Ukrainskaja apieracyja «Pavucińnie» mahła sarvacca ŭ apošni momant — pilny dalnabojščyk znajšoŭ bieśpiłotniki ŭ korpusie

Apieracyja, jakuju kaardynavała siamiejnaja para ahientaŭ u Čalabinsku, akazałasia na miažy zryvu ŭ apošnija dni padrychtoŭki, kali kiroŭca adnoj z fur, što pieravozili drony, znajšoŭ bieśpiłotniki.

Jak piša WSJ, usio pačałosia vosieńniu 2023 hoda, kali Uładzimir Zialenski vyklikaŭ kiraŭnika SBU Vasila Maluka. Rasija teraryzavała ŭkrainskija harady rakietami z samalotaŭ, jakija znachodzilisia pa-za zonaj dziejańnia ŭkrainskaj SPA, a pierachopnikaŭ katastrafična nie chapała. Było vyrašana bić pa samalotach na ziamli. Adnak zvyčajnyja dalnabojnyja drony mieli abmiežavanuju mahutnaść, tamu SBU raspracavała płan zapusku naŭprost z terytoryi Rasii.

Uźnikła ideja vykarystać u jakaści puskavych placovak dla dronaŭ zbornyja modulnyja domiki pamieram z marski hruzavy kantejnier, jakija pieravoziacca na hruzavikach. Dla dachaŭ, pad jakimi chavalisia bieśpiłotniki, inžyniery stvaryli ŭnikalnuju sistemu zamkoŭ. Miechanizm byŭ sprajektavany tak, kab paneli aŭtamatyčna adsoŭvalisia pry atrymańni dystancyjnaha sihnału. Sami domiki byli abstalavany akumulatarami i soniečnymi panelami, kab padtrymlivać suviaź z Ukrainaj i trymać drony zaradžanymi.

Słužba biaśpieki Ukrainy pieršapačatkova płanavała pravieści apieracyju da Dnia Pieramohi, adnak jaje pryjšłosia adkłaści praź niečakanyja prablemy. Niekalki kiroŭcaŭ fur, zadziejničanych u pieravozcy hruzu, pra źmieściva jakoha jany nie viedali, padčas praciahłych śviat — Vialikdzień, 1 maja i pierad 9 maja napilisia. Hety čałaviečy faktar ledź nie sarvaŭ płany, jakija praduhledžvali sinchranizavanuju ataku.

U vyniku piać hruzavikoŭ ź bieśpiłotnikami adpravilisia da vajskovych aeradromaŭ u Razanskaj, Ivanaŭskaj, Murmanskaj, Irkuckaj i Amurskaj abłaściach z Čalabinska paźniej — z 23 pa 26 maja.

Pavialičyć

Incydent na trasie i trahiedyja z kiroŭcam

Na miažy zryvu apieracyja akazałasia, kali z adnoj z fur źjechaŭ dach za 290 kiłamietraŭ ad Čalabinska. Kiroŭca, jaki ničoha nie padazravaŭ, spyniŭsia i znajšoŭ unutry «domika» schavanyja drony. Jon u panicy patelefanavaŭ uładalniku łahistyčnaj kampanii Arciomu Cimafiejevu, jaki tajemna ad dalnabojščykaŭ kaardynavaŭ apieracyju pad kiraŭnictvam SBU.

Supakoiŭšy kiroŭcu, Cimafiejeŭ źviazaŭsia z supracoŭnikam SBU, jaki paraiŭsia z Malukom. U Kijevie ŭ hety momant panavała napružańnie: što, kali dalnabojščyk nie zdoleje pastavić dach nazad? Što, kali rasijskija śpiecsłužby nazirajuć za im? Što, kali jon raskaža žoncy, a jana raskaža siabram?

Na ruku ŭkraincam zhulała toje, što dalnabojščyk nie moh bačyć schavanuju razam z dronami vybuchoŭku — jana była ŭmantavanaja ŭ korpusy aparataŭ.

Kiraŭnik SBU Vasil Maluk, jaki spłanavaŭ ataku, prydumaŭ bolš-mienš praŭdapadobnaje tłumačeńnie, jakoje Cimafiejeŭ pieradaŭ kiroŭcu: domik pryznačajecca dla palaŭničych, a drony — dla adsočvańnia žyvioł. Dalnabojščyk pavieryŭ u hetuju viersiju, z dapamohaj miascovaha traktarysta pastaviŭ dach na miesca i dasłaŭ fota z podpisam: «Zakryta». Apieracyja «Pavucińnie» praciahnułasia.

Pavialičyć

Jašče adna prablema ŭźnikła ŭžo padčas apieracyi — suviaź z kabinaj adnaho z hruzavikoŭ akazałasia niestabilnaj. Heta była mašyna, jakuju pryjšłosia zamianić u apošni momant praz pałomku asnoŭnaj. Supracoŭniki SBU sprabavali instruktavać kiroŭcu, jak likvidavać niaspraŭnaść pravodki, ale jon ź niejkaha momantu pierastaŭ vychodzić na suviaź. Paźniej u internecie źjavilisia fatahrafii zharełych kabiny i hruzu. Jak miarkujecca, adbyłosia karotkaje zamykańnie, jakoje spravakavała pažar i detanacyju hruzu, u vyniku čaho kiroŭca zahinuŭ.

Kaardynatary: dydžej i tatu-majstrycha

Kaardynatary apieracyi — ukraincy Arciom Cimafiejeŭ i jahonaja žonka Kaciaryna — žyli ŭ Čalabinsku z 2018 hoda. Budučy kaardynatar pierajechaŭ tudy na zaprašeńnie baćki, jaki vałodaŭ mukamolnym zavodam. Da hetaha Cimafiejevy žyli va Ukrainie, dzie Arciom vystupaŭ jak dydžej u kłubach Kijeva, a Kaciaryna pracavała tatu-majstrychaj. U 2014 hodzie para ŭdzielničała ŭ pratestach na Majdanie. U Čalabinsku Cimafiejeŭ zaniaŭsia biznesam razam z baćkam, a jahonaja žonka praciahnuła rabić tatu.

Pavialičyć

Pierad tym jak davieryć pary kaardynacyju takoj maštabnaj apieracyi, SBU pravieryła abaich na detektary chłuśni ŭ Lvovie. Pierakanaŭšysia ŭ ich łajalnaści, śpiecsłužby navučyli Cimafiejevych zborcy dronaŭ i domikaŭ, u jakich ich płanavali pieravozić. Pry viartańni ŭ Rasiju Cimafiejevych try hadziny dapytvali na miažy supracoŭniki FSB, bo ŭ ich rasijskich pašpartach miescam naradžeńnia značyłasia Ukraina. Adnak u vyniku paru prapuścili.

Viarnuŭšysia ŭ Čalabinsk, Cimafiejeŭ zarehistravaŭ łahistyčnuju kampaniju i arandavaŭ skład u pramysłovaj zonie horada, zusim niedaloka ad miascovaha ŭpraŭleńnia FSB. Jon pačaŭ padbirać kiroŭcaŭ dla pieravozki dronaŭ.

Jak piša WSJ, jon pravioŭ hutarki prykładna z 20 kandydatami. Kiroŭcy pavinny byli być nadziejnymi, ale nie cikaŭnymi, prajści nie tolki pravierku Cimafiejeva, ale i, tajemna, pravierku SBU, jakaja aceńvała mahčymyja suviazi kandydataŭ z rasijskimi siłavikami.

Techničnaja padrychtoŭka

Kali ŭ Čalabinsk pastupiła abstalavańnie (kantrabandaj, pad vyhladam zapčastak), Cimafiejevy na arandavanym składzie pad kiraŭnictvam SBU (praź videasuviaź) za tydzień sabrali 150 dronaŭ i 8 śpiecyjalnych domikaŭ. Z furhonami akazałasia bolš składana praz toje, što dach adnaho ź ich pastajanna saślizhvaŭ z dalikatnych zaviesaŭ. Jany paramantavali jaho pavodle instrukcyjaŭ supracoŭnikaŭ SBU.

Sami drony byli vyrablenyja va Ukrainie — heta byli kvadrakoptary pamieram ź vialikuju talerku, zdolnyja nieści kala 2 kh vybuchoŭki. Sumieś była śpiecyjalna raspracavanaja tak, kab prapalvać abałonku samalotaŭ i padpalvać paliva ŭ bakach. Piłoty ŭ Kijevie treniravalisia kiravać imi cełymi dniami, napracoŭvajučy matornuju pamiać, choć da apošniaha momantu nie viedali svaich celaŭ.

Pavialičyć

Ucioki i vynik apieracyi

Cimafiejevy źjechali z Rasii za piać dzion da apieracyi. Ranicaj jany na arandavanym mikraaŭtobusie Toyota Hiace pierasiekli miažu z Kazachstanam pad vyhladam adpačynku. Z saboj jany zabrali samaje kaštoŭnaje, u tym liku kata i sabaku.

Ranicaj 1 červienia ŭ štabie ŭ Kijevie Vasil Maluk narešcie raskryŭ piłotam celi: rasijski park dalnich bambardziroŭščykaŭ. Jon pakazaŭ karty aeradromaŭ i słabyja miescy samalotaŭ.

Čatyry hruzaviki (akramia taho, što zhareŭ) zaniali pazicyi kala aeradromaŭ. Dachi domikaŭ adčynilisia, i ŭ nieba padnialisia 117 dronaŭ. Dla piłotaŭ, jakija znachodzilisia za sotni kiłamietraŭ u Kijevie, biezabaronnyja samaloty byli lohkaj mišeńniu.

Pavodle acenki SBU, 41 rasijski samalot byŭ paškodžany, jak najmieniej dziesiać ź ich — biezzvarotna. Niekatoryja zachodnija analityki miarkujuć, što hetyja ličby mohuć być zavyšanymi, spasyłajučysia na spadarožnikavyja zdymki.

Adnak SBU nastojvaje na svajoj acency, zajaŭlajučy, što Rasija sprabavała padmanuć analitykaŭ, apieratyŭna zamianiŭšy na atakavanych aeradromach paškodžanyja samaloty cełymi. Na nastupny dzień paśla ataki rasijskija ŭłady abviaścili Cimafiejeva ŭ vyšuk, ale jon užo byŭ u biaśpiecy.

• 27
• 0
• 0
• 0
• 2
• 0
• 0
• 1