Uviečary 22 vieraśnia Maskva trapiła pad ataki bieśpiłotnikaŭ. Pra heta paviedamiŭ mer stalicy Rasii Siarhiej Sabianin u svaim telehram-kanale.
Pavodle słoŭ Sabianina, siły supraćpavietranaj abarony Ministerstva abarony Rasii źbili siem dronaŭ. Pa papiaredniaj infarmacyi, paškodžańniaŭ i achviar niama, a ekstrannyja słužby ŭžo pracujuć u tych miescach, dzie zafiksavali padzieńni abłomkaŭ.
Paźniej mer Maskvy ŭdakładniŭ, što było pierachoplena jašče dva bieśpiłotniki.
Žychary Maskvy i bližejšaha Padmaskoŭja paviedamlali ŭ sacsietkach pra hučnyja vybuchi. Asabliva šmat sihnałaŭ pastupiła z padmaskoŭnych Nachabina, Adzincoŭskaj akruhi, Reutava, Zialenahrada, a taksama z maskoŭskich rajonaŭ Kańkova, Hovarava, Kuźminki, Čartanava, Paŭdniovaje Butava, Chamoŭniki i Skołkava.
Niekatoryja ŚMI i telehram-kanały śćviardžali, što ŭ staličnych aeraportach uviali płan «Dyvan», jaki praduhledžvaje abmiežavańnie palotaŭ u vypadku pahrozy. Ale aficyjny pradstaŭnik Rasavijacyi Arciom Karaniaka nazvaŭ hetyja paviedamleńni niedakładnymi i zajaviŭ, što aeraporty Šaramiećcieva, Unukava, Damadziedava i Žukoŭski prymajuć i adpraŭlajuć rejsy ŭ štatnym režymie. Jon taksama adznačyŭ, što śpiecyjalisty ŭzmacnili manitorynh, kab harantavać biaśpieku cyvilnych palotaŭ.
Tym nie mienš, paźniej usio ž było paćvierdžana, što ŭ aeraporcie Šaramiećcieva ŭviali časovyja abmiežavańni.
U toj ža čas žycharoŭ Novaj Maskvy pierapałochaŭ hruzavy samalot, jaki lacieŭ vielmi nizka. Transpartniku, jak miarkujecca, daviałosia lacieć na małoj vyšyni padčas ataki BPŁA i zakryćcia aeraporta Šaramiećcieva.
Ministerstva abarony Rasii situacyju pakul nie kamientavała. Apošni raz viedamstva aficyjna paviedamlała pra padobny incydent 12 vieraśnia, kali nad Maskoŭskaj vobłaściu było pierachoplena dzieviać bieśpiłotnikaŭ.
Ciapier čytajuć
«Łukašenku nielha nazvać navat małodšym partnioram Pucina». Kit Kiełah raskazaŭ pra rolu Łukašenki ŭ pieramovach ZŠA i Rasii11
Kamientary