Viadomy paralimpijec baluča pieražyvaje razryŭ i zaklikaje zabaranić žančynam dostup u sacyjalnyja sietki, bo «instahram — zbroja masavaha źniščeńnia siemjaŭ i losaŭ dziaciej i mužčyn».
Pieršy raz Alaksiej Tałaj ažaniŭsia, kali jamu było 20 hadoŭ. Abrańnicaj stała školnaja siabroŭka Maryja Dasužaja. Jana padtrymlivała Tałaja paśla niaščasnaha vypadku, kali chłopcu adarvała ruki i nohi znojdzienaj minaj.
Maładyja ludzi stali bavić čas razam. Pa słovach Alaksieja, kali jon zrazumieŭ, što adnosiny ŭžo pierajšli ŭ katehoryju surjoznych, to prapanavaŭ Maryi rasstacca — bo nie chacieŭ sapsavać žyćcio dziaŭčynie. Jana pakryŭdziłasia na takija słovy i skazała, što nikoli nie kinie kachanaha.
Para pabrałasia šlubam u 2003-m, naradzilisia dvoje synoŭ — Mark i Uładzisłaŭ. Jany ŭžo darosłyja. Małodšy Uładzisłaŭ letaś pajšoŭ słužyć u śpiecnaz (advučyŭsia jon u Minskim dziaržaŭnym kaledžy na cieślara). Starejšy Mark, pa słovach baćki, prachodzić słužbu ŭ Instytucie pamiežnaj słužby.
U 2010 hodzie Alaksiej i Maryja aformili razvod. Tałaj kazaŭ, što prablema była ŭ tym, što jon staŭ bolš času nadzialać biznesu, sportu i dabračynnaści, a nie žoncy. Ale ŭ žyćci synoŭ, maŭlaŭ, praciahvaŭ udzielničać.
Z druhoj žonkaj — Anastasijaj Frankovaj — Tałaj paznajomiŭsia ŭ sacsietkach. Kaža, pabačyŭ zdymki pryhožaj dziaŭčyny, pasumniavaŭsia krychu, ale vyrašyŭ usio ž napisać.
Jak paśla raspaviadała Anastasija ŭ intervju, jana spačatku nie viedała ničoha pra invalidnaść mužčyny, bo ŭ taho ŭ akaŭncie byli tolki partretnyja zdymki.
Dziaŭčyna pryznavałasia, što kali b ź joj na vulicy pasprabavaŭ paznajomicca mužčyna na invalidnym vazku, to jana chutčej za ŭsio admoviłasia b.
«Kali ŭ nas pačalisia adnosiny, ja sustreła vialikaje nierazumieńnie ŭ hramadstvie. Heta było ci nie samaje strašnaje, što ja pieražyła, — raspaviadała ŭ 2021 hodzie Anastasija. — Mama płakała, stajała na kaleniach i prasiła, kab ja nie rabiła hłupstva. A potym skazała źbirać rečy i iści žyć da jaho: maŭlaŭ, kab ja zrazumieła, jak heta, i viarnułasia».
Mnohija nie mahli zrazumieć taki raman.
«Kazali, što ja ŭ jaho siadziełka, što heta ŭsio prosta dla karcinki, što ja ź im tolki dziela hrošaj. A potym ja zaciažaryła, i mama supakoiłasia, pryniała situacyju. Ciapier u ich z Alaksiejem narmalnyja adnosiny, ale ŭsio roŭna jość niejkaja niedamoŭlenaść».
Anastasija naradziła ŭ adnosinach z Alaksiejem dačku Darju i jašče adnaho syna — Jarasłava. U 2014 hodzie padčas zapisu rasijskaha šou «Niachaj havorać» Tałaj prapanavaŭ kachanaj stać jaho žonkaj. Dajšli da ZAHSu jany tolki ŭ 2017 hodzie, kali Anastasija była ciažarnaja druhi raz. Viasielle było ścipłym: raśpisalisia, a paśla pasiadzieli ŭ kafe razam z samymi blizkimi siabrami.
Adnosiny ŭ siamji, pa słovach Anastasii, składvalisia nie vielmi prosta:
«Na moj pohlad, samaje ciažkaje ŭ siamiejnym žyćci — heta sastupać adno adnamu. My z Alaksiejem zusim roznyja, jak iń i jan. Ja padtrymlivaju i dapaŭniaju jaho, jon — mianie. Bieź jaho ja ŭžo nie toj čałaviek. I jamu treba ŭ mianie pavučycca peŭnaj miakkaści. Sastupać i prysłuchoŭvacca adno da adnaho vielmi važna. Kaniečnie, jak i ŭ luboj siamji, u nas byvajuć kanflikty. Asabliva šmat ich zdarałasia padčas karanavirusa, kali my sutkami siadzieli doma. Heta było ciažka».
Čutki pra toje, što adnosiny ŭ siamji razładzilisia, chadzili nie pieršy miesiac.
U sacsietkach Tałaj niadaŭna repościŭ mizahinnaje videa, pryśviečanaje tamu, što žančyn ničoha dobraha nie čakaje paśla razvodu, bo jany ŭpuścili svajo ščaście — a potym vydaliŭ.
U svaim telehram-kanale paraalimpijec apublikavaŭ vielizarny dopis z zahałoŭkam: «Baby rujnujuć svaje siemji». U im Tałaj zaklikaŭ zabaranić žančynam dostup u sacyjalnyja sietki, bo «instahram — zbroja masavaha źniščeńnia, parazy (siemjaŭ, losaŭ dziaciej, mužčynskich losaŭ)… Durnaja žančyna hatovaja dziela łajkaŭ, prahladaŭ i kamientaroŭ (uvahi da siabie), tvaryć dzič…».
Pa mierkavańni Alaksieja, žančynam pramyli mozh roznaha kštałtu psichołahi i treniery asabistaha rostu: «Jarkija karcinki, stvoranyja błohierkami — čaściakom pustyja vyjavy ŭjaŭnaha ščaścia «na Maldyvach», vielizarnyja bukiety kvietak, uziatyja ŭ arendu instasamkami dziela bahataj karcinki ŭ arendnym hateli, prymušajuć žančyn, jakija prahnuć usio bolšaha i bolšaha, zadumacca, što ŭ ich žyćci čahości nie chapaje — siamji (muž drenny čahości niedadaŭ), vyrakajučy svaich dziaciej na biezbaćkoŭščynu!».
Alaksiej niekalki razoŭ za noč publikavaŭ i vydalaŭ dopis ź biaskoncymi pretenzijami da žančyn sa svajho telehram-kanała.
Znajomyja Alaksieja Tałaja paćvierdzili «Našaj Nivie», što jon raźvioŭsia z druhoj žonkaj i ciažka pieražyvaje razryŭ.
Ciapier čytajuć
Čakajecca novy raŭnd pieramovaŭ miž Biełaruśsiu i ZŠA — litoŭski ŚMI9
Čakajecca novy raŭnd pieramovaŭ miž Biełaruśsiu i ZŠA — litoŭski ŚMI
Jak razhuł pryrody viarnuŭ cieły Barbary Radzivił i vialikaha kniazia Alaksandra i čamu tajamnicu źniknieńnia ichnich rehalij zmahli raskryć tolki ciapier44
Jak razhuł pryrody viarnuŭ cieły Barbary Radzivił i vialikaha kniazia Alaksandra i čamu tajamnicu źniknieńnia ichnich rehalij zmahli raskryć tolki ciapier4
«Kali ciapier chierova, značyć, heta jašče nie kaniec». Pahutaryli z epatažnym «śviatarom XXI stahodździa», pra jakoha nie było čuvać piać hadoŭ paśla aryštu66
Kamientary