U Varšavie pierapachavajuć piśmieńnika Siarhieja Piasieckaha

Cyrymonija pačniecca ŭ 12:00 ŭ Palavym kafiedralnym sabory Vojska Polskaha (Długa 13/15). Paśla słužby pareštki piśmieńnika buduć pachavanyja na vajskovych mohiłkach Pavonzki.

Siarhiej Piasiecki (1901—1964) naradziŭsia ŭ Lachavičach u siamji, dzie maci była biełaruskaj, a baćka — rusifikavanym palakam. Padčas Pieršaj suśvietnaj vajny jaho siamja evakujavałasia ŭ rasijski horad Uładzimir. 

Padčas kastryčnickaha pieravarotu ŭ 1917 hodzie Piasiecki apynuŭsia ŭ Maskvie, a žachlivyja ŭmovy balšavickaha teroru zrabili jaho adkrytym antykamunistam. U 1918 hodzie jon viarnuŭsia ŭ Minsk i dałučyŭsia da baraćby z balšavikami: spačatku ŭ biełaruskich partyzanskich atradach «Zialony Dub», potym u Litoŭska-Biełaruskaj dyvizii polskaha vojska. Paśla vajny jon pierajechaŭ Rakaŭ i piać hadoŭ zajmaŭsia kantrabandaj.

U 1927 hodzie polski sud asudziŭ jaho na 15 hadoŭ turmy za rabaŭnictva. U turmie Piasiecki pačynaje pisać litaraturnyja tvory, a administracyja turmy nie pieraškadžała jaho zaniatkam. Rodnymi movami Piasieckaha byli biełaruskaja i ruskaja, a polskaja była vyvučana paźniej, što robić jaho tvory lohkimi dla čytańnia biełarusami ŭ aryhinale.

Turemnaja proza Piasieckaha pryciahnuła ŭvahu polskaha piśmieńnika, taksama vychadca ź Biełarusi Mielchijora Vańkoviča, jaki padtrymaŭ jaho ŭ vydańni pieršaj knihi «Kachanak Vialikaj Miadźviedzicy», što pryniesła Piasieckamu vialikuju papularnaść i dapamahła vyjści na volu raniej času.

Padčas Druhoj suśvietnaj vajny jon udzielničaŭ u dziejnaści Armii Krajovaj na Vilenščynie. Paśla vajny emihravaŭ u Italiju, a potym u Vialikabrytaniju, dzie praciahvaŭ pisać i vydavać svaje tvory. Pamior ad raku lohkich, byŭ pachavany ŭ horadzie Hastynhs.

Tvorčaść Piasieckaha była pryśviečanaja krajnim žyćciovym situacyjam i pryhodam. Pieršy raman «Piaty etap» byŭ kanfiskavany turemnaj cenzuraj, a aŭtabijahrafičny «Kachanak Vialikaj Miadźviedzicy» vyjšaŭ u 1937 hodzie i prynios piśmieńniku suśvietnuju viadomaść. Taksama viadomyja jaho antysavieckija satyryčnyja tvory, naprykład, «Zapiski aficera Čyrvonaj Armii».

Tvory Piasieckaha adroźnivajucca čornym humaram i hłybokim, časam balučym padychodam da žyćcia. Jon napisaŭ 12 ramanaŭ, navieły, kinascenaryi i publicystyčnyja artykuły, a pa jaho tvorach zdymalisia filmy i sieryjały, u tym liku ŭ Italii pavodle «Kachanka Vialikaj Miadźviedzicy». Mnohija jaho tvory pierakładzienyja na biełaruskuju movu.

• 16
• 0
• 0
• 0
• 0
• 0
• 0
• 2