Jak žurnalistka «Našaj Nivy» šukała paru na pravasłaŭnym sajcie znajomstvaŭ. Padkaciŭ i Tałaj
Navat na pravasłaŭnym sajcie znajomstvaŭ Alaksiej Tałaj chvalić Łukašenku i Pucina. Praŭda, kab zacikavić tam paralimpijca, daviałosia pabyć 20‑hadovaj cnatliŭkaj.
«Azbuka viernaści» — heta sajt znajomstvaŭ, aryjentavany ŭ pieršuju čarhu na pravasłaŭnych. Dla ekśpierymientu žurnalistka «Našaj Nivy» stvaryła niekalki akaŭntaŭ ź dziaŭčatami i žančynami roznych hadoŭ.
Ad pravasłaŭnych patryjotaŭ da kastrulščykaŭ
Uličvajučy śpiecyfiku sajta, niekatoryja pytańni ŭ ankiecie, jakuju prapanoŭvajuć zapoŭnić pry rehistracyi, niebanalnyja. Tam cikaviacca, naprykład, ci majecie vy intymnaje minułaje i ci hatovyja razhladać u jakaści partniora čałavieka, jaki takoje minułaje maje.
Adkazy byvajuć davoli fiłasofskija: «Dla mianie maje značeńnie niekranutaść dušy dziaŭčyny, heta značyć kolki tam jość volnaha miesca, jakoje jašče nikim nie zaniata. Nakolki ja mahu stać dla jaje pieršym i adzinym. A voś što da mienavita seksualnych suviaziaŭ, to mianie cikavić jaje staŭleńnie da ich. Heta značyć, heta dla jaje radasnyja ŭspaminy, napoŭnienyja zadavalnieńniem, niachaj i zabaronienym, ci ž dla jaje heta toje, što chočacca chutčej zabycca i ścierci z pamiaci. Heta toje, što jaje mučyć i raździraje. Ja maju na ŭvazie jaje škadavańni z nahody taho, što jana nie zachavała siabie dla svajho adzinaha miłaha, samaha rodnaha i blizkaha, budučyni svajho muža. Što da jaje dakranaŭsia(lisia) chtości akramia jaho».
Na sajcie ŭražvajuć mužčyny, jakija paśpieli pabyvać u šlubie niekalki razoŭ, majuć dziaciej, ale pry hetym upeŭnivajuć u tym, što nijakaha intymnaha minułaha nie majuć.
Darečy, u ankiecie pytajucca taksama, ci hatovyja vy žyć z partnioram bieź cialesnych adnosin, jak brat i siastra. A siarod dziesiaci prykazańniaŭ internet-znajomstvaŭ asobna nahadvajuć: «Kali vam prapanujuć intymnuju suviaź da ŭstupleńnia ŭ šlub, viedajcie, što z punktu hledžańnia pravasłaŭja — heta jość mienavita hrech. Rana, jakaja nanosicca čałavieku samomu sabie i mučyć jaho. Raim nie praciahvać znosiny z takim čałaviekam. Intymnaja blizkaść mahčymaja tolki pamiž mužam i žonkaj».
Jość i ceły błok pytańniaŭ, jakija tyčycca taho, nakolki vy aktyŭna prytrymlivajeciesia chryścijanskich kaštoŭnaściaŭ i ci ŭdzielničajecie ŭ žyćci carkvy.
Uzdymajucca i pobytavyja pytańni: «Ci lubicie vy hatavać?» — takoje, darečy, dapamahaje chutka vyznačyć tak zvanych kastrulščykaŭ. «Haładaju. Čakaju tuju adzinuju, kab pryhatavała što-niebudź smačnieńkaje», — piša ŭ ankiecie 49‑hadovy mužčyna z Baranavičaŭ. Jon ža paznačaje, što lubić paradak, ale samamu jaho składana padtrymlivać, tamu šukaje haspadyniu.
Ad sumlennaści, ź jakoj biełaruskija mužčyny raskazvajuć pra siabie, časam nie viedaješ, paśmichacca ci płakać. Tak, 50‑hadovy Alaksandr, jaki nikoli nie byŭ u šlubie, ale vielmi hetaha choča, na pytańnie «Jakim sportam vy zajmajeciesia?» adkazvaje: «Bolš pa televizary hladžu».
A 52‑hadovy słuččak na pytańnie «Ab čym škadujecie bolš za ŭsio?» piša: «Što nie staŭ miljanieram. Hospad chutka heta vypravić». Taksama pryznajecca, što «pje redka, ale mietka».
«Palitykaj nie cikaŭlusia!»
U ankiecie jość navat takija pytańni, ščyry adkaz na jakija ŭ biełaruskich realijach moža pryvieści ŭ SIZA. Naprykład, «Vašy palityčnyja pohlady?» Ale biełaruskich mužčyn tak prosta nie padmanieš.
«U palityku nie ŭmiešvajusia», — surova adkazvaje 39‑hadovy hamialčuk.
«Apalityčny čałaviek!» — piša pra siabie inšy.
A minčuk kala 40 hadoŭ nazyvaje siabie pravasłaŭnym patryjotam.
Jašče adno pytańnie z hetaj sieryi — «Što b vy chacieli źmianić u rodnaj krainie?». Zvyčajna jaho ŭsio ž prapuskajuć. Ale niechta pryznajecca, što chacieŭ by pavialičyć siaredni zarobak. A voś 35‑hadovy žychar stalicy chacieŭ by zabaranić u Biełarusi aborty, supraćzačatkavyja tabletki dy sužyćcio biez šlubu.
Tym časam 49‑hadovy minčuk maryć: «Leta b ciaplejšaje».
Zamiest dykpikaŭ — rekamiendacyi ad jepiskapa
Kali vas cikavić, ci dasyłajuć žančynam na pravasłaŭnym sajcie znajomstvaŭ dykpiki, dyk nie. Zatoje mužčyna moža amal u pieršym paviedamleńni napisać, što hatovy pakazać rekamiendacyju ad archijepiskapa pa zapatrabavańni. A jašče adnojčy mnie prapanavali sumiesnuju malitvu.
U adroźnieńnie ad zvyčajnych sajtaŭ ci dadatkaŭ dla znajomstvaŭ tut mužčyny nastrojeny davoli rašuča i jak praviła nie źnikajuć paśla pieršaha panyłaha «Pryviet». Niechta adrazu vysyłaje padrabiaznaje reziume z raspoviedam pra siabie i svaje dasiahnieńni pačynajučy z małodšaj hrupy dziciačaha sadka. A naprykancy dadaje: «Pry ŭzajemnaj simpatyi budu rady stvaryć ščaślivy sajuz i prajści z vami darohami kachańnia i ščaścia».
34‑hadovy mužčyna z «ŁNR» chucieńka pacikaviŭsia: «Nu što, ty płanuješ naradžać ci nie?». Prapanavaŭ pierajechać da jaho ŭ Łuhansk.
Uvohule, achvotnych pieravieźci da siabie pravasłaŭnuju niaviestu ź Biełarusi bolš čym dastatkova. Jość navat mužčyny, jakija žyvuć u Jeŭropie, ale hatovyja pryjechać pa dziaŭčynu ŭ samuju čystuju (pa viersii BT) krainu śvietu.
Aktyŭniej za ŭsich dziejničajuć rasijanie. Składana navat padličyć, kolki było pytańniaŭ ź sieryi: «Ci hatovy vy pierajechać u Varoniež? Abo tolki mužčyna ź Biełoruśsii moža skaryć vaša serca?».
Cikavaja svojeasablivaść sajta — chapaje mužčyn, jakim bolš za 70 hadoŭ. Praŭda, u hetym vypadku ŭ jakaści fota zvyčajna stajać adskanavanyja zdymki z pašpartu. A ankiety ŭražvajuć niepadrychtavanych dziaŭčat frazami kštałtu «Možna pisać błudnicam, jakija stali na šlach vypraŭleńnia».
Jabaćki ŭsich maściej
Pravasłaŭny sajt znajomstvaŭ — darečy, nadziejnaje miesca, kab sustreć kahości ź jabaciek. Tut jość i vajskoviec, jaki kumiram ličyć praŭładnaha śviatara Andreja Lemiašonka, i ideołah z čyrvona-zialonym ściažkom na pinžaku, jaki budzie raspaviadać, što najaŭnaść hrošaj u siamji — heta nie vielmi važna.
Pisaŭ mnie i pakryŭdžany na ŭvieś śviet praŭładny žurnalist adnoj z rajonnych haziet. Taho navat sajt baniŭ na niekatory čas za nadta ahresiŭnuju ankietu: «Pavažanyja ŭcarkoŭlenyja, kali vy adčuvajecie pa pierapiscy, što ŭzrovień viery, B-h, dumaju, mianie za heta prabačyć, nie adpaviadaje vašamu, prośba nie turbavać! Ja pra žoŭć padčas hutarki pa telefonie. Paśla razmovy z takimi pačynaju razumieć adnaho vielmi viadomaha palityka, kali jon kaža, što pravasłaŭny ateist!»
Alaksiej Tałaj: «Kumiry — Łukašenka i Pucin»
Litaralna praz hadzinu na sajcie znajomstva ad mužčynskaj uvahi pačynaje kružycca hałava. Paviedamleńni źjaŭlajucca z kaśmičnaj chutkaściu. Dziasiatki adnatypnych pytańniaŭ prysyłajuć adnačasova.
Tamu ŭ niejki momant ty pačynaješ błytacca ŭ tych, z kim pačała razmovu. U chutkim časie źjaŭlajucca i pieršyja pakryŭdžanyja — tyja, kamu nie padabajecca, što dziaŭčyna nie adkazała za 10 siekundaŭ.
Siarod tych, chto źviarnuŭ uvahu na mianie, akazaŭsia paralimpijec Alaksiej Tałaj. Paśla taho, jak na «Našaj Nivie» vyjšaŭ tekst pra jaho druhi razvod, mužčyna vyrašyŭ bolš nie chavać hetaha fakta svajoj bijahrafii i pačaŭ adkryta šukać žonku numar try. U ankiecie jon ščyra piša pra dva niaŭdałyja šluby i čaćviarych dziaciej.
Siabie Alaksiej nazyvaje «mužčynam, praŭda, źlohku patrapanym u bajach». Jon šukaje chatniuju, dalikatnuju, utulnuju, kłapatlivuju i žyćciaradasnuju dziaŭčynu. Adnahodki (navat jakija cudoŭna vyhladajuć) jaho nie cikaviać. Z usich fejkavych ankiet jon vyrašyŭ napisać cnatlivaj dziaŭčynie, jakaja małodšaja za jaho bolš čym na 20 hadoŭ.
Ad šlubu Alaksiej čakaje novych dziaciej. Pry hetym stanoŭča stavicca da sužyćcia. Darečy, sa svajoj druhoj kachanaj mužčyna ažaniŭsia amal praź siem hadoŭ sumiesnaha žyćcia, kali jana była ciažarnaja druhi raz. Ničoha, što pravasłaŭny ž sajt znajomstvaŭ da takoha stavicca niehatyŭna i raić nie kamunikavać z tymi, chto prapanoŭvaje seks da šlubu.
Na pytańnie pra sens žyćcia mužčyna adkazaŭ tak: «Siamja, paznańnie siabie, prasoŭvańnie ŭ razumieńni Boha, ščaślivyja dzieci, mirnaje žyćcio, praciah rodu, ščaślivaja Ajčyna».
Bavić čas jon lubić na pryrodzie, u basiejnie ci ŭ saŭnie. Siarod intaresaŭ paznačyŭ kino, čytańnie, daču, sad i aharod.
Prykładami dla siabie Alaksieja nazyvaje abaroncaŭ Ajčyny, vieteranaŭ VAV dy «inšych kanfliktaŭ», a taksama Łukašenku i Pucina.
Možna adznačyć, što Alaksiej davoli pryjemny surazmoŭca i, kali nie viedać usiu jaho historyju (i nie vielmi ŭvažliva čytać ankietu), to robić jon stanoŭčaje ŭražańnie.
«Vaj, ty mianie skaryła!» Žurnalistka «Našaj Nivy» prateściravała rasijski anałah Tinder
«Pačućciu humaru i pryhažości dziciaci buduć zajzdrościć vašy siabroŭki i čužyja dzieci». Jak ja šukała donara, kab zaciažaryć
Nie tolki Tinder. Dzie ciapier šukać paru — na ŭsio žyćcio i na adnu noč
«Užo naźbirała harem z arabaŭ i turkaŭ, ale jaki sens?» Biełaruska pra toje, jak šukaje muža na sajtach znajomstvaŭ
Kamientary
mo i tam jaki znajomy tvar sustreniecca.