«Kanapa za 6 tysiač pieratvaryłasia ŭ razvalinu». Biełarusy krytykujuć jakaść mebli «Pinskdreŭ»
Biełaruska padzialiłasia ŭ tyktoku videa, u jakim paskardziłasia na kanapu «Ryčmand» ad «Pinskdreva». Mebla kaštavała kala 6 tysiač rubloŭ, ale ŭžo praź dzieviać miesiacaŭ pačała rassypacca: pravaliłasia spalnaja častka, vyrvaŭsia šnur, stała łamacca draŭlanaja doška. Žančyna adznačyła, što kanapa vykarystoŭvajecca niačasta, tamu chutkaja pałomka jaje aburyła. U kramie paabiacali zamianić tavar, piša BGMedia.
Pad hetym dopisam razharełasia dyskusija. Bolšaść karystalnikaŭ pahadzilisia, što «Pinskdreŭ» u apošnija hady značna straciŭ u jakaści:
«U mianie taksama była kutniaja kanapa. Praz dva hady daviałosia vykinuć, tamu što ramantavać jaje nichto nie ŭziaŭsia»;
«Kuplaŭ dzieciam łožki. Pavioŭsia na brend, maŭlaŭ jakaść. A akazałasia, što ŭ «Ami-mebla» robiać nie horš, dy i ŭ dva razy tańniej»;
«Taksama kupiła kutniuju kanapu ŭ «Pinskdrevie». Paśla šaści miesiacaŭ vykarystańnia nie kanapa, a nie zrazumieła što. My tolki na joj siadzim, kali hladzim televizar. I heta vielmi redka».
Byłyja supracoŭniki fabryki taksama paćviardžajuć: navat darahija madeli ciapier robiacca na asnovie DSP, tamu słužać niadoŭha.
Mnohija biełarusy pryznajucca, što ŭžo daŭno kuplajuć meblu ŭ pryvatnikaŭ ci ŭ inšych vytvorcaŭ: i tańniej, i nadziejniej. Pryvodziać prykłady — «Saŭłukoŭ» ź Viciebska ci «Ami-mebla». Ludzi kažuć: «U Ami za takija hrošy možna ŭziać šeść kanapaŭ i mianiać kožny hod — usio adno budzie vyhadniej».
Niekatoryja kamientatary, praŭda, abaraniajuć «Pinskdreŭ», pryhadvajučy staruju meblu, jakaja słužyć dziesiacihodździami:
«U baćkoŭ kanapa staić užo 20 hadoŭ, da hetaha času jak novaja. Ale, napeŭna, tyja časy prajšli»;
«U nas kutniaja kanapa «Pinskdreŭ» 14 hadoŭ, vykarystoŭvajecca dla snu, usio vydatna».
U cełym abmierkavańni zaśviedčyli, što kaliści pavažany brend «Pinskdreva» ciapier stračvaje davier.
Kamientary