Na voli Maryja Kaleśnikava, Viktar Babaryka, Maryna Zołatava, Aleś Bialacki, Maksim Znak! Ahułam vyzvaleny 123 palitviaźni
Siońnia na svabodu vyjšli bolš za 100 čałaviek. Bolšaść ź ich vysłali va Ukrainu. Vyzvaleńnie adbyłosia paśla dvuchdzionnych pieramoŭ śpiecpasłańnika Trampa Džona Koŭła i Łukašenki. Koŭł paviedamiŭ, što ZŠA zdymajuć sankcyi ź biełaruskaha kaliju, biełaruski bok — pra vyzvaleńnie palitviaźniaŭ.
Pres-słužba Łukašenki abviaściła pra vyzvaleńnie 123 čałaviek. «U ramkach dasiahnutych damoŭlenaściaŭ z prezidentam ZŠA Donaldam Trampam i pa jaho prośbie, u suviazi z admienaj niezakonnych sankcyj suprać kalijnoj haliny Respubliki Biełaruś, uviedzienych Administracyjaj papiaredniaha Prezidenta ZŠA Bajdena, i ŭ suviazi ź pierachodam u praktyčnuju płoskaść pracesu admieny inšych niezakonnych sankcyj suprać Respubliki Biełaruś» Łukašenkam było pryniata rašeńnie ab pamiłavańni 123 hramadzian roznych krain. Siarod palitviaźniaŭ — piaciora hramadzian Ukrainy.
Zhodna z paviedamleńniem, z kanca listapada Łukašenkam pamiłavana 156 čałaviek (u tym liku 31 ukrainiec i dva katalickija śviatary — Hienrych Akałatovič i Andžej Juchnievič). Siarod ich — hramadzianie Vialikabrytanii, ZŠA, Litvy, Ukrainy, Łatvii, Aŭstralii, Japonii.
Usie vyzvalenyja palitviaźni departavanyja ź Biełarusi. Bolšaść ź ich vyvieźli va Ukrainu — 114 čałaviek, 104 ź ich — biełarusy.
U Vilni ŭsio było padrychtavana da sustrečy, ale Łukašenka ŭ apošni momant źmianiŭ maršrut vyjezdu palitviaźniaŭ, zajaviła Śviatłana Cichanoŭskaja.
Andreja Pačobuta siarod vyzvalenych niama, paviedamiła MZS Polščy. Pačobutu vystavili jak umovu zvarot z prośbaj da Alaksandra Łukašenki — Pačobut admoviŭsia.
Pieršaj navinoju pra vyzvalenych palitviaźniaŭ stała toje, što Maryja Kaleśnikava na svabodzie. Jaje vysłali va Ukrainu.
Kaardynatarka štabu Viktara Babaryki, jakaja stała adnym ź simvałaŭ vybarčych padziej, była aryštavanaja 7 vieraśnia 2020 hoda. Siłaviki sprabavali vykinuć jaje ź Biełarusi, ale Maryja na miažy parvała pašpart i zastałasia na biełaruskaj terytoryi — adzin z samych dramatyčnych momantaŭ 2020 hoda. Kaleśnikavaj prysudzili 11 hadoŭ źniavoleńnia. U turmie łukašenkaŭcy ŭviali dla jaje režym inkamunikada, rodnyja nie viedali ničoha pra Maryju i jaje stan zdaroŭja.
Nobieleŭski łaŭreat Aleś Bialacki na voli. Staršynia «Viasny» byŭ zatrymany 14 lipienia 2021 hoda. Jaho asudzili da 10 hadoŭ kałonii va ŭmovach uzmocnienaha režymu.
Bialacki prybyŭ u Vilniu.
Infarmacyja pra vyzvaleńnie Valancina Stefanoviča, jakaja źjaviłasia, nie paćvierdziłasia.
«Valancin Stefanovič byŭ u śpisie na vyzvaleńnie, ale pakul dakładna nie viadoma, ci vyzvalili jaho», — paviedamiŭ pravaabarončy centr «Viasna».
Uładź Łabkovič, jaki razam sa Stefanovičam i z nobieleŭskim łaŭreatam Alesiem Bialackim, prachodziŭ pa adnoj spravie, pavodle pravaabaroncaŭ, vyzvaleny.
Viktar Babaryka — u śpisie pamiłavanych. Były kiraŭnik Biełhazprambanka i pretendent u prezidenty na vybarach-2020 byŭ zatrymany 6 lipienia 2020 hoda. Jamu prysudzili 14 hadoŭ kałonii.
Viktara taksama advieźli va Ukrainu. Sustreča Babaryki, Znaka i Kaleśnikavaj papała na videa.
Maksim Znak — na svabodzie. Maksim Znak — advakat, u 2020 hodzie siabra vybarčaha štaba Viktara Babaryki. Zatrymany 9 vieraśnia 2020 hoda, 6 vieraśnia 2021 hoda asudžany da 10 hadoŭ źniavoleńnia. Siadzieŭ u źniavoleńni ŭ poŭnaj izalacyi, u režymie inkamunikada.
Maryna Zołatava vyzvalenaja. Hałoŭnaja redaktarka partała Tut.by znachodziłasia za kratami z 18 maja 2021 hoda. U sakaviku 2023‑ha jaje asudzili na 12 hadoŭ pazbaŭleńnia voli ŭ kałonii ahulnaha režymu.
Na svabodzie vybitny litaraturaznaŭca, palitołah Alaksandr Fiaduta. Heta apošni vyzvaleny ŭdzielnik «zmovy» suprać Łukašenki. Byŭ zatrymany ŭ Maskvie 12 krasavika 2021 hoda ŭ miežach spravy ab sprobie dziaržaŭnaha pieravarotu ŭ Biełarusi. Jamu vystavili abvinavačvańnie pavodle č. 1 art. 357 Kryminalnaha kodeksu (zmova z metaj zachopu dziaržaŭnaj ułady niekanstytucyjnym šlacham). Pa hetaj spravie, akramia Alaksandra, prachodzili Ryhor Kastusioŭ, Juryj Ziankovič. Jamu prysudzili 10 hadoŭ źniavoleńnia ŭ kałonii va ŭmovach uzmocnienaha režymu.
Pavieł Sieviaryniec na svabodzie. Palityk, suzasnavalnik partyi Biełaruskaja Chryścijanskaja Demakratyja byŭ zatrymany 7 červienia 2020 hoda. Jaho asudzili da 7 hadoŭ kałonii ŭzmocnienaha režymu.
Vyzvalenaja Alena Hnauk — 68‑hadovaja palitźniavolenaja ź Bieraścia.
Vyzvaleny palitviazień Siarhiej Zielanoŭski z «Pielenha».
U śpisie vyzvalenych i departavanych ažno čaćviora supracoŭnikaŭ «Pielenha», aryštavanych padčas abłavy na pradpryjemstva.
Akramia Zielanoŭskaha, heta Karyna Prataščyk, Vadzim Žukoŭski, Iryna Suržyk.
Na svabodzie hramadzianka Litvy biełaruskaha pachodžańnia Maryja Bataljonak. Joj prysudzili 4 hady za datyčnaść da prajekta «Haradski aharod Marys Mar».
Siarod vyzvalenych Raman Hałuza. Heta hramadzianin Polščy, asudžany za zdradu dziaržavie.
Vyzvaleny Alaksandr Syryca, baskietbolny sudździa i hramadzianin Aŭstralii biełaruskaha pachodžańnia.
Na svabodzie hramadzianka Łatvii Ała Sakalenka. Joj prysudzili 7 hadoŭ za «ahienturnuju dziejnaść».
Vyzvaleny hramadzin Japonii Nakanišy Masatosi — błohier, jakoha biełaruskija ŭłady abvinavacili ŭ špijanažy. Jon pracavaŭ vykładčykam u HDU imia Skaryny.
Adpuścili Illu Kniazieva — heta 44‑hadovy minčuk, jakoha asudzili za ŭdzieł u pratestach. Jon hramadzianin Biełarusi i Ukrainy.
Na svabodzie hramadzianka ZŠA biełaruskaha pachodžańnia Natalla Bielskaja.
Vyzvaleny Viačasłaŭ Papšo, viadomy jak błohier «Žyvie».
Na voli palitviaźni Maryna Sankievič, Sofja Bačurynskaja, Uładzisłaŭ Jacenka, Siarhiej Ivancoŭ, Natalla Malec.
Vyzvaleny Dźmitryj Praziecki. Jaho asudzili za danaty.
Na svabodzie Andrej Šmaj — hramadzianin Ukrainy, asudžany za «špijanaž».
Vyzvaleny Maksim Aŭreńjeŭ. Jon ukrainiec, ale žyŭ u Biełarusi. U jaho 5 dziaciej.
Na svabodzie — Alaksandr Birula z Salihorska. Jaho žonka Taćciana taksama była palitźniavolenaj, jaje vyzvalili pa pamiłavańni ŭ vieraśni 2024 hoda. Alaksandr byŭ uziaty pad vartu za raspaŭsiud pratesnych haziet. Jamu było pradjaŭlena abvinavačvańnie ŭ paklopie na Łukašenku. Jamu pryznačyli šeść hadoŭ źniavoleńnia.
Vyzvaleny Uładzimir Haroch z Navahrudka.
Uładzimir Haroch byŭ zatrymany 18 žniŭnia 2020 hoda pa tak zvanaj «Karelickaj spravie» — ab biesparadkach, jakija nibyta płanavalisia ŭ Kareličach i Navahrudku paśla prezidenckich vybaraŭ. U śniežni 2020‑ha jamu prysudzili siem hadoŭ kałonii.
Vyzvaleny Siarhiej Rudziankoŭ z Čačerska. Jaho zatrymali ŭ kancy 2022 hoda paśla viartańnia z Polščy.
Uładzisłaŭ Jacenka na svabodzie.
Chłopca pasadzili za danaty Pałku Kalinoŭskaha.
Vyzvaleny ajcišnik Alaksandr Jaškin. Jaho zatrymali ŭ mai 2023 hoda i prysudzili 4 hady kałonii pa cełym pakiecie palityčnych artykułaŭ.
Vyjšaŭ na svabodu aŭdytar Ivan Kavalenka.
Jon pracavaŭ u kampanijach «vialikaj čaćviorki» i źjaŭlajecca členam brytanskaj asacyjacyi prysiažnych buchhałtaraŭ ACCA. Jaho asudzili ŭ 2025 hodzie pa dvuch artykułach — «zakliki da pryčynieńnia škody Biełarusi» i «raspalvańnie varožaści». Dakładny prysud i sutnaść abvinavačańniaŭ nieviadomyja.
Vyzvalenaja Kryścina Łapkoŭskaja. Dziaŭčynie 29 hadoŭ, jana łahistka. Kryścinu asudzili za ŭdzieł u pratestach i za kamientary.
Na voli Arciom Makaviej. Chłopiec maje ŭkrainskaje hramadzianstva, ale apošnija 15 hadoŭ žyŭ u Biełarusi. Chłopcu prysudzili 6 hadoŭ za «ahienturnuju dziejnaść» na karyść Ukrainy.
Abnoŭlena. Infarmacyja pra vyzvaleńnie byłoj žurnalistki Kyky.org Volhi Radzivonavaj nie paćvierdziłasia
Na voli Maksim Sienik z «Hrodna Azot». Jamu dali 4 hady za «abrazu Łukašenki» i «sadziejničańnie ekstremisckaj dziejnaści».
Vyzvaleny Alaksandr Kraŭčuk — palitviazień z Kobryna. Jaho asudzili naprykancy 2024 hoda i dali 4,5 hoda kałonii. Na videa, apublikavanym ukrainskim bokam, bačna, što Alaksandr idzie na mylicach — u mužčyny invalidnaść.
Vyzvaleny Alaksiej Krasnahir. Jamu prysudzili za danaty i ŭdzieł u pratestach 3,5 hoda kałonii.
Viktoryja Kulša — na voli. Byłuju administratarku čata «Kiroŭcy 97% Minsk» zatrymali 4 listapada 2020 hoda. Spačatku joj dali 2,5 hady kałonii, ale potym štohod praciahvali źniavoleńnie pavodle 411 artykuła (złosnaje niepadparadkavańnie zakonnym patrabavańniam administracyi papraŭčaj ustanovy).
Vyzvaleny Aleh Rubiec — pinski padletak, jakoha asudzili za ŭdzieł u paślavybarčych pratestach. Jaho asudzili da 5,5 hoda kałonii ŭzmocnienaha režymu, potym dadali jašče paŭtara hoda źniavoleńnia pa art. 411 KK.
Vyzvalili administratarku čataŭ «97%», jakuju raźviali śpiecsłužby. Da Taćciany Kurylinaj uciorsia ŭ davier ahient i paprasiŭ viarnucca da jaho ŭ Biełaruś z Polščy, abiacaŭ vyrašyć usie pytańni. Ale Taćcianu zatrymali, pakazali na BT i dali 4,5 hoda kałonii.
Na voli viadomy pierakładčyk Siarhiej Paŭłavicki. Jaho zatrymali ŭ 2024‑m i prysudzili 3 hady kałonii za danaty (ich paličyli «finansavańniem ekstremisckaj dziejnaści»).
Siarod vyzvalenych palitviaźniaŭ vopytny chirurh Lilija Kačan. Jana pracavała ŭ 10‑j haradskoj kliničnaj balnicy ŭ Minsku, a taksama ŭ «Nardzinie». Maje bolš za 17 hadoŭ stažu jak urač. Jaje sudzili za «udzieł u pratestach» (č. 1 art. 342 KK) i «zakliki da sankcyjaŭ ci inšych mier, nakiravanych na pryčynieńnie škody Biełarusi» (č. 3 art. 361 KK).
Byłych biełaruskich palitviaźniaŭ va Ukrainie adpraviać u sanatoryj, da ich buduć prymienienyja takija ž pracedury, jak da vyzvalenych z pałonu ŭkraincaŭ. Dalejšyja rašeńni płanujuć uzhadnić z polskimi i litoŭskimi partniorami.
«Bajsoł» zapuściŭ ekstranny zbor dla palitviaźniaŭ, vyzvalenych 13 śniežnia.
Siońnia i ŭčora ŭ Minsku adbylisia pieramovy śpiecpasłańnika Trampa Džona Koŭła i Alaksandra Łukašenki. Koŭł abvieściŭ, što ZŠA zdymajuć sankcyi ź biełaruskaha kaliju.
U papiarednija vizity amierykancaŭ byli vyzvalenyja: 21 červienia — 14 čałaviek, 11 vieraśnia — 51 čałaviek.
Śpis palitviaźniaŭ, vyzvalenych 13 śniežnia, hladzicie tut.
Kamientary