AP$ENT stanie chedłajnieram biełaruskaha fiestyvalu «Letucień» u Krakavie
1 žniŭnia ŭ krakaŭskim parku Jordana projdzie siomy fiestyval biełaruskaj kultury i muzyki «Letucień». U prahramie try muzyčnyja sceny, kirmaš majstroŭ, adukacyjnyja i dziciačyja aktyŭnaści, fudkort i sustrečy biełaruskaj supolnaści, piša vydańnie Most.
«Letucień» — niezaležny fiestyval biełaruskaj kultury, jaki ŭžo siomy hod arhanizuje kamanda vałancioraŭ. Sioleta prajekt atrymaŭ padtrymku Jeŭrapiejskaha Sajuza. Adnak, jak paviedamlajuć arhanizatary, hetaja dapamoha nie kampiensuje ŭsich vydatkaŭ na arhanizacyju. Arhanizatary prapanujuć padtrymać fiestyval danatam abo dałučycca da vałanciorskaj kamandy.
Na hałoŭnaj scenie vystupiać Prypiac, Atesta, «Raźbitaje Serca Pacana», Nochy i Sam Šazam. Chedłajnieram fiestyvalu stanie AP$ENT.
Na etna-scenie vystupiać Stefan Aryzanaŭ, hurty «Laleja» i Dusza Music. Tut taksama projduć prezientacyja «Kupalskaha śpieŭnika», majstar-kłas pa tradycyjnych śpievach z Volhaj Baryšnikavaj, majstar-kłas pa biełaruskich tancach ad Dusza Dance i «Prypievačny batł». Udzielniki zmohuć razam śpiavać biełaruskija prypieŭki.
Na elektronnaj scenie vystupiać Dub Hiker, T-Trider, Lil Yury, Korrrnej, Ana Zhdanova i Papa Bo Selektah.
Na terytoryi fiestyvalu buduć pracavać dziciačaja, adukacyjnaja, psichałahičnaja i spartyŭnaja placoŭki, zona majstar-kłasaŭ, a taksama prastora biełaruskich hramadskich arhanizacyj.
Na kirmašy svaje pracy pradstaviać bolš za 40 biełaruskich ramieśnikaŭ, mastakoŭ i łakalnych brendaŭ. Biełaruskija fud-prajekty prapanujuć tradycyjnyja i sučasnyja stravy nacyjanalnaj kuchni.
Fiestyval pačniecca z «Letutydnia»
Mierapryjemstvy pačnucca jašče da asnoŭnaha dnia fiestyvalu.
29 lipienia projdzie anłajn-lekcyja Mikity Moniča «Biełaruskija mastaki ad CHII da XXI stahodździa».
30 lipienia adbudziecca viečar litaratury i śpievaŭ «Letutekst». Na nastupny dzień, 31 lipienia, projdzie «Dyjafilm Live», padčas jakoha staryja dyjafilmy ažyvuć dziakujučy žyvoj ahučcy akcioraŭ i muzykaŭ.
Fiestyval projdzie 1 žniŭnia ŭ parku Jordana ŭ Krakavie. Pačatak ab 11.00. Uvachod volny.
Ciapier čytajuć
Biznesoviec rodam z Babrujska admovicca ad svajho hihanckaha aŭstralijskaha zarobku dziela šancu atrymać $35 miljonaŭ2
Kamientary