaho vydačy pa kryminalnaj spravie. Čyčvarkin byŭ navat zatrymany pa zapycie Maskvy, ale praź niekalki dzion adpuščany pad zakład. Sud u Łondanie razhladaŭ materyjały i ŭrešcie admoviŭsia vydavać jaho, bo sprava była pryznanaja palityčna matyvavanaj.

Pavialičyć

Rasijskija śpiecsłužby pra Čyčvarkina nie zabyli.

10 krasavika 2024 hoda brytanskaja palicyja aryštavała 20-hadovaha žychara Łondana Dyłana Erła.

Padčas rasśledavańnia vyśvietliłasia, što Erł pierapisvaŭsia ŭ Telegram z ananimnym kantaktam pad nikam Minsk KGB, a paźniej atrymlivaŭ instrukcyi ad kuratara z akaŭnta Privet Bot.

Pavialičyć

Jamu zahadali pravieści raźviedku dvuch restaranaŭ — Hide i Hedonism Wines na zachadzie Łondana, jakija naležać Čyčvarkinu. Pavodle zadańnia, ustanovy treba było spalić, a samoha biznesmiena — vykraści i vyvieźci ŭ Rasiju, «kab jon apynuŭsia ŭ turmie».

A što ŭ Biełarusi?

Pra padobnyja apieracyi z vykradańniem za miažoj biełaruskimi śpiecsłužbami pakul nie viadoma.

Ale možna zhadać inšyja niebiaśpiečnyja precedenty. Naprykład, pasadku ŭ mai 2021 hoda samalota Ryanair z Ramanam Pratasievičam i Safijaj Sapiehaj na borcie. Tady rejs prymusova pasadzili ŭ Minsku, a Pratasieviča i Sapiehu zatrymali.

Ci zatrymańnie ŭ listapadzie 2024 hoda ŭ Vjetnamie byłoha kalinoŭca Vasila Vieramiejčyka. Ale tut razmova idzie pra ŭzajemadziejańnie śpiecsłužbaŭ dźviuch krain (ci prynamsi dazvoł na apieracyju), a nie tajemnaje vykradańnie.

• 0
• 0
• 1
• 6
• 0
• 0
• 0
• 0