Biznesoviec Siarhiej Botvič, jakoha asudzili za «ahienturnuju dziejnaść» i «špijanaž» u Biełarusi, abviaściŭ haładoŭku

— Lekaŭ, jakija jamu nieabchodnyja, u Biełarusi niama, a rodnym prynieści jamu patrebnyja preparaty nie dazvalajuć. Haładoŭka dla jaho — heta śmiarotnaja ryzyka, — paviedamiła krynica, padkreślivajučy: toje, što Botvič vyrašyŭ pajści na haładoŭku, śviedčyć pra toje, što inšych varyjantaŭ u jaho nie zastałosia.

Siarhiej Botvič — biznesmien, jaki choć i nie maje biełaruskaha hramadzianstva, ale naradziŭsia i žyŭ u našaj krainie. U 80‑ia jon pajechaŭ u Francyju pa abmienie studentami (vučyŭsia ŭ Minskim instytucie zamiežnych moŭ).

Paźniej atrymaŭ francuzskaje hramadzianstva, a paśla i litoŭskaje. Siarhiej zajmaŭsia biznesam u Biełarusi, Rasii, Francyi i Litvie — hałoŭnym čynam heta byŭ turyzm i aptovy ekspart vuhalu z Uschodniaj Jeŭropy ŭ krainy Bałtyi i Zachodniaj Jeŭropy.

U 2014 hodzie jon vyrašyŭ pabudavać zavod pa vytvorčaści draŭnianaha vuhalu na svajoj małoj radzimie pad Śvisłačču (jon naradziŭsia ŭ ahraharadku Novy Dvor, što ŭ Śvisłackim rajonie Hrodzienskaj vobłaści). U prajekt jon ukłaŭ kala miljona dalaraŭ.

U niejki momant biznes Botviča pačaŭ razvalvacca. Nieviadoma, što mienavita zdaryłasia, ale vuhalny zavod tak i nie byŭ pabudavany, a na pradprymalnika ŭ červieni 2018 hoda zaviali kryminalnuju spravu. Pavodle danych z baz «Kibierpartyzan», fabuła kryminalnaj spravy suprać mužčyny hučyć tak:

«Botvič Siarhiej <…> naŭmysna, z karyślivych namieraŭ, nie źbirajučysia vykonvać uziatyja na siabie abaviazki, šlacham abmanu i złoŭžyvańnia davieram, na asnovie ŭdziełu ŭ inviestycyjnym prajekcie pa budaŭnictvie zavoda pa vytvorčaści vuhalu, zavałodaŭ hrašovymi srodkami TAA «Erabl hrup» pamieram 734 tysiačy jeŭra».

Vytvorčaść pa im była spyniena. Pryčyna — niemahčymaść praviadzieńnia śledčych dziejańniaŭ, bieź jakich nie moža być pryniata rašeńnie ab zakančeńni papiaredniaha śledstva (p. 5 č. 1 st. 246 KPK) — chutčej za ŭsio, z-za znachodžańnia mužčyny za miažoj. Ale nie tamu, što Botvič uciok. Heta chutčej była prosta jurydyčnaja padstava. U tym ža 2018 hodzie, pavodle bazy «Pasažyrpatok», Botvič 19 razoŭ byvaŭ u Biełarusi, adzin raz u 2019-m, try razy ŭ 2020-m. Apošni raz jon ujechaŭ u Biełaruś u 2021 hodzie i byŭ zatrymany.

— Potym byli paŭtara hoda ŭ adzinočnaj kamiery, abvinavačańni ŭ pracy spačatku na francuzskuju, a paśla na litoŭskuju raźviedku. Zakryty sud. 13 hadoŭ. Niepryznańnie viny, — padzialilisia z «Lusterkam» detalami tyja, kamu Botvič raskazaŭ svaju historyju.

Pa ich słovach, dokazaŭ špijanažu nie było, akramia słoŭ adnaho śviedki, jakoha «zatrymali razam ź siamjoj na pamiežnym pierachodzie «Pryvałka» i niepasredna tam pahrozami prymusili dać pakazańni na Botviča, paśla čaho dazvolili pajechać u Litvu».

— Siarhiej Botvič užo z kałonii «Voŭčyja nory» źviartaŭsia z skarhami ŭ Hienieralnuju prakuraturu Biełarusi, patrabujučy rastłumačyć, u čym suť abvinavačańnia, bo nidzie nie skazana, što jon kankretna zrabiŭ. Kali ahienturnaja dziejnaść i špijonstva, to jakija sakretnyja dadzienyja jon sprabavaŭ zdabyć? U kančatkovym vyniku musić ža być skład złačynstva na pryznačanyja 13 hadoŭ. U adkaz jon atrymaŭ adpisku, što ŭsie hetyja danyja sakretnyja i tamu jamu nie mohuć paviedamić, za što kankretna jon užo stolki hadoŭ siadzić, — pieradajuć słovy Botviča vyzvalenyja asudžanyja.

Jany vykazali zaniepakojenaść tym, što, uličvajučy stan zdaroŭja Botviča, času ŭ jaho nasamreč moža być vielmi mała.

• 0
• 0
• 0
• 0
• 0
• 1
• 1
• 0